عزيزتي الزوجة اقدم بين يديك اسرع الطرق للحصول على الطلاق.. بس لا تدعين علي اذا تم الطلاق:
• لما يقوم من النوم وينادي عليك علشان تحضرين الفطور سوي روحك نايمة نوم عميق وخليه يصارخ على كيفه ولا كانك تسمعينه ، واذا حاول انه يرفع الغطاء عنك لا تردين عليه ...واذا رفصك بقدمه سوي روحك مريضة وتعبانة لين يمل ويروح للدوام كاره نفسه و الدنيا ...
*اذا طلب منك ان توقتي ساعة المنبه في تمام السابعة وقتيها في تمام التاسعة ولما يقوم قولي له ان لك ساعتين تحاولي معه وهو مو راضي يقوم,ماراح يصدق في أول شيء ,بس أكدي موقفك وقولي انه العيب فيك موفيني .
* تكلمي يوميا بالتلفونً مع جميع الجارات والصديقات ودوري على عناوين جميع قريباتك وصديقاتك في الكويت والسعودية وقطروالامارات حتى الموجودون في اوروبا وامريكا وتكلمي معهم كل وحده بروح وبشكل مستمر .
* لا تروحين معه للعزايم الي من طرف اهله واقاربه ..لكن اذا رفض ان يروح معك الى عزايم اهلك او اقاربك فأقلبيها فوق رأسه هم وغم .
*لما يرد من الدوام مرهقاً وجوعان ،لا تكونين في البيت و كوني عند الجيران ، ولاتروحين له الا بعد ساعة تقريبا ،ولما يكون دور عليك في كل المنطقة وفقد الامل ، راح يدخل المطبخ ولا يلقى شيئاً ، واهنيه يجن جنونه ، ادخلي البيت راح يكون معصب وزعلان مثل الثور الهايج ،بس ما عليك سوى التعذر بالغاز او بمرض احد الاطفال، او مصيبة عند الجيران او التعب اووجع في الاسنان .
*لما يستلم الراتب اشتري بفلوس كثيرة ملابس لك ولاطفالك ولما يسألك ليش كل هذا ؟؟؟قوليله :
الله لايجزاك خير.. انا شريت هذه الاغراض بمساعده من اهلي ,وأمي هي الي تجيب لي الملابس ، ولولا امي ماصار عندي أشياء كثيرة في هذا البيت.. وحاولي انك تخلين كل شيء في البيت انه من أهلك وخاصة امك وهي حماته الي يكرهها .
* تعمدي في يوم عطلته الاسبوعية انك تروحين بدري الى بيت اهلك علشان تقعدين اليوم كله هناك ، وردي متأخرة او نامي هناك احسن وبرري تصرفك بانه كان نائماً واليوم عطلته وانه لا يحتاجك للفطور او غيره والخدامة عنده وشنو يبي بعد ، واسمعيه كلاماً مثل : "ما تبيني اشوف اهلي ، شنو انا عبدة عندك ، بس انت شاطر تروح كل يوم عند امك ، ليش انا مالي ام ولاّ امك احسن من امي ... شنو تفكر نفسك تزوجت خدامة .. حرام عليك انا انسانة مثلك حرام ، عليك يا شيخ.
*ولما يدخل البيت تعمدي ان تلبسين اقدم واوسخ الملابس عنك والتي تطلع منها ريحة كريهة ووسخه مثل ريحة البصل والثوم والبهارات وغيرها من اغراض المطبخ واذا امكن روحي بهذه الملابس للسرير ونامي فيها ، يكون افضل كثير واطلبي منه ان يفتح الباب لانك ما تقدرين تفتحينه تخافين احد جاي وريحة الملابس موحلوة وشكلها وسخ وتنحرجين عند الي جايين.
*اعزمي جميع الجارات مع عيالهم وتعمدي ان يخربون اغراضه و يدخلون عليه في غرفته وهو نائم او مستلقي وتعمدي ارتفاع صوتك وصوت جاراتك ,وخليك حريصة على تأخرهن عندك وهو وراه دوام الصبح وقوليله ترى فشله اخليهن يطلعون بدري هم مو كل يوم يسهرون عندي...
*ولما تطرين لاستقبال اهله عندكم في البيت خليكي انت مركز الجلسة وبيني ضعف زوجك وكأنه ولا شيء وجيبي الشاي والفناجيل وقوليله قدام أهله ان يجيب القهوة لانك نسيتيها.
ولما يجيبها اطلبي منه ان يصب القهوة ... وبعد شوي قوليله الله يخليك الظاهر ان الولد قام من النوم ، شوف روح عنده لا يخاف بروحه في الغرفة وتابعي كلامك مع اهله بابتسامة .. ولما يروحون, بسرعة ألبسي البيجامة الوسخة واستسلمي للنوم والشخير.
*ولما تكونين معزومة او بيجيلك ضيوف خليكي حريصة على لبس احسن الملابس واكشخها وتمكيجي باحلى مكياج وتعطري باحسن العطور وتبخري واحرصي ان هذا كله يكون قدامه..
• ولما يعزم زوجك ربعه في البيت تعمدي انك تطلعين برى ولا تردين الا بعد ساعات علشان يطر ان يخدم نفسه او ينحرج عند ربعه واذا رديتي وطلب منك تجهيز القهوة والشاي تاخري ولا تسوينها بسرعة وبعد مايطلبها اربع مرات قولي له ان الغاز خلص او القهوة خلصت وخليه دايم يطلب العشاء لربعه من المطعم لانك انت ماتعرفين تسوين عشاء كبير ..
•
** أختي الزوجة : فقط سوي ما هو مكتوب او حتى جزءاً منه والله رايح يفتحها عليك من اوسع ابوابه ، والطلاق سيكون شوية عليك ، واذا ما طلقك يكون انسان مو طبيعي ، او انتي لم تلتزمي بالوصفة كما هي مكتوبة.
ملاحظة "هذا المقال مكتوب بطريقة السخرية والمقصود منه هو العكس ، فهذه الامور المذكورة تثير الزوج جداً ، فاذا كنتي تحبين زوجك وحريصة على مصلحته ومصلحة وسلامة بيتك ابتعدي تماما عن مثل هذه السلوكيات لانها فعلا خراب بيت ووصفة سريعة للطلاق " .
: 
: