[B]فـرحـــــــانة
إبنتي الغالية نوسة ، أدعو الله أن يوفقك أنت وزملاءك وزميلاتك وأخواتك جميعاً وأولادي جميعاً وكل من يسأل عنا ، وسلامي للحاجة ظريفة وأولادها والحاجة بهانة وبنتها زنوبة وقولي لها عقبالك زي الحجاج اسكتي مش بدرية ولدت ؟ أمال ..ولدت بنت زي القمر ـ بس لسة ماسموهاش ، قال عايزة تسميها شمس عشان تبقى شمس وزي القمر مع بعض ، والواد ابنها الصغير راح المدرسة ، كان ناقص تلات تيام ،وبعدين سامحوه بقى لما لاقو أبوه تعبان ياحبة عيني ، ولف الدنيا عشان ابنه ما تضيعش عليه السنة ، أمال إيه ـ بس أمه زعلانة بتقول ياختي كان بيقضي لي الطلبات ـ بس فرحانة ، اللي ها يتعلم ويبطل شقاوة ـ بس زعلانة اللي مش لاقية حد تناكف فيه في البيت ، الواد اللي بعده لسة صغيّر مش حمل مناكفة ـ بس فرحانة لأن أخوه بعد عنه دا كان بيجننه ياختي ، طول النهار بس ياواد إهمد ياواد لما لسانها نشف من القِوالة ـ بس زعلانة آل إيه ؟ الجيران بيبصُّولـُه وهو لابس المريلة ورايح الصبح المدرسة آه خايفة عليه من الحسد ، وعايزة تلبسه جلابية بنت لكن أبوه قال لها ياولية ما ينفعش ماهو انت لو عملت كدة حاجة من الاثنين يا مَيْدَخَّلُهْش المدرسة يا يدخلوه مدرسة البنات ـ رجعت فرحت تاني لما قالو لها إن العيال وهي صغيّرة بتبقى حلوة ولما تكبر بتوحش وافتكرت أبوه اللي لما وافقت عليه كانت فاكراه حلو زي زمان وهو صغير ولما شافته اسكتي لقتو ولا كأنه هو ..إوحَش عن الأول بكتير بس ها تعمل إيه ؟ نصيبها بقى ـ بس زعلانة اللي افتكرت موضوع أبوه ، آه دا لسة خارج من غير فطار .. قال إيه الفول ناقص ملح دى تلاكيك بيقولها عشان يخرج يجيب له شقة وطعمية من الجاهزين دول وقال انه متأخر على الشغل ، هو فيه حد يتأخر على الغيط ، يعني هو بيمضي في الغيط ولا يكونش يعني بيمضي في الغيط زي الأفندية أما عجايب ياخواتي دا حتى لبس الجلابية وهي لسة خضرا وانا خايفة عليه من البرد ربنا يستر ، ماهو قال لي أنا هابقى انشرها على النخلة في الغيط ـ بس فرحانة لأن الذرة استوى وها يجيب لنا إن شاء الله حمل حمارة وهو جاي عشان العيال تفرح وتشبع درة ربنا يخليه لينا ويجيب لنا اللي نفسنا فيه ، اسكتي والبلح راخر اصفر وبقى زي الشهد وها يقطع النخلة النهاردة ويجيب لنا السبايط نعلقها على الحيطة في القاعة الجوانية وناكل منها كل يوم البلح اللي يطيب ، وها نجيب لكو منه انشاء الله أمال ماهي الجيران لبعضيها برضه ، ياختي لاتقولي راجل وحش ولا راجل حلو مادام الرجل ملو هدومه كده وبيجيب الرزقة لبيته يبقى زي الفل ، ربنا يبارك له جوزي أبو ولادي مالي علينا البيت ، دا كفاية ياختي دوختو على الواد لما جه يقدم له في المدرسة ، كان ييجي تعبان يا ضنايا وف إيده الأوراق ويبص لي ويقول لي ما رضيوش ، بس انا مش هاسكت تني وراهم لما ياخدوه إن شاء الله ، ولما دخل المدرسة كان مبسوووووط مبسوط قوي ، بس تاني يوم قال الواد وحشنا يابدرية حسيت ياختي بحاجة بتقطع في مصاريني ، وبعدين فكرت وقلت له اسكت ياخويا ـ دانا فرحانه اللي ها يتعلم ويترحم من الغيط وتعب الغيط ، بكرة يبقى افندي قد الدنيا ويريحك ويشيل عنك الحمل ، بص لي وقال لي إن شاء الله يابدرية إن شاء الله ، ودلوقت اقوم بقى اعلق على اللحمة عشان الضهر قرب ، الا ما قلت لكيش ـ مش انا زعلانة اللي الجلابية اللي خيطتتها لي الست أم نوريس طلعت ضيـَّقة والقـَبَّة ياختي معـوُوجة على جنب واقول لها كدة تطـَلـَّع العيب فيَّ وتقول لي انت اللي تخِنـْتيِ قلت ف وشِّها الله أكبر ، آه ماهي ما قلتش ماشاء الله ، قلت لها طب والقَبـَّة ؟ قالت لي برضه العيب عندك، فيه واحدة ياختي رقبتها معووجة والجلابية هي اللي عدلة ؟ أما عجايب والله ـ بس فرحانة لأن كل اللي تشوفها تقول لونها حلو وقماشها حلو ، لكن معلهش أبقى ألبس عليها الشال لما حد ييجي ها عمل إيه الله يسامحك يامُّ نوريس ، هو يعني الراجل بيجيب الفلوس بالساهل ؟ ـ بس زعلانة الحقيقة مش عارفة زعلانة ليه المرة دي وقعدت تضَوَّر وتفتكر زعلانة ليه مافتكرتش أي حاجة فبقت فرحانة لكن خايفة تفتكر انها كانت زعلانة ليه تقوم تزعل ، فقالت لما افتكر بقى أبقى أنسى أمال ياختي هازعل على حاجة مش فاكراها أما عجايب .. ربنا ما يجيب زعل ..اقعدوا بالعافية .
عبدالحكيم عبدالوهاب هارون[/B]
إبنتي الغالية نوسة ، أدعو الله أن يوفقك أنت وزملاءك وزميلاتك وأخواتك جميعاً وأولادي جميعاً وكل من يسأل عنا ، وسلامي للحاجة ظريفة وأولادها والحاجة بهانة وبنتها زنوبة وقولي لها عقبالك زي الحجاج اسكتي مش بدرية ولدت ؟ أمال ..ولدت بنت زي القمر ـ بس لسة ماسموهاش ، قال عايزة تسميها شمس عشان تبقى شمس وزي القمر مع بعض ، والواد ابنها الصغير راح المدرسة ، كان ناقص تلات تيام ،وبعدين سامحوه بقى لما لاقو أبوه تعبان ياحبة عيني ، ولف الدنيا عشان ابنه ما تضيعش عليه السنة ، أمال إيه ـ بس أمه زعلانة بتقول ياختي كان بيقضي لي الطلبات ـ بس فرحانة ، اللي ها يتعلم ويبطل شقاوة ـ بس زعلانة اللي مش لاقية حد تناكف فيه في البيت ، الواد اللي بعده لسة صغيّر مش حمل مناكفة ـ بس فرحانة لأن أخوه بعد عنه دا كان بيجننه ياختي ، طول النهار بس ياواد إهمد ياواد لما لسانها نشف من القِوالة ـ بس زعلانة آل إيه ؟ الجيران بيبصُّولـُه وهو لابس المريلة ورايح الصبح المدرسة آه خايفة عليه من الحسد ، وعايزة تلبسه جلابية بنت لكن أبوه قال لها ياولية ما ينفعش ماهو انت لو عملت كدة حاجة من الاثنين يا مَيْدَخَّلُهْش المدرسة يا يدخلوه مدرسة البنات ـ رجعت فرحت تاني لما قالو لها إن العيال وهي صغيّرة بتبقى حلوة ولما تكبر بتوحش وافتكرت أبوه اللي لما وافقت عليه كانت فاكراه حلو زي زمان وهو صغير ولما شافته اسكتي لقتو ولا كأنه هو ..إوحَش عن الأول بكتير بس ها تعمل إيه ؟ نصيبها بقى ـ بس زعلانة اللي افتكرت موضوع أبوه ، آه دا لسة خارج من غير فطار .. قال إيه الفول ناقص ملح دى تلاكيك بيقولها عشان يخرج يجيب له شقة وطعمية من الجاهزين دول وقال انه متأخر على الشغل ، هو فيه حد يتأخر على الغيط ، يعني هو بيمضي في الغيط ولا يكونش يعني بيمضي في الغيط زي الأفندية أما عجايب ياخواتي دا حتى لبس الجلابية وهي لسة خضرا وانا خايفة عليه من البرد ربنا يستر ، ماهو قال لي أنا هابقى انشرها على النخلة في الغيط ـ بس فرحانة لأن الذرة استوى وها يجيب لنا إن شاء الله حمل حمارة وهو جاي عشان العيال تفرح وتشبع درة ربنا يخليه لينا ويجيب لنا اللي نفسنا فيه ، اسكتي والبلح راخر اصفر وبقى زي الشهد وها يقطع النخلة النهاردة ويجيب لنا السبايط نعلقها على الحيطة في القاعة الجوانية وناكل منها كل يوم البلح اللي يطيب ، وها نجيب لكو منه انشاء الله أمال ماهي الجيران لبعضيها برضه ، ياختي لاتقولي راجل وحش ولا راجل حلو مادام الرجل ملو هدومه كده وبيجيب الرزقة لبيته يبقى زي الفل ، ربنا يبارك له جوزي أبو ولادي مالي علينا البيت ، دا كفاية ياختي دوختو على الواد لما جه يقدم له في المدرسة ، كان ييجي تعبان يا ضنايا وف إيده الأوراق ويبص لي ويقول لي ما رضيوش ، بس انا مش هاسكت تني وراهم لما ياخدوه إن شاء الله ، ولما دخل المدرسة كان مبسوووووط مبسوط قوي ، بس تاني يوم قال الواد وحشنا يابدرية حسيت ياختي بحاجة بتقطع في مصاريني ، وبعدين فكرت وقلت له اسكت ياخويا ـ دانا فرحانه اللي ها يتعلم ويترحم من الغيط وتعب الغيط ، بكرة يبقى افندي قد الدنيا ويريحك ويشيل عنك الحمل ، بص لي وقال لي إن شاء الله يابدرية إن شاء الله ، ودلوقت اقوم بقى اعلق على اللحمة عشان الضهر قرب ، الا ما قلت لكيش ـ مش انا زعلانة اللي الجلابية اللي خيطتتها لي الست أم نوريس طلعت ضيـَّقة والقـَبَّة ياختي معـوُوجة على جنب واقول لها كدة تطـَلـَّع العيب فيَّ وتقول لي انت اللي تخِنـْتيِ قلت ف وشِّها الله أكبر ، آه ماهي ما قلتش ماشاء الله ، قلت لها طب والقَبـَّة ؟ قالت لي برضه العيب عندك، فيه واحدة ياختي رقبتها معووجة والجلابية هي اللي عدلة ؟ أما عجايب والله ـ بس فرحانة لأن كل اللي تشوفها تقول لونها حلو وقماشها حلو ، لكن معلهش أبقى ألبس عليها الشال لما حد ييجي ها عمل إيه الله يسامحك يامُّ نوريس ، هو يعني الراجل بيجيب الفلوس بالساهل ؟ ـ بس زعلانة الحقيقة مش عارفة زعلانة ليه المرة دي وقعدت تضَوَّر وتفتكر زعلانة ليه مافتكرتش أي حاجة فبقت فرحانة لكن خايفة تفتكر انها كانت زعلانة ليه تقوم تزعل ، فقالت لما افتكر بقى أبقى أنسى أمال ياختي هازعل على حاجة مش فاكراها أما عجايب .. ربنا ما يجيب زعل ..اقعدوا بالعافية .
عبدالحكيم عبدالوهاب هارون[/B]
: 
: 
: