عااااااااااااااااايزة اتجوززززززززززززززز

    • عااااااااااااااااايزة اتجوززززززززززززززز


      بداية الحكايه

      سموا بالله كده وخليكوا معايا واحده واحده...
      خلينا نتفق الاول إن موضوع الجواز والعرسان وتأخر الجواز ده موضوع حساس جدا.....وصعب جدا انكم تلاقوا حد بيتكلم بصراحه..خصوصا بالنسبه للبنات . لأن اللى بتتكلم فيه بصراحه يا إما بيتبصلها على إنها قليلة الأدب وما إتربتش.. يا إما على انها مسروعه على الجواز ... يا إما على إنها بارت ومش لاقيه حد يتجوزها..علشان كده تلاقوا بنات كتير بتقول :
      _ جواز ايه بلا نيله...يعنى هما اللى اتجوزوا عملوا ايه
      _ أنا قاعده فى بيت ابويا معززة مكرمه , ايه اللى يخلينى أروح اتبهدل مع حد معرفوش؟
      _ أنا مبفكرش فى الجواز دلوقتى لما ابنى مستقبلى !
      والجمله المستهلكه فى كل الافلام العربيه :
      _ لما احقق ذاتى !
      مش عارف إيه ذاتها دى وتحققها إزاى يعنى ؟!

      يمكن فيه بنات كتير ليهم طموح فى دراستهم وفى شغلهم ... لكن اتحدى ان اى واحده فيهم ما يكونش طموحها الاول انها تبقى زوجه.. على الاقل لان دى الطريقه الوحيده اللى تخليها تبقى أم

      **** نتفق بقا على أسس تانيه مهمه :
      _ عدد البنات فى مصر اكبر من عدد الرجاله
      دى نقطه اساسيه مش عايز حد يناقشنى فيها... وسيبكوا بقا من احصائيات الحكومه اللى بتقول لك عدد الاتنين زى بعض.. لان دى احصائيات عاملة بالظبط زى درجات الحراره اللى بيعلنوها فى النشره.
      يعنى الناس بتحلف بالطلاق ان الحراره اكيد فوق ال 45 .. وهما لا يمكن يزودوها عن 38..
      انا ليا واحد صاحبى قال لى : ممنوع يذيعوا ان الحراره فوق ال 42 عشان السياحه متنضربش والسياح ميهربوش..
      موضوع نسبة الاناث للذكور برده فيه لعب بالطريقه دى .. ليه بقه النسبه اكبر؟ اقول لكم :
      موضوع الستات اللى بيقعدوا يخلفوا عشان يجيبوا الولد , يعنى فيه عائلات كتيرة تلاقيها كده .. 4 بنات وولد.....5 بنات وولد....6 بنات وولد...وهكذا .. وتفضل الست تخلف تخلف عشان جوزها يجيله الواد.. يجيبوا يعمل بيه ايه؟ ما تعرفش... وييجى فى الاخر خايب ونايب ويقعدوا يدلعوا فيه لما يطلع فسدان ويضيعلهم اللى وراهم واللى قدامهم واللى جنبهم كمان..ما علينا ده موضوع تانى ... بس اى حد بيدرس او درس فى اى كليه فى جامعات مصر هيلاحظ ان عدد البنات فى اى كليه اكبر من عدد الولاد..ايام ما كنت فى الكليه كانوا تلتين العدد بنات والتلت ولاد... يعنى الضعف

      نقطه تانيه :الرجاله بقا حاسين بنفسهم وبيتكبروا على خلق الله من البنات وتلاقى الراجل قاعد هو وامه يتشرطوا... لازم تبقا بيضا وشعرها بنى وعينيها عسلى وشبه نيللى كريم
      هههههه الله يخرب بيوتكم ! طيب بص لنفسك فى المرايه الاول.. طب بلاش... بيقولوا الراجل ميعيبوش الا جيبه.. طب شبرقنا كده وادخل فى ايدك انشالله علبه ملبس ... لأ.. البعيد هو وامه يروحوا يشوفوا العروسه الغلبانه اللى اهلها صارفين عليه الشيئ الفلانى ومكلفين قعدة التعارف دى شئ وشويات.. رايحين ايد ورا وايد قدام.. والبنت ما فيهاش اى عيب ويقولوا لكم : لأ اصلها مش شبه نيللى كريم قوى... دى قالبه شويه على نجلاء فتحى وانا مبحبش النوع ده.. تقولش حسين فهمى رايح يتقدم للبنت

      لأ ولأافراح .....نكككككككته : زمان كنتوا تشوفوا ........ ( ونكمل الحلقة الجايه )



      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ


    • نكمل حكايتنا

      كنت بقول ان الافراح كانت نكككككككته ... زمان كنتوا تشوفوا فى الافلام العربى أى بنت تدخل فرح وهى لابسه شيك كده شويه .. يتلموا عليها الشبان ويبقوا عايزين ياكلوها ... ومتخرجش م الفرح الا بعريس .. دلوقتى نفس التجمعات بس بالعكس تلاقى كل أم قاعده هى وبناتها مراقبين الشباب ويا يله اللى يعدى جنبهم.

      _ طارق .. ازيك يا ولد .. مش تيجى تسلم على بنات خالتك .. شوف بقوا حلوين إزاى ؟

      _ انا مش طارق يا طنط وانا متهيأ لى كده حضرتك مش خالتى .

      _ صحيح ؟ معلش يا حبيبى العتب ع النظر . طب ما تعرفنا على نفسك كده يمكن ربنا يحبك ويبقى لك نصيب معانا .

      طبعا الواد يا إما يطلع يجرى .. يا إما حد من صحابه ياخد باله م الكمين اللى وقع فيه وييجى ينقذه على أساس فيه حد عايزه وكده.

      طبعا ده غير اللف اللى بيقعدوا البنات يلفوه حوالين العروسه عشان يبقوا واضحين لكل اللى فى القاعه من كل الجهات .. ولما بيقف اللف تلاقيهم يزقوا فى بعض او يعملوا انهم بيعدلوا للعروسه فستانها او طرحتها عشان يطلعوا فى الفيديو.... ويحاولوا يطلعوا فى اكبر عدد ممكن من الصور.. يمكن يعجبوا حد ويتكل على الله وينتشلهم من عالم الانسات .

      الكلام ده كله على فكره مش المفروض تضحكوا عليه .. والله البنات دول غلابه... زمان ما كانش مطلوب من اى بنت غير انها تحترم نفسها وتقعد فى بيت ابوها وتستنى العدل اللى بيكون فى الغالب من اختيار اهلها .

      ودلوقتى الكوره بقت فى ملعب البنات .. يعنى لازم تخرج وتشتغل وتروح افراح وتزور اصحابها , لإن مسئولية احضار عريس بقت ملقاه على عاتقها بالكامل ... انا اعرف حالات كتيره اهل البنات بيتخانقوا معاهم خناقات لرب السما عشان يخرجوا ويشتغلوا يا إما عمرهم ما ها يتجوزوا..

      وم الجهه التانيه المجتمع فى حالات كتير وخصوصا خارج القاهره والاسكندريه ما بيرحمش اى بنت تخرج مع راجل عشان تتعرف عليه ويمكن يبقى فيه نصيب... ده غير ان الراجل نفسه فى الغالب ما بيرضاش بيها ويقولك عايز واحده خام لا خرجت ولا اتكلمت مع حد غيرى..

      طب بذمتكوا البنات يعملوا ايه ؟.. ده غير العداد اللى بيعد من اول ما تتخرج من الجامعه... يعنى البنت تعتبر بدأت تعنس ما أول ما تعدى عليها سنتين او تلاته متخرجه ولسه ماتخطبتش.

      .. بصراحه المجتمع المنيل اللى احنا عايشين فيه واللى بيقيم البنت بجوازتها , واللى تتجوز بسرعه تبقه شاطره واللى تتاخر يبقا فيها عيب ...

      وع الجهه التانيه الراجل من حقه ينقى ويتشرط ويبقى مقطع السمكه وديلها ويتقال عليه مفتح ومدقدق... ويبقى معدى الاربعين ومن حقه يتجوز اى وقت انشالله واحده عندها 18 سنه.

      المجتمع ده ظااااااالم ومفترى !!!!!!

      ولهذا قررت انى هاكتب فى الموضوع واشرحه من كل الجوانب الممكنه عشان اللى مش فاهم يفهم , واللى مش عارف يعرف ان البنات غلبانه والضغط عليهم بيزيد كل يوم والناس بتحاكمهم على حاجه مالهمش يد فيها .

      خليكوا معايا بقه هاحكيلكم على بلوه م البلاوى اللى اتقدموا ل ( واحده من الناس ) عشان تعرفوا احنا بنستحمل أد ايه ...

      ليه أنا عايزة اتجوز ؟؟؟

      10 - 15 سبب ما تعدش ورايا

      ونككككككككككككككمممل بكره....................................

      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ

    • ليه أنا عايزة اتجوز ؟؟؟
      10 - 15 سبب ما تعدش ورايا



      ساعات اقعد مع نفسى كده شويه وافكر : هو أنا ليه أساسا عايزة اتجوز ؟؟؟ .. مانا زى الفل أهوه.. دكتوره ومحترمه وبأقبض ( والا بلاش دى لحسن تضحكوا عليا ) مانا عايشه وباكل واشرب وبانام وباخرج واتفسح واروح السينما واتفرج على روتانا وما باقدرش اغمض عينيا ..يبقى فين المشكله ؟؟؟
      بس أوقات تانيه بيبقى فيه لحظات باحس ان فيه اسباب كتيره تخلينى عايزة اتجوز .. وكل البنات فى كل المستويات والثقافات أكيد بيحسوا بكده .
      واحده مثلا هاتقول : عايزة أتجوز عشان اجيب عيال
      التانيه هاتقول : عايزة اتجوز عشان ما أحملش لقب عانس
      التالته هاتقول : عايزة اتجوز عشان أنطلق وأبقى حره ( عبيطه بس هنعمل إيه )
      الرابعه هاتقول عايزه اتجوز عشان اخلف للعرب صلاح الدين ( يا ووووولد ! - جايزة برضه )
      اما صاحبتنا اللى بحكى لكم عنها عندها اسباب تانيه خالص .. مش الحاجات الكبيره دى ( زى مثلا : انه حقى انى ابقى عايزة اتجوز : لاهو عيب ولا حرام ) لكن انا الحاجات الصغيره هى اللى بتهمنى ..لأن الحاجات الصغيره دى هى اللى بتدى للحياه طعمها .. على رأى ميرفت امين فى فيلم ( ومضى قطار العمر يا ولدى ) خد اللى بعده بتاع 4 الا ربع ... كان عميق اوى الفيلم ده.
      المهم آدى عشره خمستاشر وقت باحس فيهم انى محتاجه يكون لى زوج :
      1- وقت ما أنبوبه البوتاجاز تخلص وتبقى عايزة تتغير .. ودى طبعا من واجبات الزوج الرئيسيه فى البيت
      2- وقت ما أشوف صرصار فى البيت وأترعب وما اعرفش أموته .. بس تبقى مصيبه لو هو كمان بيخاف
      3- وقت الغدا لما بابا وماما بياكلوا وركين الفرخه ويسيبوا لى الصدر .. حتى لو هو كمان ما بيحبش الصدر فالفرخه أم وركين ياكلوها اتنين!
      4- وقت ما أطلع المراتب وتتشمس فوق السطح ... ساعتها هاعمل انى محتاجاه يساعد بس وأشيلهومله كلهم.
      5- وقت السيما لما بيفصلوا الأفراد عن اعائلات .. أصلا أصلا يتجوزوا وكمان يروحوا السينما ؟... إيه الظلم ده؟
      6-وقت ركوب الميكروباص اكيد ها يحمينى من الخبط والتحرش.. دة لو ما كانش مشغول ساعتها وبيتحرش بالبنت اللى جنبه..
      7- وقت ما بارجع البيت والمديره متخانقه معايا ونفسى اطلع غلى فى حد... لو زعقت فى بابا وماما حرام...ادخل النار... لكن هو معلش
      8- وقت ما واحده من صحباتى المتجوزين يجيلها تليفون من جوزها يقولها انها نسيت الطبيخ ع النار والشقه ولعت ... اشمعنى انا ما يبقاش عندى شقه وتولع ؟
      9- ( طبعا انا حذفتها )
      10- وقت ما ماما بتطبخلنا اكله ما باحبهاش.. امتى بقا انا اللى اتحكم فى الطبيخ واطبخ اللى على كيفى واللى مش عاجبه يروح وياكل عند امه
      11- وقت ما ماما بتمنعنى انى احط كراكيب فى البلكونه .. امتى بقه يبقى عندى بلكونه وأملاها كراكيب ومطبخ اشيل فيه برطمانات المربى الفاضيه ؟
      12- وقت ما يبقى نفسى فى البرقوق .. دلوقتى ما حدش بيرضى يجيبهولى , لكن ساعتها ها هدده انى ممكن أبقى باتوحم والواد ممكن تطلع فى قفاه برقوقه
      13- وقت ما بتفرج على كليب لهايفا او نانسى ويبقى نفسى حد يبقى قاعد جنبى عشان اهزؤه
      14- وقت ما بكتب موضوع زى ده ومالاقيش حد ينبهنى انى كتبت 14 نقطه بس نسيت اكتب نمره 6

      (ههههههه.. وضحكت عليكوا )
      15- فكروا انتوا بقه فى نمره 15 عشان انا قلبت على نفسى المواجع واعصابى تعبت قوى
      المهم آدى 10 - 15 وقت با حس فيهم انى عايزة اتجوز ’ لكن فيه برضه 100 وقت تانيين با حس فيهم انى مش عايزة .. افضل من غير جواز


      الأول

      ........................ ونكمل بكره

      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ


    • انا قلت قبل كده ان فيه 100 وقت با حس فيهم انى مش عايزة .. افضل من غير جواز




      الاول



      حلو العنوان كده زى ما كان انور وجدى بيقول فى امير الانتقام .. اصل الموضوع كله تحس انه فيلم عربى بس اول موضوع ده كان فيلم هندى وكوميدى كمان

      واحده صاحبتى كانت لسه متجوزة قريب وكنت لسه حاضره فرحها من اسبوعين .. اتصلت بيا عشان تطمن عليا يعنى . كنت لسه سامعه خبر ان واحده من اصحابنا جابت عريس لواحده تانيه صاحبتنا برضه.. وده موضوع يضايق قوى على فكره .. يعنى تفضل الواحده تقول واشمعنى يعنى ماختارتنيش انا ومش بعيد تقاطعها وماتكلمهاش تانى ابدا.

      انا بقه مسكت صاحبتى اللى كانت طالبانى فى التليفون وقعدت ارصلها :

      - شايفه الصاحبات ؟.. ما طلعش منك انت حاجه زى دى كده.. امال مجوزينك ليه ؟ مش عشان تشوفيلنا فى اصحاب جوزك والا قرايبه حد ينفع ؟

      وكل شويه صاحبتى تحاول تقاطعنى وتسدنى وانا اببببدا منطلقه زى الصاروخ .. لحد ما راحت موقفانى بصرخه.

      _ يا بت اسكتى بقه جوزى بيسمع م السماعه التانيه وعايز يتاكد انك كويسه ورقيقه عشان جايبلك عريس.

      وفى لحظه واحده انقلبت طريقه كلامى 180 درجه وبقيت ارق من ارق واحده تعرفوها :

      _انتى صدقتى دانا كنت باهزر معاكى ... انتى عارفانى رقيقه طول عمرى . دانا ارق م البت اللى طالعه جديد اللى اسمها منى زكى

      واسمع صوت جوزها بيحاول كتم ضحكه ع السماعه التانيه وهى حساها بتجز على سنانها وهى بتقوللى :

      _ عارفه عارفه . هو انتى هاتقولى لى ؟



      المهم اتفقنا على ميعاد .. ولما اقول اتفقنا على ميعاد يمكن تعدى ع الرجاله سهله كده يعنى , ديتها ايه ؟ ها يستحمى وها يخلى امه تغسله القميص والبنطلون واخته تكويهومله ويشغل كل اللى خلفوه عشان طلعه اهله البهيه ... لكن فى بيت العروسه اللى هيا المفروض انا ... هييييصه .. غسيل للحيطان ومسح للارضيه وتنضيف للسجاجيد وتسيييق للسلم وتلميع للكاسات وتنضيف للستاير والشبابيك .. وبعد ده كله متوقع من العروسه بعد كل المجهود المقندل دة انها تتزوق وتخش عليهم حلوه وبتبرق .



      المهم جه المحروس هو واهله..هو دكتور على فكره ..باضرب بطرف عينى كده لقيته لابس لبس يا سلااااام.. زى ما يكون لم اللى ع الحبل كله ولبسه على بعضه وتقريبا كده ما عندهمش مرايات وشكل امه واخته عندهم عمى الوان ... البيه لابس قميص اصفر ..بنطلون ازرق.. بلوفر اخضر .. وفوق ده كله كرافته كده الصراحه مش عارفه احدد بالظبط لونها ايه.. ولا استنوا ..جزمه بنى لما اتجعص كده وحط رجل على رجل لقيت الشراب نبيتى... اه والنعمه.. قلت فى نفسى مش مشكله مهو الراجل ميعيبوش الا جيبه... واهو يبقى عريس تكنى كلر زى التلفزيون الملون... مشرق كده ومقبل على الحياه.. هو صحيح ودانه مخاصمه راسه خالص وسنانه بيحبوا بعضهم لدرجه انهم راكبين فوق بعضيهم ..بس خلقه ربنا يعنى . المهم العقل والشخصيه.

      اول ما بابا دخل راح واقف.. حلو مؤدب يعنى وانطلقت امى تعرفه زى ما نكون فى برنامج :

      _ الدكتور سامى... علاج طبيعى

      قام هو مكمل التقديم وقايل : ويقلد فنانين !

      ايه الهبل ده بااااه ؟! هو احنا عاملين برنامج مواهب ولا ده جاى يعمل انترفيو فى كباريه .. بابا برقله كده وقاله : آه اهلا وسهلا اتفضلوا

      وبص لماما بصه معناها : ايه اللى انتوا جايبينه ده ؟



      انا قاعده وماسكه نفسى م الضحك وده منطلق بيتكلم على صولاته وجولاته فى عالم التقليد واحنا قاعدين نبص لبعض وامه شكلها منشكحه قوى من كلامه .. وفجاه بص فى الساعه وبص لبابا .. بابا خاف ليطلبنى دلوقت وهيبقا موقف محرج اول مره يتعرض له .



      لكن ده قاله : عمى .. ممكن اسال حضرتك سؤال وتجاوبنى بصراحه ؟

      بابا قاله بخوف كده : خير يا بنى؟

      قاله : هو التلفزيون ده شغال ؟



      بابا فوجئ كده وقال له : آه يبنى شغال



      فجاة الحليوه دة راح قايم و........................... نكمل بكره








      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ


    • ..فجأه الحليوة ده راح قايم و فاتح التلفزيون و قعد يقلب في القنوات لحد ما جاب قناه كانت بتزيع ماتش للزمالك..و احنا قاعدين مذهولين و مش قادرين نعمل حاجه و امه قاعده منشكحه زي ما هيا..و هوب و صوته علي ..شوت يا عم ..أيوة كده ..يااااه ..الحكم ده حمار بن كلب ...واحنا قاعدين ..ماما حبت تحرجوا بالذوق كده و قالتله ..و الله يا دكتور انا مش عارفه انت ازاي بتابع الكورة دي اليومين دول ..ده حتى الزمالك بقاله مده مش كويس خالص


      الواد فجأة سكت و لف كده لماما بالتصوير البطئ..و عينيه احمرت لدرجة ان ماما كشت في مكانها ..و ده راح رافع الجعورة ..لاااااا ..بقولك ايييييه ..إلا الزمااالك ..اتكلمي براحتك على أي حد ..على امي على أبويا عليا أنا شخصيا لكن الزمالك لألألأ ..فاهمه ..قومي يا ماما ..أنا لا يمكن أدخل بيت الزمالك بيتهان فيه


      يابن 60 في 70..أكن احنا معديينلك البلاوي اللي انت لابسها و السخافات اللي عمال تقولها عشان تبقى أخرتها كده ؟....كلنا فضلنا متسمرين مكاننا بابا يبص لماما و مش قادرين حتى يقوموا من مكانهم وانا الأول اتحرق دمي و بعدين وقعت ع الأرض من كتر الضحك..هم يبكي و هم يضحك


      .آه آه نسيت أقولكم ..صحبة ماما طنط "حشرية" ..(اسمها شكرية ..حشرية ده النيكنيم اللي صحابها الأنتيخ بينادوها بيه ) جابت لي عريس

      عريس ايه يا برايد ...راااااجل
      أيوة طبعا ماهو لازم يبقى راجل امال هتجوز ايه..موتوسيكل؟
      لأ قصدي هيبة كده و مركز عاقل وراسي و بيفهم في كل حاجه
      عريس و بيفهم ؟..أشك ..الصراحة لسه ماقابلتش النوعية دي قبل كده ..عموما جايز
      ماشي يا طنط حشـ..قصدي شكرية شكرية ..و ده هييجي أمتى و مع ميين؟..هيجيب مامته معاه
      مامته؟هي هي هي..يا حبيتشي بقولك راااجل
      أيوة يعني أبوه تكاثر ذاتيا و جابه لوحده؟؟...ما هو لازم يبقى له ام
      لا يا برايد لازم تفهمي ده "مستكل" جدا و رأيه من دماغه و مابيديش ودانه لحد و معتمد على نفسه اعتمادا تاما
      الله.."مستكل" و رأيه من دماغه و مابيديش ودانه لحد ..انا باموت في النوع ده
      أحمد عبد العزيز في المال و البنون ..شريف منير في ليالي الحلمية..محمد رياض في أي حاجه مثلها قبل مايتجوز(الوحش)
      الصراحة جسمي قشعر ..باموووت في النوعية دي..يا سلام بأه لو سنانه مزاحمه بعضها زي نبيل الحلفاوي و الا ودانه واقفه زي حمدي قنديل و الا بلغد زي عمرو موسى
      الرجالة اللي ليهم شخصية و هيبه لازم يبقى ليهم ديفوهات زي دي و هو ده اللي بيميزهم..و بعدين انا اتعقدت من الناس اللي شكلها حلو ..أنا عايزة واحد وحش مش عايزة بتوع لجنة السياسات خلاص


      و جه اليوم الموعود..نضاااافنا الشقة و نفضنا السجاد و غسلنا الستاير اللي كانت لسه مغسوله من يومين و كويت الطقم و لبسته و حطيت مكياج نص نص ..مش في الكواليتي .لأ في الكوانتيتي ..لو طلع من اللي مابيحبوش الميكاب الكتير و قلب وشه و امتعض ..أخش أغسل وشي واطلعله زي ما ربنا خلقني(هو اللي جابه لنفسه) ..أما لو كان من اللي بيحبوا التكني كالر ..عندي صباع روج بطعم الفراولة هاخش أكله كله ..ما حدش يغلطني بأه ..عروسة فول أوبشن أهه
      قاعدين مستنيين سمعنا صوت رجلين ع السلم وهوب رن الجرس رننننة رزييييينة قووووي..يا سلام الكبير كبير برضه

      دخل م الباب ..يااااسلاااام حاجه كده بتاع مترين و نص طول بعرض و عارفين كل الديفوهات بتاع نبيل و حمدي و عمرو ...ياسلام زي ماتكون أبواب السما كانت مفتوحة ..سنان ايه وودان ايه و لغد عسسسل ماحصلش تحس انه شايل فيه الخزين
      لابس بدلة مقلمة تقليمة خفيفة كده و كرافته شيك و نضارة طبية ..ايه ده وزير المواصلات يا خواتي

      واحنا كلنا لسه واقفين ع الباب بنبص لبعض ..وانا فرحانه قوي .الراجل هيبه كده و يخض و يحسس الواحده انها جنبه ولا حاجه ..يمكن تلاقي بنات كتير تقوللك لازم احس بشخصيتي ..لكن خدوها مني حكمة ..كل اما تقلب البنت و تنفضلها كل اما تنفض جيوبك...لأ لأ مش دي الحكمة ..سوري ..قصدي كل اما تنفض للبنت كل اما تقع فيك اكتر..ايوة ايوة هي دي ..احنا لسه واقفين ع الباب و ده مد راسه من جوة وبصلنا ..اتفضلوا يا جماعه واقفين بره كده ليه..اتفضلوا

      اتحركنا كاننا تحت التنويم المغناطيسي و بابا بيبصلي نظرة معناها..ايه اللي انتي جايباهولنا يتأنزح علينا ده ..وانا ابصله نظرة معناها ..بحبه يا بابا .عاااااا...

      دخل و قعد و حط رجل على رجل و احنا واقفين
      بصلنا و ابتسم ابتسامه انيقة و هزلنا راسه اقعدوا اقعدوا
      قعدنا قداموا مبهورين بنبصلوا زي ما مرات عم محمد البواب بتبص لجوزين الغوايش بتوع مرات عم مصطفى المكوجي
      قاعد هو ع اكرسي اللي في وش الكرسي اللي انا قاعده عليه..قعد يبصلي كده و يبص للفازة اللي ع الترابيزة اللي في وسط الصالون و فجأه بدون مقدمات راح قايم شايل الفازة بالورد اللي فيها و حاطتها ع البوفيه..وقاعد تاني
      بابا بصله و ال1111 ظهرت على وشة واضحة جلية _ملحوظة بابا بيظهر على وشة 1111 مش 111 زي الناس العادية خصوصا لما بيبقى متغاظ-بص لبابا و ابتسم برضه الإبتسامه الأنيقة:أصلي مش عارف أشوفها كويس..


      دي طبعا اللي تبقى أنا..ومش عايزة نباهة هو كان شايف وشي يبقى كان عايز يشوف....يا نهار اسود ...و واضح ان بابا كمان وصل للنقطة دي بتفكيرة لأن حواجبوا كانوا خلاص قربوا يندمجوا و يبقوا خط واحد طويل فوق مناخيره اللي احمرت و بقه اللي كان مكرمش لأنه واضح انه بيجز على سنانه
      ماما مدت ايديها و طبطبت على ايده يعني استنى لما نشوف أخرتها ايه
      بابا بصلها يعني ده واضح انه بجح و عينه يندب فيها رصاصة
      رفعت حواجبها واتنهدت يعني الرجالة كلها بقت كده ..جيل الدش يا سيدي


      كل ده و اختكوا قاعده غرقانة في عرقها و هو مركز قوي مش عارفه في ايه؟...ومش عايزة أعرف
      وفجأة برضه و بدون مقدمات تاني اتفتح في الكلام ..
      لو سمحتي ممكن أعلق على حاجه ..وبيشاور
      بابا اتحرك بتحفز عشان يقوم بتصرف أبوي لطيف و ينط في كرشه و ماما شايفاها بدأت تطلع رجلها من الشوز تحسبا لإحتمال استخدامها كدعم معنوي بابا يحتاجه

      تعلق على ايه
      ضوافرك
      هااه؟
      ضوافرك
      مالها
      انتي ليه بتقصيها مدوره مش عارفه ان المربعه هي الموضه
      هي الموضه في الدهب ايه دلوقتي الأصفر والا الأبيض؟
      بس اللون الأبيض اللي انتوا داهنين بيه الأوضه ده هايل و اللون اللي انتوا داهنين بيه البيت كمان
      هو البيت ده تمليك والا ايجار؟
      ايجارات الشقق بقت غالية قوي على فكرة اليومين دول
      اليومين دول ساقعه شوية باين الشتا داخل بدري السنة دي
      انتوا عارفين ان السنة دي سنة خبيثة أصل انا مواليد تسعه و عشرين فبراير وباحتفل بعيد ميلادي كل أربع سنين مرةهاهاها
      ..مرة واحد جه يقعد على قهوة قعد على شاي هاهاهاها
      الشاي بتاعي خفيف يا طنط على فكرة و بمعلقة سكر واحده

      ماما بعد ماتاكدت انه أهبل صدرتله الوش الخشب..الشاي خلص من عندنا يا حبيبي

      الشاي خلص ..طب خلاص نخليها قهوة
      هي القهوة اللي تحت البيت دي مش عاملالكوا ازعاج
      اصل ازعاج الناس ده اسوأ حاجه في الدنيا خصوصا الكلام الكتير
      كتير قوي المكياج اللي انتي حطاه يا آنسة..
      آنسه انتي برضه ماقولتليش اسمك ايه ..الإسم دايما مهم
      القسم بقه اللي جنبكوا ده بيحميكوا كويس بيخوف الحرميه يجوا الناحية دي..أصل الناس خلاص هتاكل بعض
      هو انتوا هتاكلوا ايه النهارده انا شامم ريحةملوخية بالأرانب
      الأرانب بقت سهلة دلوقتي على فكرة الواحد يدخل بميت جنيه في البورصة يطلعلوا بأرنب.. مليون يعني
      مليون مرة أقول لطنط شكرية عايز عروسة مش عارف اتأخرت ليه على ماجابتني هنا
      بابا فرمله :
      أنا عارف...بره

      نعم يا عمي قصدك السفر بره لأ انا مش ناوي أصلي

      بررره..أطلع بره ماعندناش بنات للجواز

      هاهاها ..بتهزر يا عمي ..أمال دي ايه..يا جماعه حد
      يقوللي اسمها ايه ..هاتجوز واحده ماعرفش اسمها

      انا قلت بره ماعندناش بنات للجواز

      مش فاهم حضرتك بتتكلم بجد.بتهزر أكيد مقلب..
      آه شوفتوا برنامج مقلب دوت كوم


      و هنا قرائي الأعزاء وصل ارتفاع الضغط ببابا حدا لم تشهده البلاد من قبل و قام و هو الذي يبلغ طوله 170 سنتي و عمره 62 سنة بحمل البيه العريس المترين و نص ده هيلا بيلا من الصالون لباب الشقة و زقله ع السلم و سمعناه
      بيتدحررررج دحرررجه رزيييينة جددددا



      و العاقبة عندكم في المسرات


      ونكمل بكررررررررررررررره



      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ



    • أنا مش صفر ع الشمال



      مجتمعنا الحلو العسل ده بوشين ....قديمه يعني مش جديده..شفتوا أي تجمع عائلي موجود فيه ولد و بنت صغيرين؟؟ اول حاجه بيقولوها للولد ايه ..عايز تطلع ايه يا حبيبي لما تكبر..نص العيال المفترية بتقول ظابط و اللي عنده وعي شوية يمكن يقولك رئيس جمهورية ..جيل المستقبل بأه يا سيدي عنعمل ايه؟...طب و البنوته الصغيره بيقولولها ايه؟؟؟...نجوزك حماده يا سوسو لما تكبري ..والا تتجوزي ابيه خالد؟؟...تبص البت بغباء كده و تقولهم ..أناهاتجوز بابا ..و الكل يتفتح في الضحك و يخلص الموضوع على كده

      و تطلع البت من صغرها يجيبولها عروسة ..تسرحها و تلبسها الفرحه و تزفها ...و اي بنت في اي مجتمع تلاقي اول لعبه نفسها تلعبها ...عروسة و عريس !!! بالمعنى الطفولي مش بتاع الجامعات الخاصة و الورق العرفي


      و تمشي البنت في سلك التعليم و كل اما تنجح في مرحلة ما يقولولها ..مبروك عقبال مانشرب شرباتك...وعقبال عدلك يا حبيبتي ..و لما تيجي تستشير حد في الكليه اللي هتدخلها بيبقى الرد الموحد ...يا ستي ماتشغليش بالك ..هي البنت آخرتها ايه غير بيت جوزها


      و تفضل البنت تتشحن تتشحن طول حياتها على ان الشئ الوحيد المتوقع منها في الحياة انها تتجوز و تجيب عيال.....طب و لو ماحصلش


      شوفوا معايا التلت حوارات دي
      م1:هو انت معاكي ايه دلوقت؟؟
      م2: معايا جوزين غوايش و ماشاءالله
      م1:لأ يعني معاكي عيال ايه
      م2: ل انا لسه ماتجوزتش
      م1: يا عييييييني
      ---------------
      بيئة تانية و مستوى تاني
      م1: وانت معاكي ايه دلوقتي
      م2:معايا ماجستير و باحضر في الدكتوراه
      م1:لأ قصدي معاكي عيال ايه؟
      م2: لأ انا لسه ماتجوزتش
      م1: يا عيييييييني
      ---------------
      بيئة تالته و مستوى تالت
      م1: وانت معاكي ايه دلوقت
      م2: انا معايا شيروكي 4*4
      م1: لأ قصدي معاكي تشيلدرين ايه؟
      م2:نو ..أنا لسه ماتجوزتش
      م3:أوه ماي جود ..هاااانييييي


      هو هو الحوار في كل المستويات ..ولا يوجد اي نجاح في اي مجال يقدر يحل محل الزواج بالنسبة للبنت الشرقية...طب و اللي مش لاقيه و اللي فاتها القطر و اللي بارت على رأي الناس مابتقول ...يبقى مالهاش لازمة ..تروح تولع في نفسها يعني؟؟
      هي غالبا ما بتبقاش مستعده لا نفسيا و لا علميا و لا اقتصاديا لللحظه دي ..كل الناس بيقولولها هتتجوزي يعني هتتجوزي ..و ساعة لما مايحصلش .مابتلاقيش حواليها غير نفسها و بس


      بعد مالنسبة زادت و بقى عدد اللي لسه قاعدين بالملايين..لازم كل البنات يحبوا نفسهم و يدوروا ع النجاح في كل الأماكن و يعيشوا حياتهم على انها حياتهم مش على أساس انها تتر لمسلسل لسه مابتداش


      ولازم المجتمع يبطل يحصر البنت في دور العروسة و بس ..لأنه وقت الجد مش هيقدر يعلها حاجه و هيبقى هو اللي جنا عليها لأنه فهمها ان ده الطريق الوحيد و مافيش غيره..و هتحس ساعتها ان مالهاش لازمه و انها صفر ع الشمال و هتيجي تعمل بلوج زيي كده و تقعد تشتكيلكم


      وانا من هنا بقولها ..لو ماحصلش ..لو ماتجوزتش وما جبتش عيال و ماقدرتش اتبع خطة المجتمع ...أنا برضه ليه شخصيتي و حياتي و مش هابقى أبدا ......صفر ع الشمال
      العَيْـشُ مَاضٍ فَأَكْـرِمْ وَالِدَيْـكَ بِـهِ والأُمُّ أَوْلَـى بِـإِكْـرَامٍ وَإِحْـسَـانِ وَحَسْبُهَا الحَمْـلُ وَالإِرْضَـاعُ تُدْمِنُـهُ أَمْـرَانِ بِالفَضْـلِ نَـالاَ كُلَّ إِنْسَـانِ