يالله باسمك أبدأ .. ورحمتك أرجو
ربى صلى على المختار محمد ، وعلى من تبعه
وبعد ،،،
بدايةً شىء جميل إنك تكون وسط ناس بتحبهم وبيحبوك
وأنا واحد من الناس كنت مقرر إنى يوم ما أمشى مكنتش هاسيب أى توبيك مكتوب فيه إنى ماشى ولو حد عمل توبيكات إنى ماشى كنت هاطلب حذفها
لأنى أحب أمشى فى هدوء بس رجعت فى قرارى وأنا اللى هاعمل التوبيك بنفسى
عشان أشكر الناس الجميلة اللى عاشرتها على مدى سنتين وثلاث شهور
يمكن انا مش أول ولا آخر واحد يقول إن الفترة اللى قعدها هنا من أجمل الفترات الى بيقضيها فى اى حتة فمش محتاج إنى أقول كدا
أنا عامل التوبيك دا عشان أى حد زعلان منى .. أطلب منه أنه يسامحنى
وأى حد أنا زعلان منه بجد والله انا مسامحه ومن جوايا مش ظاهراً بس
يعنى أحب أفتكر أى حد بالخير وأى حد يفتكرنى بالخير بردو
وأحب أوجه 3 رسايل لــ 3 جهات معينة
أول رسالة لمرتادى المنتدى الإسلامى .. مش هاقول أأمل وأرجو والكلام دا .. لأ هاقول أترجاكوا حافظوا على النسق اللى ماشى بيه المنتدى والشكل العام اللى هو فيه الآن واللى أنا تعبت فيه كتير جداً عشان أغير فيه عادات مكنش ينفع تكون عندنا والحمد لله انا واثق إنى أقل عضو عندى قادر أنه يقود منتدى لوحده
ودا مش كلام لأن مش اى حد فى الفترة اللى انا مسكت فيها كان ينفع ينزل توبيك اسلامى من غير مايكون التوبيك جدير بإمتياز صاحبه
وتوبيك خطبة الجمعة لو إنتوا بتحبونى بجد مش عايز أدخل يوم كزائر وألاقيه مرت عليه جمعه مش حد نزل فيها خطبة
الحمد لله الجمعة الماضية التوبيك أتم عشرين خطبة يعنى عشرين أسبوع .. يعنى تعب حرام يروح ويترمى لعدم المتابعة
بس اانا سايب ورايا أخوة وأخوات هايكملوا المسيرة ..
والرسالة الثانية لمرتادى الروابط اللى انا تعبت فيها انا وأبناءها عشان نوصلها بالشكل دا واللى كان الكل بيتريق عليا لما عملتهم ويقول دا أكيد مجنون والحمد لله الروابط دلوقتى من أنجح المواضيع بالمنتدى واللى كنت مراهن عليهم واللى أبناءهمـــ وصلوهم للشكل الجميل دا .. بردو أرجوكمـــ مش تضيعوا صفو نجاحهم بسهولة وبردو أنا متأكد من أنكوا أدها
الرسالة الثالثة والأخيرة للمنتدى كله .. صدقونى مش هاينفعكوا غير إنكوا تكونوا روح واحدة .. ومش كل ما ننقص واحد تكبروا دماغكوا وكل واحد يخليه فى نفسه وبس ومن النقطة دى أحب اعرفكوا حاجه انا واحد من الناس بحب المنتدى جداً وتعبت فيه جداً عشان أوصل للى انا فيه وكان كل وقت حد بينقص كنت بكلمه هو بس واحاول أقنعه هو بس .. بس بردو كنت مقصر
ولفت الأيامــ وأنا اللى هانقص انا كمان وهاتلف الأيام وكل واحد مننا هاييجى يوم وينقص .. ياريت كله يعمل لليومــ دا ومش يفرط فى حد بسهولة زى الفترات اللى فاتت عشان محدش يفرط فيه بسهولة
وأخيراً لو كان حد زعلان منى أنا بتأسفله أمامـــ الجميع أهو
ولو انا زعلان من حد والله انا ماشى ومش فيه جوايا أى زعل من اى حد
وبدون ذكر أسباب انا ماشى ليه .....
أنا طلبت سحب إشرافى إمبارح والنهاردة مااشى خالص وبكدا يكون دا آخر توبيك ليا فى المنتدى وتقريباً آخر مشاركة
وبردو بنفس التنسيق بتاعى
ودلوقتى
دعونى الآن أرحل .. وألحَق برجالٍ سبقونى
فأنا لستُ بآخرِ راحلٍ .. وغداً رجال غيرى يتبعونى
: 
: 
: