في يوم من الايام وفي سالف العصر والاوان كان هناك بنت اسمها ايموم وكانت تتصفح موقع جماعة الحاسوب وفجأة شافت اعلان عن دورات صيفية يريدوا يسووها وكانت الدورات في تعليم السي بلس بلس C++ والجافا JAVA ( لغات برمجة) وهية ما صدقت وبالمرة لبست نعالها وركض عالكلية عشان تسجل وبعد العناء والتعب والمشقة وصلت الكلية وكان تقولهم " تراني اريد اسجل في الدورة مال الصيفي اللي باغين تسويوها " وكان تجيها الصدمة القوية ويقولوها " اختي التسجيل عن طريق النت " المهم رجعت السكن وراحت النت وسجلت وبالمرة خلت ربيعتها تسجل معها عقابا حلها لا تسألوا ليش ما اعرف بس كانت تبا تعق حرتها فحد وما حصلت غيرها

المهم ... كان في الاعلان انه لازم عالاقل يكون عندنا فكرة عن اللغة اللي نريد ناخذ الدورة فيها ، من ناحية السي بلس بلس ما عندنا مشكله مدبرين حالنا ماخذين ثلاثة كورسات فيها لكن الجافا اللي عمرنا ما تعلمناها . فكان القرار التالي " اول ما اخلص امتحانات واروح البيت بجلس اربع وعشرين ساعة اتعلم – طبعا كان مجرد كلام لا تصدقوا اي شي –

بدت الاجازة ورحت البيت وبديت انفذ القرار ... اول شي سويته اني رحت عند العم جوجل ونزلت كل كتاب يتكلم عن شي اسمه جافا ، وبدينا نتعلم الكتاب الاول "موه هاوه ، مو يقول هذا " الكتاب الثاني " أها حركات واللة "... الكتاب الثالث " الجافا سكربت JAVA Script " - " لحظة هذا غير كيف كذيه " طبعا عقلي الصغير ما ساعدني فرحت عند عمي جوجل مرة ثانية عندها اكتشفت انه الجافا سكربت لغة ثانية غير عن لغة الجافا العادية قلت ما علية شكلها حلوة هذي اللغة نتعلمها ماعندنا مشكله ما دام فاضيين .

في هذي الفترة تدخلن خواتي التوأم الشريرات " وش تسوي ؟ وش هذا ؟ حالموه تسوي كذيه؟ " وتخريب منيه وازعاج مناك . انا: " وش تبن خوزن عني خلني فحالي " ... طبعا ما عجبهن الوضع اني ما خبرتهن وش جالسه اسوي فراحن عند امي وسمعت وشوشات في اذنها ، شوي وكان اشوف امي تحولت وكان تنازعني " مو تسوي انتيه على ذاك الهارتوب اربع وعشرين ساعة مو تدخلي هاه .. تدخلي مواقع وشات ؟؟ " خواتي التوأم من وراها يضحكن ضحكات الشر . انا :" اماه والله ما داخله مكان ها شوفي جالسه اتعلم ادرس ادح والا بعد ما تبونا ندح " – ملاحظة ترا لزوم كل قصه انه يكون في حد شرير وحد طيب وبما اني انا اللي اكتب الحكايه فطبعا انا الطيبه وخواتي التوأم الشرير-
المهم بعد ما اثبتت برائتي من التهم قررت اني ارجع اكمل . ...

وانا اتصفح في هذا الكتاب كان اكتشف ان الجافا سكريبت لغة لتطوير صفحات الويب ، انزين اولا انا اصلا ما اعرف كيف اصمم صفحات ويب عشان اطورهن ... تشاورت انا ومخي وقررنا انه نتعلم كيف نصمم صفحات ويب. انزين رجعت مرة حل عمي جوجل وقاللي انه عشان اصمم صفحات ويب لازم اتعلم لغه الهتمل HTML ورحت ونزلت كم درس وبدينا نتعلم في الهتمل ... وشوية وانا اتمشى مع عمي كان اشوف كتب عن الشبكات وادارتهن وما هان علي اخليهن ونزلتهن بالمرة وقلت اشوف عن ويش يتكلمن - ما زين بعد عن الحلال والحرام- .انتهى بي الامر اني سويت شبكة اتصال محلية بين كمبيوتري وكمبيوتر البيت وجلست انقل الافلام والاغاني بينهم .


الخلاصة لحد الحين تراني ما تعلمت الجافا

emom
5/6/2009