وجهة نظر - جديد مملكتك

Warith AL Maawali · 15 يناير 2010، 21:10

السلام عليكم...

اكيد كلنا بنحب او مرينا بقصة حب قديمة سواء نجحت قصة الحب دى او فشلت المهم اننا حبينا قبل كده وموضوع الحب ده والكلام فيه بقة واخد كل حياتنا وكل واحد بيتكلم فى الحب وبيقول رايه وناس بتقول حلو وناس بتقول وحش . وناس بتقول بينجح وناس بتقول بيفشل . وناس بتقول الحب غير الجواز يعنى الحب حاجة والجواز حاجة تانية . والى بيحب بيقول الحب ده احلى حاجة فى الدنيا ؛ والى فشل فى حبه بينصح الناس بأنهم ميحبوش لان الحب ده شىء فاشل ووحش. الله اعلم ... والله يا جماعة كلامكم ده فى منه الصح وفى منه الغلط .

وعلشان نمنع اللبس فى الموضوع ده لازم نفرق بين حاجتين مهمين بناء عليهم كل واحد منا هيعرف طريقه وهيعرف نهايته وكل واحد حر فى اختياره وقدامه الطريقين لو غاوى عذاب يختار الطريق
الغلط ولو عايز يرتاح يختار الطريق الصح .

الحب الحقيقى :

هو الحب الصادق الى مفيش فيه حد بيكدب على حد وكل واحد فاهم وعارف التانى كويس وعارف الى ليه والى عليه الولد يكون صادق مع البنت جدا بيحبها عشان عايزها زوجة وام وعشان عايز يكون
معاها مستقبل ويكون بيحب فيها جوهرها وقلبها مش شكلها او طريقة لبسها او كلامها او فلوسها او لانه عايز حاجة من عيلتها او جواز مصالح لان ده بيكون لعب مش اكتر وعمر الحب ده مبينجح وبيفشل الجواز على طول والحب ده بيتقلب لكره ؛ ويكون حاطط ربنا قدام عيونه ويعتبر ان البنت دى اخته وميرضاش عليها حاجه وحشة ولازم يعرف ان البنت دى بشر زى كل الناس يعنى كل حاجة بتحصلها هى مش ملاك دايما صورتها حلوة لا طبعا دى بتروح الحمام وبتعرق وشعرها بيتنكش ومش بتحط ميكب وبتقوم من النوم زى مكل الناس بتقوم لازم تغسل وشها واسنانها وتاخد دش عشان تكون حلوة لكن لو حط فى دماغه انها زى القمر كده دايما هيتصدم بعد الجوازوهيحس ان مش هى دى الانسانه الى هو حبها وانها مبقتش تهتم بشكلها زى الاول ويحس ان جوازه فشل ويبدأ الكره بينهم.

اما البنت فلازم برده تكون بتحب الولد ده عشان عايزاه ليها زوج ولقيت فيه الراجل الى بتتمناه وتكون
بتحبه لشخصه مش علشان شكله او فلوسه او لانه بيفسحها كتير وعمال يجبلها فى هدايا ولازم تعرف برده انه مش دايما قوى كده لكن ده انسان زينا بتيجى عليه لحظات ضعف وبيضعف وبيبكى وبيحتاج لحد ياخد بأيده ويقويه ولازم تكون هى الراجل فى مواقف كتير هتقابلها ومتزعلش منه وقتها ولازم تعرف ان الحياق قبل الجواز تختلف عنها بعد الجواز قبل الجواز المسؤولية بسيطه عشان كده بيفسحها كتير ويجيبلها فى هدايا كتير لكن بعد الجواز المسؤولية بتكبر وبتكون فى حجات اهم من الفسح والخروجات ولازم تعرفى انك لو بتحبى الانسان ده عشان فلوسه فانتى غلط وفاشلة لان الفلوس ممكن تضيع فى اى وقت ومتلاقيش حاجه غيره يومها هيكون موقفك ايه طبعا هتسبيه وده مش حب لكن الحب الحقيقى انك اول واحدة تكونى جنبه لو حاجة زى دى حصلت وفداه فلوس الدنيا كلها اهم حاجه بالنسبالك هو ولازم تعرفى انك هتقابلى صعوبات فى حياتك انك مش كل يوم هتلاقى اكل نضيف وفراخ وحمام ولحمة لا طبعا هتلاقى فى يوم عدس وفول وجبنة قديمة واوقات عيش حاف
ولو بتحبى بجد هتبقى مبسوطه وراضيه هيكون كفاية عليكى انك تنامى فى حضنه فى اخر الليل وتحسى بالامان اعرفى ان الجواز ده مش جنة لكن مسؤوليه ولازم تكونى قدها ولازم حبك ليه يكون اقوى من اى مشكله هتقابلكم ولازم تحلوها بحبكم وصبركم ودعائكم لربنا وطول مانتى حاطه ده فى دماغك هتحبيه وهتستحمليه وهتعيشى معاه العمر كله.

هو ده الحب الى هيعيش بعد الجواز وهيكبر وهيتحدى الدنيا دى كلها وهتكونو اسعد وارضى ناس فى الدنيا ووالله كفايه عليكم من الدنيا انكم تكونوا مع بعض وفى حضن بعض وحاسين ببعض وراضيين
بكل الى كتبهولكم ربكم سبحانه وتعالى وتحمدوه على كل حال.

الحب الكاذب :

هو حب اللحظات والتسليه يعنى الولد بيحب البنت عشان الحب ده بيسليه دلوقتى لكن مش حاطط فى دماغه ولا مسؤوليه ولا جواز والبنت برده بتحب عشان تتدلع وتعيش لحظات حلوة ومع اول واحد
معاه فلوس يتقدملها تقول للولد ده مع السلامه .

هو ده الحب الفاشل
الى هو مش حب اساسا الى بيخلى الناس تكره الحب وتبعد عنه.

ودلوقتى بعد معرفت الطريقين يا ترى هتعيد نظر فى حبك وهتعرف كويس انت اى حب فيهم وتختار
الطريق الصح ولا هتكمل فى الغلط . براحتك دى حياتك بس عايزة اقولك اتق الله فى نفسك وفى غيرك لانه سبحانه وتعالى عذابه كبير اوى.

ونصيحة منى لاى اتنين حبهم صادق واتجوزوا او هيتجوزوا قريب بقولكم ياريت متدخلوش حد فى
حياتكم ابدا وخلوا حياتكم ليكم وبس انتو الى تشكلوها براحتكم ومهما تكون بينكم مشاكل ياريت متطلعش من بره باب بيتكم حتى لامك او لامه لانهم لو اتدخلوا هتكون النتيجه مش كويسه ابدا وكمان جوا بيتكم محدش شايفكم يعنى تستحملوا بعض اوى وتعيشوا على قدكم وتداووا مشاكلكم وتشكوا لبعض همومكم وتحتووا بعض كويس اوى لانكم ملكمش غير بعض لكن قدام الناس لازم تبينوا انكم اسعد اتنين فى الدنيا وانكوا مش ناقصكم حاجة ابدا وان كل حاجة هو جايبهالك وان انتى عملاله كل حاجه هو عايزها . لو عملتوا كده فانتوا فعلا بتحبوا بعض جدا وهتكونوا اسعد زوجين طول العمر ومتنسوش زكر الله وشكره عشان يقف معاكم ويزيدكم ويهنيكم كما قال سبحانه " ولئن شكرتم لاذيدنكم" صدق الله العظيم .

المصدر : مدونة مملكتك

مشاركة