صفحة جديدة 1



النجاح ده أجمل شيء في الدنيا وهو الفرحة إلى كلنا بنحلم بيها ودلوقتى إحنا خلصنا الامتحانات ومستنين النتيجة وقلبنا بيدق من الخوف بس خلونا نسيبها على ربنا وندعى بالنجاح وبإذن الله كلنا هننجح .

طبعا تعبنا أيام الامتحانات ومكناش بنام ولا بناكل ولا بنشرب وعشنا في توتر عصبي شديد وكنير مننا من شدة التوتر أصيب بمرض جسدي بسيط طبعا بعد الشر علينا كلنا من اى مرض وحش.

ومع نهاية الامتحانات وفرحتنا إننا خلصنا زادت فرحتنا بفوز منتخب مصر إلى رفع راسنا لفوق قدام الدنيا كلها وفرحنا بجد فرحة متتوصفش فرحة خلت قلبنا يخرج من بين ضلوعنا ويرفرف فوق في السما فرحة لمصر.

ونجاح ورا نجاح وفرحة ورا فرحة و2010 سنة سعيدة علينا كلنا إن شاء الله ويارب ربنا يكمل فرحتنا بنجاحنا ونجاح كل المصريين في الامتحانات يارب.

ولازم يا جماعة نستغل الأجازة دي لأنها عبارة عن وقت فراغ كبير أوى ولو سلمنا نفسنا للفراغ ده أكيد هودينا لاماكن غلط وميصحش إننا نروحها يعنى لازم نفكر بطريقة ايجابية اتر عشان ننجح مش بس في الامتحانات ولكن ننجح في حياتنا كلها وده هيكون بالتفكير السليم والعمل الجاد وشوية جهد وتعب.

ولازم نتعب يا شباب عشان نلاقى بعد التعب راحة كتير مننا في آخر سنة دراسية في حياته كلها يا ترى فكرتوا بعد مهتخلصو هتعملوا ايه؟

كلنا بنحلم بشغل كويس وعروسة بنت حلال وبيت حلو وأسرة نكونها ونعيش في وسطها العمر كله وربنا يدينا كلنا علشان كده لازم نتعب عشان نلاقى ده كله ولازم نحط خططنا من دلوقتى ونحط لنفسنا خطوات هنمشى عليها عشان تكون حياتنا واضحة وتحقيق أحلامنا متاح بس أهم خطوة قبل كل ده "ربنا" لأنه هو وحده سبحانه وتعالى إلى هيحققلنا أحلامنا وهو كمان إلى هينجحنا.

تعالو نحط في دماغنا حاجتين مهمين نعملهم الأجازة دي:

أول حاجة نقرب من ربنا ونبدأ نصلى وواحدة واحده هناخد على الصلاة وهنتعود عليها وهتبقة جزء اساسى من حياتنا وبعد الصلاة نتعلم ذكر الله ونحفظ أذكار الصباح والمساء وندعى بيها ربنا ونبدأ بيها يومنا وننهيه كمان وإيه رأيكم لوختمنا القران في الأجازة ده هيكون أعظم حاجة نعملها ومفيهاش حاجة لو قمنا بالليل نصلى قيام وتقرب ومغفرة ولازم كلنا نفتكر إن باب التوبة مفتوح وان ربنا سبحانه بيتنزل إلى السماء الدنيا كل يوم وينادى هل من سائل فأعطيه هل من مستغفر فأغفر له هل من داع فأجيبه ؛ عايزين ايه بعد كده تانى إحنا فاضين دلوقتى تعالو نكسب في كل ثانية حسنة وننور اجازتنا بنور الله إن شاء الله.

تانى حاجةكل واحد مننا يجيب ورقة وقلم ويبدأ يرسم أحلامه واهدافه ويحلم براحته ويبدأ يحط خطوات وقواعد والتزامات لتحقيق حلمه ويعرف هو عايز ايه ويبدأ دلوقتى حالا في تحقيق أحلامه وخطواته وربنا معاه يارب ووالله يا شباب مشوار الألف ميل بيبدأ بخطوة وبس قولو يارب وربنا معانا.

وصدقوني يا جماعة الحياة حلوة وجميلة بس إحنا نحبها ونعيشها صح يعنى نعيش شبابنا من غير منغضب ربنا ونعيش ونفرح من غير منكون مليونيرات البساطة حلوة والوسطية من دينا وتعالو نعيشها صح إحنا كبرنا وبقينا قد المسؤولية وإحنا رجالة بجد وجدعان وحمل جبال ومن قلبي بدعيلنا كلنا يارب ننجح ويارب وفقنا.





المصدر : مدونة مملكتك