مناشدة المطر - جديد omanizer

    • مناشدة المطر - جديد omanizer





      نعم يا اخواتي واخوتي : انها المزاريب ، وانه المطر

      ورغم روعة الصور إلا انني سرقتها خلسة اثناء مروري في احد الممرات في جهة عملي ، فأنا وكما يعلم المقربون أعمل في مكتب جميل بلا نوافذ ، انه اقرب ما يكون للثلاجة ، فالجدران( ناقعة البياض بالعمانية الدارجة ) ( او فاقعة البياض بالفصحى الفصيحة ) .. إنني مقبورة بالحيا يا اصدقائي ، والله انني اضررت ان استأنس بدمية صغيرة لتلون شيئا من هذا البياض المميت ، وإنني ذهبت إلى " مقهى سيراميك " وقمت بتلوين كوب قهوة ملئ بشتى الالوان من مختلف الاصقاع وأهديته لنفسي ومستحمله ضحك زميلاتي وزملائي على الكوب ويعلقوا عليه يقولوا :" عاد ما مهرجان " وانا متحمله كل التعليقات لأنه ما عارفين الي أعانيه ، ولونته بالفرشاة وبعدين اخذتني الحماسه وقمت الون بأصابعي فقط لأبتهج واعلن انتصاري على هذا التابوت الذي اقذف نفسي بداخله كل صباح .

      والله اكسر الخاطر ،، واريد شباك صغيرون ، اشوف المطر واتأمل الريح تنكش خصلات الاشجار واتخيل الاشخار تصرخ في وجه الهواء : " اففففف خربت شعري " ..

      اريد شباك صغيرون ..

      وانني هنا اناشد مديري اذا في يوم من الايام قرأ هالكلام اقوله اني اريد شباك صغيرون ، ما تخليها في خاطري ارجوك ، صح انك دايما تكسره وتدوس عليه بس الا الشباك ، الشباك الصغيرون رجائي الوحيد في الحياة ، واخصموه من الراتب ، اعرف حتى لو اقتنعت بيجيك هذك الشحيح مدير المالية ، وبيقول ميزانية ماشي ، وانت ما تعرف انه حدد علينا نشرب كوب شاهي بالحليب ( مرة وحدة في اليوم ) وشاي سليماني ( مرة وحدة في اليوم) وقهوه عمانية مرة بعد . واذا كنت من الي يجيبوا ( MUG ) مثلي بيعطوك نص كوب شاي بس . اعرف انك يامديري العزيز ماعندك خبر ، بس هالشحيح كل ما نقوله : " زيدنا نص كوب " يقول انه هذي اوامر المدير ، وما نقدر نقول شي كأنه حاطنك عظمة في حلوقنا - صدقني كأننا في ميتم وكأني واقفة مثل ايش اسمه ياربي - نسيته الي في رواية تشارلز ديكنز من اسمه ايوا هذاك المسكين الي في الميتم ( أوليفر تويست ) والله صدقني كأننا واقفين طابور نترجاهم يعطونا شاي ، وكل هذا عشان يوفر في الحصالة قصدي الميزانية اعذرني يا مديري . كم بيوفر من اقتصاد الشاي والقهوه والله كأنه يوفر في حصالة بس لا حول ولا قوه صابرين ، وانا ما اريد شي بس اريد شباك صغيرون .

      وفي الختام اهديك اغنيه :
      " وحياتك عندي لو كان لي عندك خاطر .. لتراجع قلبك وتفتحلي شباك الصغيرون "


      الصور :
      التقاط : مسقطية الهوى
      الموقع : المكتب الصندوقي " التابوت " كما يحلو لي تدليعه :) وبعض المناظر للمزاريب من الممرات البعيدة عن التابوت .






      المصدر : مدونة omanizer


      ¨°o.O ( على كف القدر نمشي ولا ندري عن المكتوب ) O.o°¨
      ---
      أتمنى لكم إقامة طيبة في الساحة العمانية
      وأدعوكم للإستفادة بمقالات متقدمة في مجال التقنية والأمن الإلكتروني
       رابط مباشر للمقالات هنا. ومن لديه الرغبة بتعلم البرمجة بلغات مختلفة أعرض لكم بعض
       المشاريع التي برمجتها مفتوحة المصدر ومجانا للجميع من هنا. تجدون أيضا بعض البرامج المجانية التي قمت بتطويرها بذات الموقع ..
       والكثير من أسرار التقنية في عالمي الثاني       Eagle Eye Digital Solutions