ما هذا الذى يحدث في البلد ؟ الاقباط ضد القضاء ، المحامين ضد النيابة ، العمال ضد اصحاب الاعمال ، محامين ضد كتب و تراث ادبى مزارعين ضد الحكومة ،شباب ضد كهول ، احزاب ضد جماعات اجيال ضد اجيال منقبات ضد جامعات تجار ضد مستهلكين ، محتكرين ضد الشعب ، ما هذا اشعر ان البلد على شفا انفجار كل جماعة ضد الاخرى و كل جماعة تتصور انها الوطن و كل جماعة تمتلك الحقيقة المطلقة و الفضائيات تنفخ في الاحداث و كل منها تدعى انها قصدها خير و الخناقات في الشارع و على الفضائيات سواء و العالم كله يشاهد احوال ام الدنيا و هى تشرشح و تدعى الفضيلة لما واحد خد من خيرها كتير و هو يقول ان اخواته المصريين اعتدوا على ضيوفهم و اصابوهم و لما مصرى يشوف ان بيع الحديد لليهودى اجدى له من بيعه لشباب المصريين و لما مصرى يسيب كل حاجة و يقول ان الف ليلة و ليلة هى سبب مشاكل مصر الحديثة و لما مصرى يروح يرفع قضية عشان يجرد عشرات الالاف من اخوانه المصريين من جنسياتهم بدل ما يشوف اصل المشكلة و ليه طفشوا من البلد و لما مصرى يضرب اخوه المصرى احتماءا بمنصبه و سلطته لحظة فوران غريبة تمر بها البلد لكنها ليست الاولى فهذه كلها سمات عصور انحطاط عديدة مرت بالبلد لا يقول احد ان نص الكوباية مليان و ان الكبارى كترت و المصانع مليانة و تجيبولى اعلان فيه ميت بدلة رايحة تدلى بصوتها في الانتخاب لأن اربعين مليون جلبية لم تذهب الى الانتخاب مصر مش هى هذه الكريمة التى تظهر على الشاشات و تقول ان الدنيا ربيع و الجو بديع بل انظروا الى العفارة التى تملا سماء الوطن و تتغلغل كل يوم دافعة الوطن الى الاختناق


المصدر : مدونة أصوات