( إهداء لطلبة الثانوية العامة المتابعين للمدونة حتى في ايام اختباراتهم ، والذين بسببهم اجلت نشر هذا الجزء ، لكي لاينشغلوا بمتابعة اي شيء عدا مذاكرتهم . الف مبروك للجميع وخصوصا اختي الصغيرة فرصودة جابت 97.8% والأخ الصغير الذي لم تلده امي فرصود الغافري بنتيجة 87% ... والف مبرووووك لكل الناجحين )



نواصل :

أستمرت الحرب النفسية لأمي بنت محمد و نجحت في التأثير علي فأصبحت حساسه وتعبت من الحياة .



ودارت الايام ومرت الايام ما بين بعاد وخصام </strong></span>


وداارت الايام


تيرااا رااا ومرت الايام تيراااا را اا





ومرت الايام ،، ودق الباب ودخل شخص غريب ، و انا وافقت . واهلي : انجلطوا في البدء . وأنقلبت الآية وانا هالمرة سألتهم : جيبولي عيب واحد فيه وانا برفضه .


اكيد اهلي : اخذوا 4 اشهر يسألوا عنه . 3 اشهر راحة من تعب التقصي ، و شهرين يقنعوني اغير رأيي وارفض بدل ما اتزوج واحد غريب ! ( الي ما يعرف عيلتنا بعّرفه عليها: مفهوم الغريب : اي احد مامن العيلة اي مامن طرف الاب او الاب هو غريب ، ويشمل لفظ الغريب كذلك اي شخص ليس مسقط او ليس من المنطقة التي تنتمي لها عائلة والدتي بنت محمد) .


المهم مرت الايام ودارت الايام ، واهلي ما حصلوا اي عيب يذكر سوى انه " غريب " ويستاهل حد يطلعله عينه مدام بغى يشامجنا .





شروط الاهل :


- بيبنى بيت او يشتري بيت بنتنا ما تسكن فشقة ايجار .


- مهرنا 10 الاف غير المهر و الشبكة والساعه والخاتم .


- ما نقبل اي خطوبة الا بعد استلام تقرير " فحص ما قبل الزواج " !!!!!!!!!!!!


وهنا كنت بنجلط طبعا ، لأن هذا الشرط ما اشترطوه على اي واحد من الاهل بس ليش انه " غريب " بيفحص هالفحص على عينه ورجله على راسه .


اكيد بهذي المناسبه السعيدة ، قرأت مسقطية الهوى عن امراض الدم واشتركت في جمعية امراض الدم الوراثية عشان اتمهد نفسيا وأمؤمن بأهمية إجراء الفحص لأني اخاف من الإبر .


رحت مع امي واخوي و"الولد الغريب " كما تسميه الوالده ، واخذه اخوي بعيدا عن فك والدتي المفترس ، وجلسوا في قسم انتظار بعيد عنا . دخلت اسوي الفحص ، بس سويت " حفلة " أستهليتها بموال : عااااااااااااااااا عااااااااااااااااااااا ما اريد الابرة ما اريد عاااااااااا


يحكي لي اخوي ان " الولد الغريب " فز اكثر من مرة من مكانه خوفا حين سمع صوت بكائي الشجي ، واخوي كان يجلسه في مكانه ويهديه قائلا :

عادي متعودين هي مسقطية كذاك ، الصياح ببيسه عندها ، استريح فمكانك ، كان بتقوم تفز كل ما بكت بتتعب واجد في حياتك .


بعد ماخلص الفحص جات الممرضة تسألني :

الي جاي يسوي الفحص زوجك؟!!!!!!! .


مسقطية الهوى " تتألم من الابرة وفيها غم من هالسؤال التي تتمثل فيه البغومية الحقة " ردت عليها :

تو لو زوجي بسوي فحص ما قبل الزفت ، ترا ناويين تزوج وهذي الي جنبي بنت محمد مطّينه عيشتي ، تريد نسوي هالفحص إلي انتي يالخسف ما عارفه انه فحص ما قبل الزواج وناويه تخترعي فحص خسف مثلك اسمه فحص مابعد الزواج . قرف يقرفكم من مشتشفيات وممرضات ، ما تعرفوا شي عااااااااااااا بعد كل هالعذاب وسحب الدم تسألني هذا زوجك !!!!!!!!!!!





اكيد تنتهي المشاهد هنا ، سيجري بعدها " الولد الغريب " الفحص . وسينتظر اهلي النتيجة بشغف ، وستطلع النتيجة الايجابيه ، وسيوافق اهلي على " الولد الغريب " بشروط اضافية اخرى ، هذا اذا ظل موجود وما غير رأيه .





في الختام ..


كانت هذه القصة من جزئين ، لأدعوكم الى الانضمام للجمعية العمانيه لأمراض الدم الوراثية عبر صفحتها في الفيس بوك هنا : http://www.facebook.com/group.php?gid=111964342177036

او متابعة المدونة الخاصة بالجمعية هنا : http://ohbda.blogspot.com



- أحذوا حذوي ورجاءا اي مقبل على الزواج يفكر بمستقبل عائلته ولا تلقوا بأنفسكم في التهلكة ، تجنبوا الامراض ان كان بإستطاعتكم ذلك .



المصدر : مدونة omanizer