رحلة تجديد رخصة القيادة جديد انسان نادر

Warith AL Maawali · 21 يناير 2011، 12:21

المرحلة الأولى: "نقطة البداية والصدمه"
بدأت الرحلة باني روحت على مرور الأميرية اللي انا تبعه، سألت فين مكان تجديد الرخصة وبعدين روحت للموظفة على الشباك،
وقولت لها عايز أجدد رخصة السواقة، قالتلي فين رخصتك القديمة وبطاقتك الشخصية، أديتها الاتنين، قالتلي هتجيب الأوراق دي:
- ملف قيادة
- شهادة مخالفات من مرور مدينة نصر (اللي في رابعة العدوية)
- شهادة بيانات من إدارة المرور اللي في التجمع الخامس
- شهادة باطنة

- شهادة نظر
- 1 صورة شخصية
- 2 دمغة طبية
- 2 صورة بطاقة شخصية
- شهادة فصيلة الدم (ليه معرفش)

المرحلة الثانية: "روح المصالح الحكومية"
أخدت بعضي وطلعت على مرور مدينة نصر بتاع رابعة، وكأني دخلت سويقه ومش فاهم حاجة في أي حاجة، سألت حوالي 9 أشخاص ما بين أمناء شرطة وموظفين الاستعلامات ومواطنين عاديين على المكان اللي بيطلعوا منه شهادة المخالفات دي كل واحد قعد يخترع لغاية ما اتخنقت من كتر اللف هنا وهناك وابتديت اتنرفز بقى وكأن الدنيا دي بقت زي خرم الإبره، فرجعت لواحد تاني من بتوع مكتب الاستعلامات.
قولتله: لو سمحت أنا عايز أعمل شهادة مخالفات ومعرفش أي حاجة في المرور هنا فعايز أعرف اروح فين واعمل ايه؟
جاوبني بمنتهى البرود: بره ع الشمال
قولتله : بره فين يعني، في بره شبابيك وفي مدخل للمكاتب، اروح ع الشمال فين بقى ؟!!!!!!
قالي: عند الشبابيك.
المهم خرجت وقولت انا اقف في أي حته وخلاص بقى وسلمت أمري لله طالما مكتب الاستعلامات مش عايز يفيدني
وقفت في شباك مكتوب عليه نيابة المرور، المهم ربنا كرمني وطلع انه هو ده الشباك الصح، قولت للموظف عايز اطلع شهادة مخالفات للرخصة دي، أخدها وقالي استنى لما تسمع اسمك
قعدت واستنيت لحد ما كشفوا على المخالفات، ودفعت لهم وأخدت حتة الورقة دي ومشيت.

المرحلة التالثة: "الكعب داير"
اخدت بعضي وروحت على التجمع الخامس، وده بقى كان أوسخ مشوار في الرحلة كلها، سألت أكتر من 30 شخص تقريباً طول السكة على المرور بتاع التجمع ده فين، وادخل في طريق غلط والف وارجع تاني ، لحد ما نص تنك البنزين خلص وانا خلصت معاه، لغاية ما ربنا كرمني ووصلت للمنفى ده.
دخلت اسأل شهادة البينات دي بتطلع منين، وروحت للموظف المسئول، طلب مني صورة شخصية والبطاقة، وقالي روح لمحمد بيه خليه يمضيلك الشهادة، روحت يمين وشمال ادور فين محمد بيه، لغاية ما عرفت انه في لجنة اختبارات القيادة، فضلت اسأل عليه لغاية ما الحمد لله ما لقيته وختمت الشهادة دي ورجعت للموظف تاني.

المرحلة الرابعة: "مشي حالك وسيبها على الله"
دورت على أي مستشفى أو حتى مركز طبي في السكة عشان اعمل شهادة الباطنة والنظر وفصيلة الدم دول، كانت الوقت دخل على العصر كده، فروحت مركز برضو في التجمع الخامس عشان أخلص من القصة دي مره واحده، دخلت وسألت لقيت ان كل الموظفين مشيوا، روحت عملت الشهادتين من الطوارئ، وللأسف مكانش معايا صور شخصية فروحت اتصور تصوير فوري في مول قريب ، المهم .. طلعت الشهادة واتختمت كمان وانا واقف من غير لا كشف ولا غيره ..
والله ده بلدنا دي .. بلد زي الفل !
للأسف المعمل كان قفل فاضطريت اطلع شهاده فصيلة الدم من حته تانية ، بس الحمد لله خلصت من شهادتين بضربة واحدة !

المرحلة الخامسة: "شكة الإبرة"
وانا في طريقي للبيت كان النهار قرب يخلص، فعديت على مستشفى كده في الزيتون طلعت منها شهادة فصيلة الدم واكتشفت والحمد لله ان فصيلة دمي A، ويمكن المشوار ده كان آخر مشوار فحسيت انه فعلاً زي شكة الإبرة بالنسبة ليا.

المرحلة السادسة (في اليوم التالي): "الرجوع لنقطة الصفر"
اخدت ملفي وطلعت على مرور الأميرية من تاني، ورجعت لنفس الموظفة وقولتلها: انا جبت أوراقي كلها أهي في الملف، خدت الملف وقلبت فيه وقالتلي هات استمارة تجديد رخصة باين وللا ايه من الخزينه.

وهي بتعملي الورق بتقوللي "أي خدمة يا أستاذ" وكررتها كذا مره، مش عارف بقى دي عايزة إكرامية وللا ايه.. أهي دي بقى أكتر حاجة بتخنقني من المصالح الحكومية اني مبقاش عارف الموظف ده عايز ايه... فخدت مني الملف وادته لواحد تاني عشان يراجعه وبرضو هو كمان ، عمال يقولي جمل من نوع "اي خدمة يا أستاذ" ، "احنا عاملين معاك واجب اهو" !!!
نفّضت .. وقمت رايح اتصور في الكمبيوتر ومضيت باستلام الرخصة في دفتر عجيب كده.
وأخيراً .... مسكت الرخصة بين إيديا وأنا حاسس إني ضيعت جزء من عمري في كلام فارغ !!!

خــتـام: استرجعت من 10 سنين لما كنت بجهز نفسي وأوراقي عشان أطلع رخصة السواقه لأول مرة، فاكر كويس اني متعبتش التعب ده كله ولا دفعت الفلوس دي كلها في رسوم ودمغات واستمارات، التعب الوحيد كان في امتحان الإشارات والسواقه حتى لما سقطت فيهم واستنيت 3 شهور للإعادة مكانش التعب كده.

سبحان الله .. يعني تجديد الرخصة أصعب من استخراج رخصة جديدة ..
مش انا قلت قبل كده إن بلدنا دي بلد زي الفل .. أي والله زي الفل

المصدر :انسان نادر

مشاركة