أقوال مأثورة (7) جديد انسان نادر

Warith AL Maawali · 21 يناير 2011، 12:21

- إوعي تستخدم أي تكنولوجيا جديدة تنزل في مصر من غير ما يكون عندك فكرة شبه كاملة ازاي بتستخدم.

- خللي عندك قناعة إنك طول ما انت بعيد عن القاهرة (العاصمة) سهل انك تلاقي الخير، وطول مانت فيها صعب انك تلاقيه.

- لما تلاقي حد من المسئولين في مصر بيقول كلام كويس، إعرف إن عكس الكلام ده هو اللي حاصل، أو على أحسن تقدير إنه مبيقولش الحقيقة كاملة.

- لما ييجي اليوم اللي تمشي فيه في شوارع مصر وتلاقي عربيتين عاملين حادثة، واصحاب العربيتين دول مش بيتخانقوا مع بعض، ساعتها بس تقدر تقول إن مصر اصبحت دولة متحضرة ..

- ولما يجي اليوم اللي تلاقي فيه سواق الميكروباص بيوسع السكة للملاكي علشان يخليه يعدي.

- ولما يجي اليوم اللي ماتلاقيش عربية كارو بحمار أو حتى بحصان ماشية في شوارع حيوية في القاهرة، إعرف إن مشاكل المرور في مصر اتحلت.

- أربعة حاجات متمشيش وراهم أبداً وانت سايق في القاهرة:
1- عربية كارو (خصوصاً لو سايقها عيل صغير)
2- مكروباص أو ميني باص فاضي وبيحمل ركاب
3- عربيات النقل وخصوصاً المقطورة أياً كانت حمولتها (زبالة أو رمل أوطوب وحجارة أو اسياخ حديد)
4- أوتوبيس مدارس ماشي في شارع جانبي

- لو مر عليك يوم ومعرفتش تلاقي فيه المواصلة اللي انت عايزها، إركب أي مواصلة وخلاص.

- الناس أصبحت من كتر زحمة العربيات، بقو بدل ما بيهربوا للشوارع الفاضية، بقو بيهربوا للشوارع الزحمة !

- المصريين من كتر ما بقو بيكرهوا الحالة اللي وصلت ليها البلد، بقوا بيتفننوا ازاي يشمتوا فيها ويظهروا أوجهها القبيحة بأي شكل حتى لو على حساب صورتهم.

- مصر كانت وهتفضل طول عمرها خيرها منهوب، سواء من أعدائها أو من أهلها.

- شعب مصرعنده إمكانيات ممكن تغير وتأثر في البشرية، لكن السر كامن في الشخص أو الأشخاص اللي بيديروا الشعب ويوظفوه صح لخدمة مصر.

- الشحات اللي في الشارع دلوقتي، بقي بيشحت عشان يشحن موبايله بكارت شحن.

!!!!!!!!

المصدر :انسان نادر

مشاركة