موقف إنساني وتصرف لا إنساني جديد انسان نادر

    • موقف إنساني وتصرف لا إنساني جديد انسان نادر


      كنت النهاردة مروح من الشغل، وانا راكب الأوتوبيس في طريقي للبيت وانا في الطريق لروكسي في تقاطع شارع الحجاز مع شارع ابو بكر الصديق وعند إشارة ميدان المحكمة، بالصدفة ببص على عربية من اللي واقفين إتخيلت بقطة موجودة تحت العجلة اليمين من ورا، في الأول إفتكرتها قطه لعبة وشبكت في عجلة العربية، لكن حققت فيها لقيت ان ذيلها بيتحرك !
      نزلت بسرعة من الأوتوبيس وجريت على العربية قبل ما الإشارة تفتح، والحمد لله لحقتها، لقيت العربية فيها راجل ومراته خبطت لهم على الشباك وقولتلهم يستنوا شوية، نزلت تحت العربية من ورا وبصيت لقيتها قطة حقيقية فعلاً وبتحرك راسها وعينيها وبتبص عليا.
      القطة كانت من نوع "شيرازي" لونها رمادي "زي اللي في الصورة بالظبط" وتقريباً اصحابها سربوها أو حاجة، لدرجة اني افتكرتها قطة لعبة من غزارة الفرو بتاعها.
      القطة كانت قاعدة تحديداً فوق قنطرة العجلة اليمين الخلفية، وفي مكان صعب الوصول ليها إلا بالنزول تحت العربة أو رفعها بالكوريك.

      فصاحب العربة نزل وقالي : في ايه ؟
      قولت له : فيه قطه قاعدة جنب العجلة
      طبعاً استغرب
      مراته قالت لي : ده إحنا طالعين المشوار من بدري
      فصاحب العربية نزل وسألني: فين؟
      شاورت له على مكانها فنزل وبص وشافها
      قال لي : طب أنا هقف على جنب

      طبعاً أنا خايف لحسن القطة بعد كل ده تقع أو تتفرم بين العجل، بس قولت يمكن عشان الإشارة والطريق ممكن يعمل أزمة، فتوقعت انه هيقف قريب على يمين الطريق أو حاجة علشان نحاول نساعد القطة المحاصرة دي.
      ففضلت ماشي ورا العربة على مهلي وكانت الإشارة فتحت، فوجئت لقيته طلع بالعربة ودخل شمال في شارع ابو بكر الصديق وكمل في طريقة وماشي       عادي جداً وبسرعة ولا كأني قولت له حاجة ! ، لغاية ما العربية اختفت بين زحام العربات.
      بقيت في حالة ذهول من برود تصرف الشخص ده، ولقيتني بضرب كف بكف وانا بقول : لاحول ولا قوة إلا بالله.

      بخلاف حالة الذعر اللي فيها القطة دي، فالمكان اللي هي قاعدة فيه ده درجة حرارته بتكون عالية نتيجة احتكاك تيل الفرامل واحتكاك الكاوتش مع الأسفلت مع سرعة دوران العجلة، يعني ممكن تكون درجة الحرارة بتلسع أو بتحرق جسم القطة مع كل متر العربية بتمشيه، أو تكون محشورة في مكانها والسوست بتضغط على جسمها في كل مطب.

      من كتر حالة الغضب والضيق اللي حسيت بيها، مشيت من ميدان المحكمة لغاية ميدان روكسي لغاية ما لقيتني تعبت من المشي بالذات مع الصيام والشمس اللي كانت مباشرة طول السكة.
      تخيلت لو موقف زي ده حصل في دولة أوروبية كان ممكن ايه اللي يحصل؟ لقيت إن المقارنة ظالمة (للدول الأوروبية طبعاً)
      العربية كانت ماركة رينو سيمبول لونها أخضر غامق موديل 2010


      قد كده الناس بقت ...؟!!!
      لا حول ولا قوة إلا بالله





      المصدر :انسان نادر


      ¨°o.O ( على كف القدر نمشي ولا ندري عن المكتوب ) O.o°¨
      ---
      أتمنى لكم إقامة طيبة في الساحة العمانية
      وأدعوكم للإستفادة بمقالات متقدمة في مجال التقنية والأمن الإلكتروني
       رابط مباشر للمقالات هنا. ومن لديه الرغبة بتعلم البرمجة بلغات مختلفة أعرض لكم بعض
       المشاريع التي برمجتها مفتوحة المصدر ومجانا للجميع من هنا. تجدون أيضا بعض البرامج المجانية التي قمت بتطويرها بذات الموقع ..
       والكثير من أسرار التقنية في عالمي الثاني       Eagle Eye Digital Solutions