إقلع غماك يا تور وارفض تِلف
إكسر تروس الساقية واشتم وتِف
قال : بس خطوة كمان ...وخطوة كمان
يا اوصل نهاية السكة، يا البير يجًف
عجبي


يا للي انت بيتك قش مفروش بريش
تقوي عليه الريح يصبح مفيش
عجبي عليك حواليك مخالب كبار
وما لكش غير منقار وقادر تعيش
عجبي


وانا في الضلام من غير شعاع يهتكه
أقف مكاني بخوف ولا أتركه
ولما ييجي النور واشوف الدروب
أحتار زيادة ... أيهم أسلكه؟
عجبي


أنا شاب لكن عمري ولا ألف عام
وحيد ولكن بين ضلوعي زحام
خايف ولكن خوفي مني أنا
أخرس ولكن قلبي مليان كلام
عجبي

يا باب أيا مقفول إمتي الدخول
صبرت ياما واللي يصبر ينول
دقيت سنين والرد يرجع لي : مين؟
لو كنت عارف مين أنا .. كنت أقول
عجبي