ياللي انت بيتك قش مفروش بريش / تقوي عليه الريح .. يصبح ما فيش / عجبي عليك حواليك مخالب كـــــبار / و ما لكش غير منقار و قادر تعيش
سمعت نقطة ميه جوه المحيــــط / بتقول لنقطه ما تنزليش في الغويط / أخاف عليكي م الغرق .. قلـــــت أنا / ده اللي يخاف م الوعد يبقي عبيط
بحر الحياه مليان بغرقي الحياه / صرخت خش الموج في حلقي ملاه / قارب نجاه .. صرخت قالوا مفيش / غير بس هو الحب قارب نجاه
فارس وحيد جوه الدروع الحديد / رفرف عليه عصفور وقال له نشيد / منين .. منين.. و لفين لفين يا جدع / قال من بعيد و لسه رايح بعيد
كرباج سعاده وقلبي منه اجلد / رمح كأنه حصان و لف البلد / و رجع لي نص الليل و سألني .. ليه / خجلان تقول انك سعيد يا ولد
كان فيه قمر كأنه فرخ الحمام / علي صغره دق شعاع شق الغمام / أنا كنت حاضر قلت له ينصرك / إشحال لما حتبقي بدر التمام
يا مشرط الجراح أمانة علـــيك / و انت ف حشايا تبص من حواليــك / فيه نقطة سوده في قلبي بدأت تبان / شيلها كمان .. و الفضل يرجع إليك
تسلم يا غصن الخوخ يا عود الحطــب / بييجي الربيع .. تطلـــع زهورك عجب / و انا ليه بيمضـــي ربيع وييجي ربيع / و لسه برضك قلـــبي حتة خشب
قلبي عليل يا ناس و في الكاس دواه / مديت له إيدي شربت م اللي حــواه / جنبي الشمال خف .. اليمين اتــــوجع / و إيه يداوي الكبد م اللي كــــواه
دي مزكرات و كتبتها من ســنين / في نوتة زرقا لون بحور الحنيـــن / عترت فيها .. رميتها في المهمـــلات / وقلت صحيح أما صحيح كلام مخبولين
دخل الشتا وقفل البيبان ع البـــيوت / وجعل شعاع الشمس خيط عنكبوت / وحاجات كتير بتموت في ليل الشــتا / لكن حاجات أكتر بترفض تمــوت
الدنيا من غير الربيع مـــيته / ورقة شجر ضعفــانه و مـــفـــتــته / - لا يا جدع غلطان تأمل وشوف / زهر الشتا طالع فــــــــي عز الشـــــتا
ما حد في الدنيا واخد جزاتـــه / و لا حـــد بيفكر في غير لذاذاته / ما تعرفيش يا حبيبتي .. أنا و انتي مين؟ / إنتي عروس النيل ... و أنا النيل بذاته
رقاصه خرسا و رقصه من غير نغــم / دنيا . . يا مين يصالحها قبل النـدم / ساعتين تهز بوجههـــا يعنـي / يترجرجوا نهديها يعني نعــــم
إخطفني ياللي تحبني ع الحصان / الدنيا قالت يوم في ماضي الزمان / إخطفني ياللي تحبني ع الــفرس / الدنيا قالت .. قام خطفها الشيطان
من بين شقوق الشيش و شقشقت لك / مع شهقة العصافير و زقزقــت لك / نهار جديد انا . . قوم نشوف نعــمليه / انا قلت يا ح تقتلني .. يا ح اقـــــتلك
جالك أوان ووقفت موقف وجـــود / يا تجود بده يا قلبي يا بده تجــــود / ما حد يقدر يبقي علي كل شــئ / مع إن – عجبي – كل شئ موجود
أنا كنت شئ و صبحت شئ ثم شــئ / شوف ربنا .. قادرعلي كل شـــئ / هز الشجر شواشيه ووشوشني قال / : لابد ما يموت شئ عشان يحيا شئ
الدنيا أوده كـــــــــــبيره للانتظار / فيها ابن أدم زيه زي الحـــــــمار / الهم واحد .. و الملل مشــــــترك / و مفيش حمار بيحاول الانتـــــح
أيوب رماه البين بكل العـــــــــلل / سبع سنين مرضان وعنده شلل / الصــــبر طيب .. صبر أيوب شفاه / بس الأكـــــــــاده مات بفعل الملل
نسمة ربيع لكن بتكوي الوشـــــــوش / طيور جميلة بس من غير عشـــوش / قلوب بتخفق إنما وحــــــــــدها / هي الحياه كده .. كلها في الفاشوش
يا طير يا عالي في الســما طظ فيك / ما تفتكرشي ربنا مصطـــفيك / برضــك بتاكل دود و للطين تعًًًًودً تمــص فيه يا حلو .. و يمص فيك
كروان جريح مضروب شعاع م القمر / سقط من السموات فؤاده انكســـــر / جريت عليه قطه علشان تبلعــــه / أتاريه خيال شعراء و مالهـــــوش أثر
ياللي نصحت الناس بشـــرب النبيت / مع بنت حلوه .. وعود , وضحك , وحديت / مش كنت تنصحهم منين يكســـبوا تمن ده كله ؟ / ... و الا يمكن نســــــــيت
المصدر : web-eyes
¨°o.O ( على كف القدر نمشي ولا ندري عن المكتوب ) O.o°¨
---
أتمنى لكم إقامة طيبة في الساحة العمانية
---
أتمنى لكم إقامة طيبة في الساحة العمانية
