<div dir="ltr" style="text-align: left;" trbidi="on">
<div dir="rtl" style="text-align: right;">

من فترة كنت عايز أجرب نظام تشغيل ويندوز 7 ومع الأسف حسيت بالغربة الشديدة وكأني داخل على عالم جديد ، واعتبرتها تجربة فاشلة وقررت تأجيل التجربة حتى إشعار آخر !
من هنا قولت طيب ما أخوض تجربة نظام "لينوكس" ، لأني قريت كتير عنه وعن مزاياه من حيث الأمان والسرعة .. وغيره خصوصاً اني بقالي فترة طويلة نفسي أغير نظام ويندوز ده بالكامل.

الفكرة كلها ابتدت معايا بنقطتين :
النقطة الأولى : إني كنت بفكر احنا ليه في مصر معتمدين على مايكروسوفت في كل حياتنا ، نظام تشغيل مايكروسوفت ، أوفيسمايكروسوفت ، حتى البرمجة بتكنولوجيا من مايكروسوفت ، وبنتعلم شهادات مايكروسوفت زي الـ ICDL و MCSE و غيرهم واللي خلاص اصبحت عصب الحياة عندنا !
ده غير طبعاً 90% من مستخدمي الويندوز في مصر بيستخدموا نسخ مضروبة من اللي مزروع فيها برامج تجسس ، بالإضافة لاستخدام البرامج المسروقة والمخترقه ، وده عشان ميضطروش انهم يشتروا البرامج دي أو التراخيص بتاعتها اللي هتكلفهم إشي وشويات.
وكنت دايماً بسأل نفسي .. ليه منعتمدش على تكنولوجيا زي اللينكس ونخصص ليها شهادات معتمده زي الـ ICDL كده والموضوع ده يبقى توجه قومي في مصر؟
مع العلم إن اللينكس وكل تطبيقاته مجانية 100% ، ومحمية من الفيروسات وملفات التجسس والاختراق وغيرها 100% ، ومش محتاجة جهاز بمواصفات عالية ، وبيتم تطويرها بصورة سريعة جداً ، والعالم كله بيستخدمها لنسبة الأمان العالية فيها.

النقطة التانية ودي الأهم:

ليه بدل ما احنا عايشين على السرقة كده ، الويندوز مسروق ، الأوفيس مسروق ، حتى برامج الحماية مسروقة ، ما نخلينا ماشيين بصورة شرعية.

يا جدع ده البرنامج من دول بينزل السوق نروح عاملين له داونلود ولأحدث نسخة ، ونروح جري نجيب السيريال نمبر وللا الكراك وللا الباتش بتاعه من المواقع اياها ، وبدل ما يشتغل 15 أو 30 يوم يشتغل على طول !!

لا و الحاجة الأخطر ويمكن السبب الحقيقي لأني بسعى للاعتماد على لينكس في المستقبل ، هو إن البرامج اللي بشتغل بيها أنا وغيري وبتساعدنا في مجال شغلنا وأكل عيشنا ، بتكون مخترقه أومسروقة !
يعني انا لو مصمم جرافيك بستخدم برامج تصميم مضروبة ، أو لو انا بشتغل في مجال البرمجة أو قواعد البيانات بستخدم برامج لكتابة الأكواد وتنفيذ البرمجيات برضو بتكون مضروبة !
والله ساعات كتير أوي بيجيلي هاجس إن الواحد ممكن ربنا ما يباركلوش في رزقه أو يعاقبه بذنب الأسلوب الغير شرعي اللي بيتبعه في الحصول على البرامج دي.


جايز أكون بكبر المواضيع شوية !؟؟ ما علينا

الخطوة الأولى :
دخلت على موقع "مجتمع لينكس العربي" انا كنت دخلت عليه من فترة وعرفت منه شوية معلومات مبدئية عن نظام التشغيل "لينكس" ، ولقيت مواضيع كتير بتتكلم عن أفضل نسخة لنظام التشغيل ده ، فلقيت ناس بتشكر في توزيعة اسمها "أوبونتو" فدخلت على موقع "أبونتو" وحملت نسخة "10.10 Ubuntu" وكانت أول تجربة ليا مع نظام تشغيل لينكس.

حسيت في البداية بنفس الغربة اللي حسيت بيها لما استخدمت ويندوز 7 ، وكأني كده دخلت في عالم تاني جديد مش فاهم فيه ولا عارف فيه أي حاجة ، بالظبط زي ما أكون سافرت للصين أو اليابان ، ولا انا عارف أكلم حد أو أفهم حد ، ولا في حد عارف يكلمني أو يفهمني !

<span style="font-size: large;"><b>الحاجة الوحيدة اللي قدرت اتعامل معاها بطلاقه هي الفايرفوكس


المصدر :انسان نادر