رحلة مع المجرمين جديد انسان نادر

Warith AL Maawali · 2 أبريل 2011، 0:01

رحلة الذهــاب:-

كنت في طريقي للشغل وانا راكب عربية مكروباص، وبعدين فوجئت بواحد زي ما يكون بيتخانق مع واحده في العربية وبصوت عالي شويتين ، فبصيت ناحيته لقيته بيتكلم في التليفون وعمال يقولها " بقولك ايه خللي النطع اللي جنبك ده يسمع اللي انا بقولك عليه وانا عارف انه جنبك ، لو هم عايزينها شغل بلطجه أنا ممكن أطربقها على الكل بس انا مبحبش أعمل مشاكل ... " وكلام زي كده فمركزتش معاه وسبته يكمل حواره.
بعدها لقيته بيكلم واحده تانية وبيقولها " إعملي اللي بقولك عليه ، هاتيلي الورق من المكتب وملكيش دعوة واعرفيلي اسمه وعنوانه بس هو ده اللي انا عايزه وانا هتصرف، بس محدش يعرف حاجة عن الموضوع ده ... "
وبعدها بشوية لقيته بيكلم واحده ، وبيقولها "إسمه إيه؟ محمد الزعبلاوي ، محامي ومكتبه في عين شمس .. فين في عين شمس" وكلام من ده.
وبعدها لقيته بيكلم واحد اسمه فارس وبيقوله " أنا عايزك تجهزلي 4 عيال كده بس عايزهم يضربوا ضرب يوجع بس ميكسرش فاهم ، انت فايق وللا شارب حاجة وللا إيه ، الله يخرب بيتك ..." وكلام من ده
بصراحة كنت قاعد مفقوع منه ومن طريقته في الكلام وبجاحته في الاستعراض المستفز وكأنه طالع من فيلم عصابات ، وطول السكه لغاية ما نزل م العربية وراح في داهيه.

رحلة العـــودة :-
كنت راجع من الشغل تعبان وفي طريقي للبيت وراكب عربية مكروباص برضو ، فجأة سمعت صوت خبط على العربية وناس عماله تقول "حاسب .. حاسب" ، افتكرت في الأول إنه العربية داست على حد أو خبطته ، وبعدين لقيت الناس نزلت من العربية وبتبص تشوف اللي بيحصل ، وسمعت صوت واحد عمال يصرخ بصوت عالي ، في الآخر طلع إنه حرامي وسرق واحد من ركاب العربية ، والرجاله نزلوا فيه ضرب لما عدموه العافية ، ولما فتشوه لقوا معاه مطوة و2 كيس بانجو وعلبه فيها بانجو برضو أو حاجة زي كده. بصراحة الموقف خلاني أصاب بحالة من التحفز والفوران.
وبعدين كتفوه وخدوه في المكروباص علشان يسلموه لأقرب قسم شرطة أو دورية للجيش

وبدأ الإختلاف بين الركاب على نقطين، نسلمه للشرطة وللا الجيش وللا نسيبه يروح لحاله وعفا الله عما سلف.
الغربية إن نسبة 20% من الركاب كانو مع فكرة إننا نسيبه وكفاية العلقه اللي خدها
والباقي كانوا مجتمعين على إنه يتسلم للجيش لأنه هيتحاكم محاكمة عسكرية وانها هتكون أشد وأضمن من الشرطة النيابة.
وبالفعل نزل واحد من الركاب وراح ينده لظابط من الجيش في دورية كانت في الحلمية والظابط جه يجري هو وواحد تاني معاه واستلموا الحرامي والمضبوطات اللي معاه ، وفي ناس كانت عايزه تتجمع من تاني والظابط راح مزعق في الناس وقالهم خلاص كله يرجع في العربية.
ولغاية آخر المسافة، الناس بتتخانق مع بعض على انه كان المفروض يتسلم وللا لأ !

وانتهت الرحلة ..

المصدر :انسان نادر

مشاركة