فردتين في الراس توجع جديد انسان نادر

Warith AL Maawali · 2 مايو 2011، 0:01

النهارده عيد العمال قلت انا ووالدي كنوع من تغيير الجو نطلع على كارفور اللي في مدينة العبور ، والحمد لله اليوم كان هادي وكويس ومفيش قلق في السكة خصوصاً ان المشوار كان طويل حبتين.

وانا راجع في طريق المطار ، سمعت صوت رجه في العربية من ورا وزي ما يكون في حاجة سايبه ، على طول استنتجت انه في عجله نايمه أو كده ، فوقفت على اليمين وفتحت الباب وبصيت على العجلة اللي ورايا ناحية اليمين ، لقيتها فعلاً نايمه.

قولت خير .. بسيطه نغيرها ، فحبيت أطمن برضو فبصيت على العجلات التانية احتياطي، لقيت العجله اللي قدام على اليمين مهويه شويه ، قربت ناحيتها سمعت صوت تنفيس يعني لسه مخرومه حالاً .. حاجة جميله خالص ، كده تبقى كملت.

قولت بقى أما أتأكد من الاستبن لحسن يكون بعافية هو كمان ، بس الحمد لله طلع عنده أصل.

بدأت أفك العجلة اللي ورايا ، وأركب مكانها الاستبن وبعدين فكيت العجلة اللي قدام وسبت العربية مرفوعه على الكوريك ، وخليت والدي مستني جنب العربية لحد ما اشوف بتاع كاوتش.

شاورت لتاكسي ، وقولتله وديني لأقرب حد بتاع كاوتش ، خدني على واحد قريب بعد ما نزلت فردتين الكاوتش وحاسبت التاكسي ، دخلت الورشة قولتله في فردتين كاوتش عايزين تصليح ، فبص كده وقالي : لا انا معنديش لحام شنابر !
ابتديت أحس بقى بخنقة وزهق ، خصوصاً إني كان عندي صداع من المشوار والمجهود.

شاورت لتاكسي تاني وقولتله وديني لأي حد بتاع كاوتش قريب من هنا، خدني لواحد بتاع كاوتش جنب شركة بتروجيت كده.
والحمد لله صلحت عنده الفردتين وأخدتهم في تاكسي تالت ، ورجعت على العربية من تاني.

حطيت الاستبن في الشنطه و ابتديت بقى أركب العجلة اللي قدام فوجئت ان الكوريك حصلت فيه مشكلة ومش بيرفع العربية لغاية المستوى اللي ممكن أركب الجنط ويبقى راكز في مكانه.
وبعد محاولات وأكروبات وانا خايف لحسن العربية تفلت وتقع عليا وللا حاجة خصوصاً اني برفعها بكوريك هيدروليك وحاطط فوق منه حجر عشان أرفع العربية لمستوى أعلى ، قدرت أحط الكوريك في مكان بحيث يرفع العربة للمستوى المطلوب ، وأخيراً نجحت المهمة وركبت العجلة وعدت على خير.

بس عمرى ما هنسى أبداً تجربة .. فردتين في الراس توجع !!

المصدر :انسان نادر

مشاركة