وطلع في الآخر اسمه كيس زلالي - wrist ganglion جديد انسان نادر

    • وطلع في الآخر اسمه كيس زلالي - wrist ganglion جديد انسان نادر


      من 6 شهور تقريباً كان في ضغط عليا في الشغل وكنت ممكن اشتغل لمده 10 ساعات متواصله على الكمبيوتر أوقات كنت بحس بإن جسمي كله متخدر من كتر التعب.
      وفي يوم قمت الصبح حاسس بألم شديد في مفصل إيدي اليمين استمر لمده 15 يوم تقريباً وابتدي يخف تدريجياً ، بعدها بفتره لاحظت إن في ورم في ظهر إيدي ، في الأول إفتكرته عادي ، لكن لما قارنته بمفصل إيدي الشمال لقيت في فرق واضح.
      ابتدى بقى مخي يودي ويجيب ، وقولت يا ترى ده ورم خبيث، وللا قطع في وتر ممكن يسبب عجز في اليد ، وللا .. ، وللا ....

      2.bp.blogspot.com/-8-KY2MolD5o…BWhg/s1600/Right_Hand.jpg

      المشهد حسسني بحالة من الهلع ، والأفكار السودا ابتدت تتسلل لخيالي وإني هدخل بقى في دوامة الدكاترة والأشعة والتحاليل والحوارات الكئيبة اللي مبتنتهيش ، ده غير بقى مستقبلي المهني اللي أصبح مهدد .. وحوارات دراماتيكية من دي بقى !


      قولت لنفسي.. ياعم سيبها على الله المرض والشفا من عنده ، ياكش تولع الدنيا بحالها.
      وبعد تردد خدت قراري وروحت لدكتور عظام ، وحكيت له الحكاية ، فكتب لي على أقراص ودهان جيل مضاد للالتهاب والروماتيزم ، وسناده بدعامه للرسغ عشان راحة المفصل ، ونصحني مجبش ميه سخنه على المفصل ، وافوت عليه بعد 15 يوم.


      فاتوا الـ 15 يوم ، وروحت للدكتور ، وكان أول سؤال سألته ليه : هل الإصابة دي ممكن تتحول لورم حميد أو خبيث أو تتسبب في إعاقة أو عجز في وظيفة الإيد أو كده ؟
      رد عليا وقالي : لا، لا .. هو بس ولو شكلها مضايقك في عمليه بتتعمل وبنشيل الكيس الزلالي ده.


      خرجت من عند الدكتور وانا مطمن إن الحمد لله الموضوع مش بالخطورة اللي كنت متصورها ، والفيلم الهندي اللي كنت عايش فيه.


      واللي طمني اكتر إني دخلت على النت وبحث في الإصابه دي ولقيت إنها شيئ متعارف عليه وبتيجي للناس اللي بيشتغلوا كتير على الكمبيوتر ، وإنها مشكله جماليه أكتر منها مشكله عضوية إلا في حالة إن الكيس الزلالي حجمه كبير وبيضغط على وتر أو عصب وبيسبب تنميل أو بيسبب مشاكل في آداء حركة اليد أو المفصل.

      صحيح لغاية دلوقتي الموضوع تاعبني وبحس بألم من وقت للتاني ، وأوقات بستعمل ماوس الكمبيوتر بإيدي الشمال ، خصوصاً مع المجهود الزيادة وبحس بطقطقه في الحركة ، بس الحمد لله أهي ماشية وخلاص يمكن ربنا يجعلها كفارة لأي ذنوب وللا حاجة.
      واهي برضو تذكره بنعم ربنا التانية على الواحد.








      المصدر :انسان نادر


      ¨°o.O ( على كف القدر نمشي ولا ندري عن المكتوب ) O.o°¨
      ---
      أتمنى لكم إقامة طيبة في الساحة العمانية
      وأدعوكم للإستفادة بمقالات متقدمة في مجال التقنية والأمن الإلكتروني
       رابط مباشر للمقالات هنا. ومن لديه الرغبة بتعلم البرمجة بلغات مختلفة أعرض لكم بعض
       المشاريع التي برمجتها مفتوحة المصدر ومجانا للجميع من هنا. تجدون أيضا بعض البرامج المجانية التي قمت بتطويرها بذات الموقع ..
       والكثير من أسرار التقنية في عالمي الثاني       Eagle Eye Digital Solutions