خلاصة القول (10) جديد انسان نادر

Warith AL Maawali · 21 يونيو 2011، 1:13

- الشعب المصري حالياً بيتعمل له غسيل مخ تدريجياً خلال الإعلام والصحافة وزرع المشاعر السلبية في نفسه ، زي اللامبالاه وانعدام الأمل والإحباط والعجز عن الإصلاح ، عشان يرجع زي ما كان أيام مبارك ، ويمكن أوسخ كمان.

- الحكومة الناجحة لازم تنزل للناس في الشارع لحد عندهم عشان تتواصل معاهم وتعرف مشاكلهم وهمومهم ، مش تستنى الناس هم اللي ييجوا لحد عندها عشان يشتكوا.

- إعتماد مؤسسات الدولة على التواصل مع الناس من خلال الفيس بوك بأسلوب الإرسال وعدم الإستقبال دليل على فشل مؤسسات الدولة في التواصل مع الناس.

- معنى إن المجلس العسكري يختار وزير داخلية عاجز زي منصور العيسوي ويصر عليه شيئ ملوش أي تفسير إلا إن الجيش سعيد بتوليه لدور الشرطة.

- بلد بلا أمن = بلد بلا تنمية = بلد في طريقه للإنهيار

- الفترة اللي جاية أكيد هتشهد صراع شرس بين الفساد والفاسدين وبين الإصلاح والمصلحين.

- إذا قامت ثورة تانيه أكيد هتكون ضد المجلس العسكري وفي مواجهة الجيش مش ضد أي حد تاني.

- أغلبية الشعب بقت مضطرة انها تمسك في الجيش زي العيل اللي ماسك في أمه ، خصوصاً بعد ما الشعب حس ان البلد ملهاش قيادة والساحة الرئاسية بقت فاضيه والبلد سايبه ملهاش ظابط ولا رابط ولا كبير، فاتبع مبدأ اللي ملوش كبير يشتريله كبير.

- إستمرار محاكمة الجيش للموطنين المدنيين هو استمرار لسياسة مبارك ومنهج أمن الدولة لكن بصورة غير مباشرة.

- مصر محتاجة قائد أو قيادات أصحاب مواقف ، مش واحد يمشي وراء الأحداث وهي اللي تحدد إجراءاته وردود أفعاله ، لأن المفروض هو اللي يصنع الحدث مش الحدث اللي يصنعه !

- العقيدة اللي لا يمكن هتنازل عنها ، إن الرئيس القادم لمصر لازم يكون محمد أنور السادات ، بس موديل 2011.

المصدر :انسان نادر

مشاركة