تجربة الموت .. وعالم اللاواقع جديد انسان نادر

Warith AL Maawali · 27 يونيو 2011، 1:13

كنت راكب باص وراجع من الشغل بالليل في طريقي للبيت وكنت زهقان خصوصاً إن الطريق كان زحمة، قولت البس الهيدفون وأشغل أغنية على الموبايل لحد ما اوصل، دخلنا في شارع جانبي بين البيوت ووقفنا لحظات، وفجأه سمعت صوت ارتطام قوي في سقف الباص ونفس اللحظة حسيت ان الارتطام ده كان على دماغي وحسيت بألم شديد جداً في راسي استمر لثانيتين أو ثلاثه.

لقيت رأسي بتلف والدنيا في عنيا بدأت تتحول تدريجي للون الاسود كأني أخدت بوكس جامد في عنيا الاتنين، وأصوات زعيق الناس وكلاكسات العربيات كلها بداًت أصواتها تبقى غليظه وبتبطأ بسرعة، وكأني غطست وداني في الميه، والأغنية اللي كنت بسمعها بقت زي الشريط اللي بيسف ، واتحولت كل الأصوات لصوت صفاره مزعجه استمرت لثواني.

بعد كده دخلت في مرحلة استمرت لثواني تقريباً، حسيت فيها بحالة من الانهيار التام، ومش قادر اتحكم في أي حاجة في جسمي نهائياً وحسيت خلاص ان دي نهاية حياتي، حسيت ان نفسي أقول كلام كتير وعايز حد يسمعني، كنت عايز أي حد يحس باللي انا فيه ده أو استنجد بحد، لكن حسيت اني مهما هقول مش هيفيد بحاجة.
كان نفسي لحظتها أقول أشهد ألا إله إلا الله وأن محمداً رسول الله لكن مقدرتش حتى احرك لساني، بس نطقت من جوايا وقلت "أشهد ألا إله إلا الله وأن محمداً رسول الله" وده طمني شويه.

دخلت في مرحلة جديدة انتابني فيها إحساس إن في حاجة جوايا بتتخطف مني مش عارف أحدد هي ايه ومين بيخطفها ، وانا بحاول إني أعرف ايه هي ومش قادر برضو، وفي نفس الوقت مش قادر أقاوم وحاسس اني في حالة استسلام كامل للخاطف، خلال اللحظات دي انتابني شعور رهيب بعدم الاستقرار وكأني تم ضخي في ماسورة ضيقة جداً من أول رجليا لغاية رأسي.
وفي لحظات حسيت اني تحولت لشيئ خفيف جداً وكأني بالونه طايره في الهوا.
في اللحظات دي كنت زي ما اكون في حلم، وشوفت فيه نفسي واللي حصل لي وكإني كنت نايم وصحيت من النوم.
مش عارف .. كنت حاسس بمشاعر غريبة فيها ارتياح وفي نفس الوقت فيها حالة ترقب من غير أي سبب ، بس مكونتش خايف وكنت مطمن بنسبه معقولة.

بعد كده حسيت إن في حاجة بتشدني وبتطلع بيا لفوق قوي وكأني بقيت ضد الجاذبية ، وابتديت أبعد عن الأرض بسرعة كبيرة جداً لغاية ما وصلت للسما والفضاء ، بعد كده لقيت نفسي زي ما اكون طاير في طريق مستقيم محدد ليا ما بين النجوم والكواكب ابتديت أشوف من بعيد أنوار على الصفين في الطريق ده ، وعاملين كده زي لمبات النيون بس نورهم شفاف جداً ونقي جداً كأنهم شيء غامض أو مش موجود ، بس لما قربت منهم لقيتم ناس بس شكلهم مش زي الناس ، ملامحهم بريئة وجميلة ومريحه جداً.
من ضمن الناس اللي شوفتهم دول كانوا ناس اعرفهم بس من اللي ماتوا ، ومن ملامحهم كان واضح انهم كانوا فرحانين لأنهم شافوني ، وانا كمان كنت فرحان لفرحتهم بيا ولأني أول مره أشوف ناس بالنقاء ده.

بعد كده زي ما يكون طريق النور اللي كنت ماشي فيه ده خلص ، وابتديت ادخل في طريق مظلم ، استمريت فيه لفتره مش عارف احدد هي قد ايه بالظبط.
وانا في طريقي المظلم بدأت أسمع أصوات ناس زي ما يكونوا في حلقة ذِكر أو بيرددوا أذكار جماعيه أو حاجة زي كده.
وفي الطريق برضو ، بدأت اشوف نور جاي عليا من بعيد جداً جداً، عامل تقريباً زي نور الشمس أو في نفس سطوعه لكنه زي القمر في إنه هادئ ولطيف ومش في قسوة وحرارة الشمس.
كنت كل ما بقرب من النور ده بحس أني عايز أقرب أكتر وعندي حالة اشتياق اني أوصل له واعرف مصدره.

وفجأة بدون أي مقدمات خالص .. لقيتني إتسحبت بسرعه رهيبه من كل اللي انا فيه ده وابتديت أسمع أصوات زعيق وصخبوصوت صفارة مزعجة، وابتديت احس كأني كنت نايم وصحيت من النوم.
بدأت أفتح عنيا شويه شويه لقيت طشاش ناس كتير حوليا ، وتقريباً كنت في مستشفى أو غرفة عمليات وناس رايحة وناس جايه وحاسس كأني واخد حقنة "بنج" أو مخدر، ومش عارف اعمل ايه أو أقول ايه للناس دي.
ساعتها كنت عايز أبكي جداً ، وحسيت كإني محبوس في سجن ضيق ورجعت بقى للحزن والتعب والهموم من تاني ، قولت مفيش غير اني استسلم للبنج ... يمكن أرتاح من الأحاسيس الكئيبة دي.

كتبت في 6/ديسمبر/2010 الساعة 10:39 م

المصدر :انسان نادر

مشاركة