خلاصة القول (11) جديد انسان نادر

Warith AL Maawali · 12 يوليو 2011، 23:13

- المجلس العسكري غلطان جداً لأنه بيتبع نفس سياسة نظام مبارك في إنه سايب مشاكل البلد وبيقول في عقل باله "سيبهم .. المشاكل هتتحل لوحدها والشعب هيصرف أموره بنفسه هم متعودين على كده".

- معتصمين السويس والاسكندرية والتحرير دلوقتي إبتدى الشك يستقر في نفوسهم من ناحية المجلس العسكري وعلى رأسهم طنطاوي ، إن المجلس العسكري مبيديش عقاد نافع وبيغني عليهم بنغمة إن الجيش هو راعي الثورة.

- أهم خطوة لازم الشعب يركز عليها المرحلة الجايه ، إنه يفصل طاقة وقوة الجيش عن طنطاوي وعن المجلس العسكري ، ويستقطبها لصفه ولخدمة أهدافه.

- طنطاوي متخيل إن الشعب المصري لو إنقلب عليه زي ما الشعب عمل مع مبارك ، وأعطى أوامره للعساكر إنهم يضربوا المعتصمين بالنار هينفذوا الأوامر ، لكنه مش عارف إن العساكر أول ما هتضرب ، هتضربه هو.

- المجلس العسكري رسخ العقيدة اللي عند الناس اللي بتقول "حكم العسكريين أفشل أنواع الحكم وميلزمش المصريين".

- مفيش فايده .. مفيش أمل .. كلمات نسيها معتصمي التحرير وتحديداً أهالي الشهداء.

- أي مصري يختزل الجيش والقوات المسلحة في المشير طنطاوي ، إما شخص جاهل أو شخص ظالم أو شخص منتفع.

- الحلم اللي بحلم إنه يتحقق علشان نخلص من اللي بيحصل في مصر إنه يحصل إنقلاب عسكري مدني ، يشارك فيه شرفاء من مدنيين ،شرفاء من شرطة ، شرفاء من قوات مسلحة ، لكن الحلم ده مش هيتحقق غير لما تنكشف خبايا المجلس العسكري ، ويبان إذا كان مع الثورة وللا ضدها.

- طنطاوي إذا كان بيستبعد إن غضب الشعب ممكن يوجه عليه في النهاية ، أو بيستبعد إنه ممكن يحصل معاه زي ما حصل مع مبارك ، يبقى عايش في وهم.

- سياسة وأسلوب طنطاوي = سياسة وأسلوب مبارك

- عصام شرف علشان يكسب الجولة الأخيرة في معركة الإصلاح ، لازم يوفي بوعده لما قال جملته العصماء للثوار في التحرير "أنا بستمد أهدافي منكم ومن طلباتكم ، وبوعدكم إني لو مقدرتش أحققها هاجي أقعد معاكم إن شاء الله" .. والناس مازالت منتظره انك توفي بوعدك.

- عندي قناعة تامة إن البلد كلها واقعة تحت إيد عصابة دولية منظمة زي الأخطبوط، ودراعاتهم الرئيسية هم مبارك واسرته وفتحي سرور وصفوت الشريف ويوسف بطرس غالي وبقية شلة الحزب الوطني وباقي أرجل الأخطبوط الخفيه.

- شرارة أي مستجدات في مصر المرحلة الجايه سواء كانت أحداث أو توجهات ثورية ، هتتعرف بوادرها من السويس والاسكندرية حتى قبل التحرير.

- الآداء المثالي المطلوب من الشعب الفترة الجاية إنهم يلتزموا بضبط النفس والسلمية في الإعتصامات والمظاهرات إلا في حالة الإعتداء عليهم ، لأن السياسة اللي هيتم اللعب عليها من بقايا النظام الفاسد المرحلة الجاية هتكون نفس سياسة إسرائيل "سياسة الوقيعة .. سياسة الإلهاء .. سياسة فرق تسُد".

- لا حل أمام المجلس العسكري وحكومة عصام شرف أو أي حكومة تاليه ، إلا في كلمة واحدة "المكاشفة".

- الرهان الوحيد اللي هيكسبه المجلس العسكري هو إنه يراهن على إنه يقف مع الشعب المصري وياخد بإيده بالأفعال مش بنشر الصور وإعلان البيانات.

المصدر :انسان نادر

مشاركة