أقرء كثير هذه الأيام عن مشاكل الديون والقروض الشخصيه وفي نظري المتواضع لو كل واحد يعيش على قد طاقته ويحسن التصرف في دخله الأمور ما بتكون صعبه لهذه الدرجه. الملاحظ إنه مشكلة الديون عندنا تشمل كل شرائح المجتمع وليس فقط ذوي الدخل المحدود. في ناس معاشاتهم ما شاء الله وفي ناس معاشاتهم معقوله ولله الحمد لاكن لما تسمع عن ديونهم تستغرب! ديونهم أكبر من ديون ذوي الدخل المحدود (طبعا اتكلم نسبيا وليس كمبلغ مستفرض) لأنه كلما زاد الدخل زادت معاها المصاريف.
مشكلتنا هو إنه كل مازاد دخلنا زادت مصاريفنا ما عندنا ثقافة التوفير. الشخص في بداية حياته العمليه لنفرض ان راتبه يكون في حدود 500 ريال وبيعيش على هذا الراتب حياه قد تكون صعبه بعض الشيئ بيكون عنده سياره صغيره وزينه. بعد عشر سنوات الله فتح عليه وراتبه تضاعف وصار 1000 ريال لكن بسبب غياب ثقافة التوفير بيعيش ب1000 ريال مع انه كان يقدر يعيش ب750 ريال ويوفر ال250 ريال لوقت الحاجه. الحين اشترى سياره أكبر ما لأنه محتاجلها ولكن لإنه يقدر يدفع القسط!!!
والشيئ الثاني هو إنه ما عندنا أولاويات. أعطيكم مثال: الواحد منا لما يتخرج ويشتغل أول راتب يشتري سياره يقولك ضروري يكون عندي سياره, صحيح إنه السياره ضروريه بس ما ضروري تكون "مكسيما" أو "كروزر" أجدد موديل ممكن تكون سياره صغيره وما لازم تكون جديده. طبعا الأولاويات تختلف من شخص إلى أخر. في ناس أولاوياتها الزواج, في ناس أولاوياتها البيت وفي ناس أولاوياتها سياره وسفر و و و الخ. المهم إنه الإنسان يعرف أولاوياته ويشتغل عليها وحده وحده. ما ممكن يكون عندك مشاريع كثيره في نفس الوقت وانته تووك بادي تشتغل.
تخيل واحد تووه بادي يشتغل وراتبه 1000 ريال (رقم مبالغ فيه) يريد مكسيما و بيت فخم( إلي تفكيره بلمكسيما ما بيأ خذ اي بيت طبعا) ويريد يتزوج (لنفرض إنه المهر ما يزيد عن 2000 ريال) ويريد موضة العصر (شهر العسل) كيف بيقسم هذه ال1000 ريال؟ في تقديري هذا الشخص بيحتاج في السنه الأولى أقل حاجه من 27000 الف إلى 30000 الف ريال حسبتها كلتالي:
مكسيما 10000 ريال (تقريبا), إيجار البيت 250 ريال في الشهر(3000 ريال في السنه), تأثيث البيت أقل حاجه 5000 ريال, مصاريف الزواج مع المهر 7000 ريال (طبعا المهر وحده ممكن يوصل أكثر من هذا المبلغ) وشهر العسل 2000 ريال على أقل تقدير. إلي ما حسبته بعد هي المصاريف الشهريه و من خبرتي هذه المصاريف ما شويه (كهرباءومياه, تلفون وأكل وضيوف الخ) وإذا الله رزقك بمولود ضيف مصاريف البمبرز الخ.
لذالك لابد ان تكون هناك أولاويات وفي نفس الوقت الإنسان يكون واقعي مع نفسه ويعيش على حسب طاقته ودخله, وما يشوف الأخرين إيش عندهم ويريد مثلهم. إذا الواحد ما يعرف يصرف فلوسه حتى إذا كان راتبه 6000 ريال في الشهر بيتورط في الديون وإلي يريد يتأكد من كلامي يبحث في الشبكه عن عدد المديونين في الإمارات مع إنه المواطن الإماراتي يستلم من أكبر الرواتب في الخليج. الله سبحانه وتعالى قسم الأرزاق على الخلق ومهما سعى الإنسان ما بيحصل غير رزقه.
لاحظت مواضيع كثيره تقارن بين دخل المواطن في عمان مع الأشقاء في دول الخليج وفي نظري هذه مقارنه غير عادله لإنه مثل ما قلت الأرزاق قسمها المولى عز وجل. مثال بسيط تمثل هذه المقارنه:
انت خريج جامعه وتعتبر موظف من الطبقه المتوسطه. إبنك يدرس مع "أحمد" واحد من أولاد التجار. أحمد يجي المدرسه بسياره فاخره وعنده أحسن الملابس الرياضيه وكل يوم ساعه فاخره جديده وتلفون أخر صيحه ومصروف جيب كبير وكل إجازه يسافر ويجول العالم الخ. يجيك ولدك يريد كل شيئ مثل أحمد او أكثر وما يهمه كيف بتوفرله هذه الطلبات وإذا ماوفرت له طلباته يهددك إنه ما بيروح المدرسه إلى ان توفر له طلبانه بلكامل. إيش بتسوي؟
يا ريت لو نهتم ونتعلم كيف نصرف امورنا ونحدد اولاوياتنا ونكون واقعيين مع انفسنا ونعيش على حسب طاقاتنا ونرضى بأرزاقنا. الله يوفقنا لما فيه الخير. اللهم ارزقنا رزقا حلالا طيبا واسعا مياركا فيه من حيث نحتسب ومن حيث لا نحتسب و قنعنا بما رزقتنا. اللهم أمين



منقلول من سبلة عمان