مايهز القلب هرج العواذل بالقفا
هرجةٍ يأغلا البشر ماحسبت حسابها
من جهل مكر الخبيثين بيديهم هفا
هفوة أهل الحـب فـ البعد هُمّ اسبابها
الله أعـلـم بالنـوايا ويعلم بالخفا
غيرةٍ مدري حسَد في صدور اصحابها
دام قلب الحاقد اشتب يبطي ماطفا
أتركه في حرقته ينكوي واهنابها
الفطانه وسط عقلي مع الصبر احلفا
وزود لي نفـسٍ تدك الصخر بنيابها
مـن يبادلنـي غـلا مانجازيه بجفا
لو حكت كل الخلايق وزاد اعتابها
فدوةٍ لك كل منهو بجرحي مارفا
ولحيةٍ تجرح شعورك نحلْق اشنابها
كيف اشكك بالوفا منْك ياساس الوفا
مخلصٍ لو دوني الناس صكت بابها
شاعرك لو يوصفك في قصيده ماكفا
لين جزلات القصايد تعوج ارقابها
من جميع الخلق قلبي لغيرك ماصفا
لو حدا الخفرات تبدي له مْن اعجابها
كيف لو صار الحكي من عواذل بالقفا
هرجةٍ يأغلا البشر ماحسبت حسابها
: 
: 
: