(مشاكل امتحان الانجليزي "الاستماع")

بسم الله الرحـمن الرحـيم ..
السلام عليكم ورحـمة الله وبركاته ..
والحـمد لله انتهينى من الامتحـانات ..
ونترجا النتائج .. واتمنى انها تكون مقبوله ..
مرت علينا الامتحـانات والحـمد لله كلها ما فيها مشاكل الا امتحـان الانجـليزي ..
طبعا كله سهل الا الورقه الاولى .. والي هيا الاستماع Listening ..
والي قاهرني من انه ثلاث اسئلة ..
يعني درجـات ثلاث اسئلة طارن .. بس الحـمد لله معاي كل اجـوبة الاسئلة الباقيه صحـيحـه ..
والعيب ما من المعلمه ولا العيب منا نحـن ..
العيب من الشريط الي نحـن نستمع له ..
والي هو كان منسوخ عدة نسخ ..
والسبب من نسخـه هذي النسخ من اننا نحـن كنا موزعيين على صفوف المدرسه كلها ..
موزع على كل جـناح او قسم شريط منسوخ .. والي هو ما واضح ابدا ..
وليش ما نستمع للشريط الاصلي ؟؟
وفي الاصل من راح يستمع للشريط ومن ما يستمع له ؟؟ لانه الشريط واحـد ومنسوخ عدة نسخ موزع علينا ..
وانا اول ما شغلت الاستاذه المسجـل للاستماع اعترضت وقلت (نحـن الحـيين ايش نسمع ؟؟) لانه اول ما ابتدا ما كان واضح ايش يقول .. فراحـت الاستاذه تسكر المكيفات والمراوح علشان نسمع .. بس نفس الحـاله ما ينسمع شيء ولا شيء مفهوم..! والصوت يتردد (صـدى) ..
وانا سالت الاستاذه المراقبه علينا (سمعتي شيء؟؟) بصراحـه قالت لي "ما ينسمع له ولا ينفهم له ابد .. الله يعينكم .."
ونحـن طلبنا من الاستاذه انها تعيد لنا الاستماع بس قالت من انه ممنوع .. وقلنا لها طيب انتي اقريه بس قالت ممنوع علينا ايضا .. وحـلينى كل الورقه الاولى بالحـظ ..
وانا حـليت كل الورقه الاولى بالتخـميين (حـل عشوائي) ..
ولما طلعت من اللجـنه سالت البنات ايش حـليتوا ؟؟ قالوا لي حـل عشوائي بالحـظ ..
ولحـد الحـيين نحن ما نعرف الحـل الصح من الغلط ..
واذكر انه انا طلعت من الامتحـان حـاطه في بالي اني انا ما اسمع ..
لاكن انصدمت لما قالوا لي انه كل البنات ما سمعوا شيء .. يعني كل الدفعه ما سمعوا شيء ..
ونحـن نقول من انه المشكله في الشريط على انه ما واضح ابدا لانه تسجـيل ..
واذا تقولوا من انه هذا الكلام ما له صحـه من الاساس يعني في نظركم انه نحـن فينى نقص في السمع ..
واذا كنا نحـن الثاني ثانوي ما سمعنا شيء فكيف انه الاول ثانوي بعد نفس الحـاله ما سمعوا شيء ؟؟
وهذا شيء مستحـيل .. من انه يكون كلنا معانا نقص في السمع .. لانه حـتى الاول ثانوي ما سمعوا شيء نفس حـالتنا ..
واذا كنتوا تتعتقدوا من انه العيب في سمعنا .. فعطونا الدواء الله يخـليكم ..
وانا الحـيين في الصف الثاني ثانوي طوفت هذا السؤال .. لكن السنه الجـايه انا راح اكون في الصف الثالث ثانوي فكيف راح اطوف هذا السؤال ؟؟؟ وكل درجـه في هذي المرحـله مهمه ..!!!
وليش ما تخـلوا استماع الانجـليزي نفس استماع العربي بكل وضوح .. يعني الاستاذه تقراه لنا مو المسجـل بشريط منسوخ وما واضح منه شيء ابدا .. ولو كان الاستماع المعلمه تقراه لنا اريح لكم ولنا .. من ناحـيتكم يوفر لكم الوقت والجـهد والفلوس الي تنسخـوا بها .. ونحـن نسمع من الاستاذه بكل وضوح ..
ولا تفكروا من اني اكتب هذا الكلام علشان ترحـموني لاني انا ما اريد رحـمه منكم .. لانه الرحـمه من عند الله وحـده ..
وانا قلت هذا الكلام علشان درسنا نحـن في مادة الدين (حـرية الراي) الحــريه الفكريه وهذا تطبيق مني لهذا الدرس ..
واتمنى من انه هذا الكلام ما يمر مرور الكرام ..
لانه هذا مهم لنا نحـن الطلاب وفيه مصلحـتنا الدراسيه ..
واتمنى تثبيت الموضوع في المنتدى علشان نتناقش فيه بكل وضوح ..

مع العلم اني عرضت الموضوع في منتديات المدارس العمانية ..

شكرا لك يا حبي العين
ويا ماريا يمكن انتو جابوا لكم تسمعوا شريط مو مسجل مو موشوش ..
ويا بنت صحم الامتحان الحمد لله كان سهل واسهل ما فيه الاستماع لان اسئلته سهله بس المشكله انهم جابوا لنا شريط ابدا ما واضح ولا ينفهم له.. طلبنا من الاستاذه تقراه لنا بس قالت ممنوع ..! وعاد نحن حلينا عشوائي ..
بس الحمد لله درجاتي حلوه في الشهاده ..

واتمنى من انهم السنه الجايه يكون الاستاع لمادة الانجليزي مثل الاستماع لمادة العربي .. يكون الاستاذه تقراه لنا ..

عفوا يا ماريا ليش ما يكون استماع الانجليزي مثل استماع العربي ؟؟؟
والصراحه ان كان مثله لكان احسن وافضل .. (الاستاذه تقراه لنا)
وانشاء الله يكون افضل واتمنى هذا يكون ..
مو مثل هذي السنه .. الكل ما حل حاجه في Listening ..
رحت اسئل عن الامتحان قالوا لي انهم ما حلوا شيء علشان ايش في الاصل نسمع ؟؟ وشوشه !!
وما نفهم ايش يقولوا ابدا..؟؟
ونحن طلبنا من الاستاذه من انها تقراه لنا بس ما رضت .. ومثل ما ذكرت اول حاجه ..

وشكرا لك يا إبن الوقبة ..