وفى الاخر بتكتشف انك فى وجعك مالكش غير نفسك تحضنك وتطبطب عليك مهما كنت محتاج لحد جنبك فى اللحظه دى تحس بأيده بتشد على ايدك
هاتتلفت ماتلاقيش غيرك تحضن نفسك اوى وتدخل جوة حضنك
وتمسح دمعك وتقول لنفسك معلش ماتزعليش حتى ابسط حاجه محتاج ليها ماتلاقيهاش كأنك مافيش
تقرب لحد محتاج منه يضمك او حتى كلمه واحده تطمنك
او حتى ايده على كتفك تشد منك بس ماتلاقيش
تاخد نفسك وتمشى بعيد وفى ركن منك تقعد وحيد
يمكن تبكى او تغمض تنام او حتى ماتعرفش ايه حصلك
كأنك ماكنت .......مش فارق مع كتير
تكتشف ان انت اللى كنت بتحاول تفرض نفسك على اللى حواليك
وانت فاكر ان ليك مكان وليك حق فيهم
بس لازم تقتنع انك مالكش مكان وتكتفى بالحدود البعيده
مالكش حق لان مافيش غريب بيكون له حق
وانت ماكنتش غير مجرد غريب او عابر طريق
صفحه وانتهت مجرد صفحه خلصت
مالكش وجود كل وجودك انت اتوهمته وخلقته وفرضته عليهم
ببساطه لازم تقف قدام نفسك فى المرايه وتكون صريح معاها وتقولها ماتعشيش اوهام كفايه كدا
استسلم لقدرك وماتحاولش تخلق عالم تانى تعيش فيه ... عيش الحقيقه
كفايه وجع من الدنيا .... كفايه وهم
انت مش اكتر من شخص فى رحله طويله هايروح ويجى غيرة
ماتلومش حد على وهم انتى خلقته وصدقته
مش ذنب حد انك اعتبرت كلام بيتقال مجامله....... حقيقه
زعلان ليه مالكش حق تزعل عشانه
مالكيش حد تزعل منه او تلومه او حتى تدور عليه فى لحظه تكون محتاج حد فيها بس يكون جنبك
مجرد غريب او كومبارس او اى حاجه ممكن تكونها
بس فى الاخر مالكش غير حضنك يضمك وتبكى فيه
ولما تتعب هاتغمض عنيك وتنام
دى الحقيقه ماتهربش منها وماتنتظرش حاجه ولا تزعل من حد
يمكن يكون صعب انك تلاقى الحقيقه انك ماكنتش تهم كتير ولا تفرق كتير
وان سهل يتقفل وراك الف باب وببساطه سهل تتمسح كل حاجه تخصك كأنك ماكنتش اصلا موجود
سهل اوى تقف على اخر حدود المكان
سهل وسهل وكل حاجه تكون عاديه
ان وجعك هين
ودمعك هين
وألمك مايساويش
ان كل دموع عنيك ماتساويش
ان خوفك ويا قلقك مايساويش
ان كل حاجه جواك ماتساويش
انت نفسك ماتساويش
ارخص حاجه ممكن تترمى ........ مالهاش قيمه ...... يمكن تكون عامله زحمه فى الحياه
مجرد كدبه ومجرد صفحه ومجرد اى حاجه ممكن تكون وتخلص
مش عاوز تصدق انت حر بس دى الحقيقه

مهما بكيت مش هاتغيرها
مهما اتوجعت مش هاتغيرها
دى الحقيقه استسلم ليها وخلاص
احضن نفسك اوى يمكن تلاقى جوا حضنك شئ يطمنك
ابكى وجعك وحزنك بس ماتستناش حد يقرب يمسحلك دمعك
ماتقلقش هاينشف لوحده