بدأت من فترة مسألة خطيرة وظاهرة خبيثه في التنامي إعلامياً من كل المنتمين لجماعة الإخوان أو حزبهم في كل المحافل الإعلامية ، وهي محاولة غسيل مخ الناس بترسيخ فكرة إن محمد مرسي جاء باختيار الإرادة الشعبيه الكاملة ، وإنه مرشح الثورة وممثلها الأصيل وإن الإخوان هم القادة الحقيقيين للثورة ، وده لبناء قاعدة شعبية عريضة من المؤيدين لتثبيت فكرة إنه أي خروج شعبي على مرسي في يوم من الأيام لتهاونه او تقصيره هيكون بمثابة خروج على الشعب وإرادته وانقلاب على ثورته ، علاوة على كارت الخروج على الحاكم اللي هيتم اللعب بيه 100% على أساس ان مرسي هو حاكم مصر وخليفة، وبالتالي يتم سحق أي محاولة للخروج على مرسي او الاخوان في يوم من الايام بواسطة الشعب نفسه بلا تدخل.
وللأسف الناس بدأت تنسى ان نجاح مرسي كان نتيجة حتمية بسبب حصره في الإعادة مع شفيق المحسوب على فلول مبارك ، ونتيجة إن باقي المرشحين تساوت نسبتهم تقريبا مع بعض وبالتالي الناس اختارت اخف الضررين على مصير الثورة من وجهة نظرهم وشربوا مقلب الانتخابات النزيهة وتسليم السلطة لرئيس مدني ، وانا متأكد انه لو كانت الإعاده بين مرسي وابو الفتوح أو بين مرسي وحمدين أو بين أي واحد من الثلاثة دول قصاد شفيق كان أي حد تاني غير مرسي كان هيبقى رئيس ، فاختيار مرسي كان تحصيل حاصل للخلاص من الدولة العسكرية برئيس مدني ، لكن انت تريد وانا اريد والله يفعل ما يريد.
بس الواضح ان الاخوان بيسعوا لاحلال نظام بديل عن نظام مبارك بنفس الاليات مش هيسيبوها بالساهل سواء بعد 4 سنين أو غيره ، وآخر أمل ان الدستور يتكتب بقى ونحط النقط ع الحروف وكل واحد يعرف راسه من رجليه ..
المصدر :انسان نادر
: 
: 
: