لا طاح حظك واقفلت كـل الابـواب
حذراك لا تنصـى وجيـه الصعاليـك
ولا جار وقتك وامتلا جسمك أنيـاب
اصبر وجاهد واحتسب عند منشيـك
ولا شفت ظلم مسيّدٍ حـث الاركـاب
واشهر عليه مصقلـك قبـل ياتيـك
ولا شفت ركب مسيّر اهديه ما طـاب
يمكن تسير بيـوم والـرب يعطيـك
واذا خويك بالرخـا حولـه اصحـاب
إحرص على إنـه بالشدايـد يلاقيـك
ولا تنهر العيّل ولا مـن بعـد شـاب
يربا الصغير وباكر الشيـب يغزيـك
ولا تامن العقرب ولا تامـن الـداب
لو تحسن الجيـره بيدبـي وياذيـك
إصفح عن المخطي ترا الوقت دولاب
إفطن تجي مغلوب والصفـح ينجيـك
الحقد شـر وكامـل الطيـب غـلاب
والظلم نـار وتنهـدم بـه علاليـك
ولا تصدر احكامك على شد الاعصاب
حكم الغظب لو جـاز ياتيـه تشكيـك
والحكم لو يصدر قبل بحث الاسبـاب
يرجع ومن عقب المهابـه ويصليـك
يا صاحبي لا يا بعد كـل الاصحـاب
وش عيب تلفيني وصاتك ووصيـك
قالوا السلف من شاور الناس ما خاب
اسمع كلام اللي على الخيـر يهديـك
الخلق واجد واصل ابوهم من تـراب
والطبـع كايـد والنبـا مـا يقديـك
هـذا يجـي مطلـوبٍ وذاك طـلاب
وكلٍ علـى دربـه يحثـك ويدعيـك
منهم ليامنـه لفـى يطـرق البـاب
ومنهـم يـدور طامـنٍ بالشبابـيـك
وإبليس له من بينهم ربـع واقـراب
إحذر ترا لـه معبـرٍ مـع تساليـك
شـيٍ تعلمتـه علـى منهـج كتـاب
ولي بالتجارب مـا يفيـدك ويثريـك
لا هـي بمقيـاسٍ ولانـي بمغتـاب
لكن خذ العبـره عسـى الله يبقيـك
أسوأ مصير ان طحت لك بيد كـذاب
تجزاه صدق ومرجله ويش يجزيـك
لون الضرير وسايرٍ وسـط سـرداب
تجهل تضاريسـه وصوتـه يناديـك
تتبع صداه وتقترب وانـت مرتـاب
وحنة خفوقك تجبرك فـي مماشيـك
ولا دريت إنـه فحيـح أزرق النـاب
إلين مـا كفـه مـن السـم تسقيـك
ترخي عليه من الغلا ظـل الاهـداب
وتركي عليه من الشقا وما يواسيـك
قبل أمس يوم ان الوفى شرع الاحباب
لو عشت له عمرين ما اقول يمديـك
ما يقبل الواشـي ولا ظـره عتـاب
تلفيـه ود وبالـغـلا دوم يلفـيـك
لكن غرام اليوم به صاب وما صـاب
لن المصالح دوم مـا تقبـل شريـك
وعشقٍ عليه وسوم سايـم وجـلاب
لا تشتريه ان جالـك وراد يشريـك
ولا يفرحك صبحه ولا تبغـظ غيـاب
الفجر ضوحه عـن زوالـك بينبيـك
هرجٍ على كيف البشر زادك إعجـاب
وصدقٍ يخالف سنة البعـظ يشقيـك
الفقر رزق ولا بـه الرجـل ينعـاب
ولا المال في كـل الموطـن يحليـك
لا تنظر لغيرك ولا تحسـب حسـاب
الـرزق وعـد ويجلبنـه مساعيـك
