حنا العرب

حنا العرب
----------------

حنا العرب يا مدعين العروبه

وحنا هل التوحيد وانتوا له اجناب

وحنا شروق المجد وانتم غروبه

وحنا هل التاريخ وانتم به اغراب

يوم الفقر شلتوا علينا عيوبه

واليوم عقب النفط جيتوا لنا انساب

ويوم الفقر فينا البداوه سبوبه

واليوم صرتوا مثلنا بدو واعراب

لو الهوى منكم منعتوا هبوبه

لشك رزاق الملا رب الارباب

ولو المطر منكم منعتوا صبوبه

لشك رزق الخلق من عند وهاب

جيش الحسد سقتوا علينا حروبه

كلا يبى يزرع على جسمنا ناب

حربا على المحسن تراها عقوبه

يالله عساكم ما تفيدون حراب

ياما عطينا ماندور مثوبه

إلا من اللى من ترجاه ما خاب

وياما نصرنا صاحبا ضيقوبه

عاداتنا نقدم إليما الردى يهاب

وياما نصانا من تعثر دروبه

يدخل حمانا من تعذره الاصحاب

حنا بنينا دارنا من طيوبه

وانتم سلبتوا داركم كل ما طاب

الله سقانا من بحرنا عذوبه

وانهاركم مثل البحر هدر تنساب

وحنا زرعنا الحب بأرض خصوبه

وانتم زرعتوا كره الاجيال بتراب

وحنا دعينا لسلم نوبه ونوبه

وانتم حمام السلم بعتوه بغراب

يا من دعا للحرب ما أدرك أخطوبه

لا تحسبن الحرب تهديد وخطاب

من شب نار الحرب يصلى شبوبه

ومن ثور الفتنه تعرض للاسباب

وما يستر الرجال ملبوس ثوبه

الدين وافعال الكرامه له اثياب

وما يقبل الرجال بحماه حوبه

ما دام له حق وللحق طلاب

----------------------

قصيدة

سمو الامير الملكى خالد الفيصل