السلام عليكم،،

في بعض الايام الخوالي (أيام العزوبيه )كنت ما خذ اجازة من العمل لمدة اسبوع ، اتفرغ فيها لنفسي وأريح بها شوي من عناء العمل وتعبه المُجهِد ..

المهم في اليوم الأول كنت جاعد على المكتب وأمامي ورقة وقلم

كنت جالس افكر بعمل اشغل به وقتي

فجأة لاحت في بالي خاطرة ، ألا وهي : ليش ما آخذ الربع ونسير رحلة نغير جو ..

المهم ، اتصلت بـ خالي وخبرته بالسالفه فوافق وخبر الربع

وجهزنا أمورنا وكُنا خمسة أشخاص

أنا وخالي وسيف وعلي ومحمد ..

أخ محمد دبر لنا باص عشان نسير به ..
وقررنا نسير نزور ( نزوى )
البلد الي راح يصير الفلم الهندي مالنا فيه !

عموما في اليوم التالي الصبح اجتمعنا شربنا شاهي

وحملنا متاعنا وجهزنا الباص وأنطلقنا ..

وكان السائق هو الأخ محمد نفسه ( ماشاء الله عليه قائد خبير )

عموما خالي كان جالس مثل الملك في مقعد قبل الأخير بالباص كان يقرأ القرآن ، أما سيف وعلي فكانوا جاعدين يتكلموا عن الأسهم ..

وأنا كنت جالس بجانب محمد أتكلم وياه عن الجو ..

المهم وقفنا في محطة البترول ، عشان نشتري ماي ونشرب شاهي

تابعنا المسير الطريق كان جميل ما شاء الله

عموما وصلنا على مشارف نزوى ،،

فجأة شفنا من بعيد عجوز ( شايوووب ) يلووح بيده

خالي قال لـ محمد لا توقف ولا تاخذه تراه ما تأمن عليهم ذيلا الشيوبه أكثرهم سحرة ..

عموما الجماعة قالوا حال خالي انت ما عندك سالفه الله يهديك ، وما سمعوا كلامه ووقفوا للشايب من باب المساعده عوين ..

دخل وما سلم ، بس قال: ودوني ( خذوني إلى ) شويه قدام هناكه ( هناك )
عموما الشايب راح جلس على آخر مقعد في الباص ..

فجأة خالي شاف ثعبان اسود كبير يزحف من خلفه ، ثم أختفى !!!

وحينها صرخ العجوز : بس وقف هني بس بس

عموما وقفنا ، نزل وراح ، وخالي متحير وصاير Confused وقال لنا الي شافه بس نحن ما صدقناه ..

عموما مشينا شوي والا سبحان الله الباص لف نحو المنحدر وانقلب وتدحرج

بف بف بف بف بووووووووف الى ان وقف ، سبحانك ربي !!

نزلنا من الباص والحمد لله ما تعورنا ونظرنا الى بعضنا نظرة تعجب !

تكلم خالي : ما صدقتوني ، قلت لكم انه ساحر حتى انا شفت ثعبان والحين الله يلعنه بغى يقتلنا عشان ياكلنا …



عموما كل هذا الكلام الي قريتوه حدث لأحد الأخوة ورواه إلي فيا ترى ، هل يُصدق ؟
وما الدليل الذي يثبت صحة كلامه برأيكم؟

للمناقشه …