سلحوفيات سكروب-قبل الاخيرة-

    تمر دردشة الساحة الخاصة بالمتصفح والموبايل بفترة صيانة دورية هذا ونعتذر للجميع على الإنقطاع المؤقت بإمكانكم المشاركة في المنتدى لحين عودتها :)

    • سلحوفيات سكروب-قبل الاخيرة-

      كنا مع سكروب وقملة وكانت مشكلتهم الفلوس عشان الزواج. جا سكروب يصرخ ويقول حال قملة حصلت مشكلة الفلوس. البارحة جا يزورنا صديق قديم حال الوالد من ايام الغوص وهو صار الحين تاجر كبير ويوم عرف اني مخلص ثانوية وجالس الوث ما محصل شغل عرض علي اني اشتغل سايق عنده وهيعطيني 200 ريال في الشهر. قملة فرحت بالخبر وسكروب كان مستانس ولكن كان هذا اخر يوم في الدوام في المعهد وهذا يعني انه سكروب ما هيشوف قملة. واخر الدوام كانت لحظات الوداع الاخيرة ونزلت من الاثنين الدموع المريرة وهذا الحب وهذي تعابيره. سكروب انتظم في الدوام وبعد ثلاثة شهور قرر انه يخبر ابوه بموظوع قملة عشان يروح يخطبها. الابو ما كان عنده مانع ولكن هو عارف ان سكروب ما يروم حال مصاريف الزواج. سكروب قال الحين خطوبة وبعدين يصير خير. راح سكروب وابوه حال ابو قملة عشان الخطبة والابو بعد التدقيق والتمحيص وافق وكانت بالنسبه له فرصة عشان يتخلص من هذي البنت البشعة. ومرت الايام وبعد ثلاث سنوات حانت ليلة الزفاف. وفي ليلة الزفاف الاسطورية وبينما سكروب ماسك يد قملة وماشين وسط المعازيم تنقص نعاله ويتعثر ويطيح وتطيح قملة معه. والناس تضحك وبسرعة قام سكروب ورفع قملة . كان العرس معمول في الحوش وبعد شوية الناس تستعد حال العشاء نزل المطر وكل شي اعتفس وراح الناس وما بقى غير الاقارب. الحريم عاد ما صدقن لقن سالفة وقالن اني هذي نذير شؤم وانه وانه. سكروب قال احسن تزفونا ونخلص العرس بسرعة. ركب سكروب وقملة سيارة العرس( بيكاب هايلوكس) وفي نص الدرب بنشرت السيارة ونزل سكروب وصلح البنشر وطبعا ساعده الزفيفة. وفي الاخير وصل سكروب وقملة عش الزوجية( وفي السلحوفية الاخيرة نعرف ايش صار
    • الاخيرة

      كنا مع سكروب وقملة ليلة الزفاف السعيدة. وصل سكروب وقملة عش الزوجية وكانت ليلة هنية. وفي الصباح قام سكروب من النوم وقامت العروس. سكروب: صباح الخير حبيتي. قملة : صباح الخير حبي. سكروب : صباحك عسل يا عسل. قملة : صباحك حلو يا حلو. وبدا بينهم الغزل. وبعد شويه قال سكروب حال قملة: قومي زهبيلنا الريوق من ايدينك الحلوة. قملة شافت عليه بعصبية وقالت: كيف انا اسوي الريوق وانا عروس؟ انته لازم تسويلي الريوق وتجيبه لين الكرفاية وتلقمني بعد. هذا الاتكيت يا قحي. سكروب عصب وقال : من هين جايبه هذي العادات نوبه انتيه. قالت قملة : انا كذاك شفتهم في المسلسل المكسيكي. سكروب عصب زيادة وقالها بسرعة سيري زهبيلي الريوق صاني جيعان. قملة قالت: انته قحي وانا لازم اعلمك الاتكيت وانته لازم تسويلي الريوق. سكروب: انا ما جايب حرمة اطبخلها انتي لازم تسويلي الريوق. كلمة من هنا وكلمة من هنا رفع سكروب الوسادة وظرب قملة. قملة رفعت المزهرية وفتحت راس سكروب. سكروب سار المطبخ وقملة فكرت انه راح يسوي الريوق. رجع سكروب ومعه قدر عوده وخبط قملة في الصلعة. قملة سارت المطبخ وجابت سكين. وفجأة وصل ابو سكروب وأمه ونفس الوقت وصل ابو قملة وامها عوين يصبحوا على المعاريس. شافوا الظرابة وبدل عن يهدوا بينهم مسكت ام سكروب ام قملة من كشتها وطاح الظرب وابو قملة مسك ابو سكروب وتشاخطو بالخيزران. قملة مسكت زنوبتها وسكروب مسك نعال العرس المنقصة وطاح الظرب وصارت هيصة وزمبليطة وانتهى يوم الصباحية في مركز الشرطة. وبعد فظ النزاع صرخ سكروب حال قملة وقالها: انتي طالق3 . قملة زغرطت من الفرحة وانتهت قصة الحب الاسطورية.
    • يالله حرام بعد كل هذا الحب والعذاب وكل هذي المعاناه مع بعض
      تكون كذيه الحلقه الاخيره
      كيف سلحوف وش قررت يتخلي يسف شاهين يخرجها ولا لا
      تراه يايب الاوراق حالك عشان توافق
      وانشاء بنشوف هالقصه مكسره الدنيا

      :D
      :D
      :D
      عقبال كتاباتك اليايه
    • هيه هيه يالدنيا

      عاد سحيليف ويعرف انجليزي اقول ما باغيين شي من هذي الدنيا وش عليك
      من ذا المخرج ....؟؟؟؟ اكيد الممثل بيكون توم كروز وهو سكروب والممثلة العارضة كلوديا شيفر رايحه توافق تمثل اكيد بس قصة رائعة انتظار مزيدك سحلييف