العنود ...قصة تستحق القراءة

    تمر دردشة الساحة الخاصة بالمتصفح والموبايل بفترة صيانة دورية هذا ونعتذر للجميع على الإنقطاع المؤقت بإمكانكم المشاركة في المنتدى لحين عودتها :)

    • العنود ...قصة تستحق القراءة

      قصة تحمل الكثير من المعاني والعبر

      القصة طويلة لكنها تستحق القراءه فعلاً

      كانت ليله بارده ما يعكرهدوءها الا ريحه المطهر اللي يميز المستشفيات

      بالرغم من اني ماكنت احس باي الم الا اني كنت اتقلب على سريري

      خايفه من بكره ماادري ليش.

      ابتسمت وانا اتذكر زوجي كان يقول لاتخافين يالعنود الطب تطور وابلف بك العالم
      لين تشفين لا تخافين انا معك ...

      ابتسمت وانا اتذكر كلامه والخوف اللي بنظراته وهو يحاول يطمني ...

      امي ياحبيلك يايمه طول الليل كانت تصلي وكل مافتحت عيوني سمعت صوت همساتها تدعي
      لي ووتتضرع لله ..

      ياحبيلك يايمه وياحبيلي لعيونك اللي مورمه من البكا ..

      بالرغم من اني مااشوفها وهي تبكي...

      اشياء كثيره تغيرت هالايام....

      زواري كلهم تغيروا ماعاد يجيني احد من سني لا ماعاد اشوف الا كبار العايله اللي
      يتصفون بالدين والعقل ....

      شي غريب ماادري وش سببه حتى الاحاديث اللي تطرح في غرفتي كلها عن قوه الايمان
      والصبر..

      وماعاد احد يذكر لي الامل في الشفاء ولا اخبار العايله بنت عمي ولدت مادريت الا
      بالصدفه سمعت وحده تبارك لامها في زيارتي ..

      وش صاير ؟؟؟؟

      والله شكيت انهم يعرفون عني شي انا مااعرفه يعني يمكن الطبيب قال في حالتي شي
      .؟؟؟

      بس طردت وساوسي بحجه ان الطب تطور والطبيب شكله مطمن على وزوجي يقول اني ابشفى
      اكيد انشاء الله

      قطع صوت امي حبل افكاري وهي تناديني العنود قومي وانا امك صلي ....

      ابتسمت وانا اتذكر كيف امي تغيرت .....

      امي اول من كثر حبها لي في البرد اذا اذن الفجر تهمس في اذني اني اصلي وكنها
      ودها اني مااسمعها واذا ماقمت تعيمت عني وسكتت ..

      وابعدت وهي تدعي ان الله يهديني...

      غريبه من بدايه مرضي وهي حريصه على صلاتي تقومني بصوت حزين مستسلم....

      ابتسمت وقلتلها انا قايمه يمه ...تنهدت وقالت الله يشفيك يابنيتي ....

      قلت يمه ليش انتي حزينه ...ترى انا طيبه والله مافيني الا العافيه بالذات اليوم
      ....

      و....طلعت امي وانا اكلمها وتركتني .استغربت ...وسكت.....

      وقمت اصلي ....

      يوم سلمت وقبل لااقوم عن سجادتي الا باب الغرفه يدق !!!

      الفجر؟؟ من جاي هالوقت شفت اخوي الكبير محمد يطل من الباب

      ابتسامته تنور وجهه الملتحي بس ابتسامه كلها حزن ....

      قال كيف حالك يالغاليه ..اليوم ...

      وسلم على امي وانحنى يسلم على يدها

      قلت الحمد لله بخير اليوم انا طيبه واظنهم اليوم بيطلعوني ...عندي احساس ...

      الغريب بالرغم من اني كنت ابي افرحه الا انه التفت عني وراح للشباك وفتحه ووقف
      عنده شوي وهو يتنفس بعمق ويذكر الله ...

      وكأنه يحاول يطرد الشيطان ...

      بعدين قال بدون مايرفع عينه من الارض...ودي اغير اتجاه سريرك ياالعنود ....

      وقبل لاارد حرك السرير وخلاه من جهه القبله ...

      ...ابتسمت قلت لييش؟؟؟؟؟؟

      قال وهو مارفع عينه من الارض وبصوت مرتعش

      افضل علشان اذا دعيتي الله تكونين مواجهه للقبله ....

      قلت وانا اضحك : محمد اخاف ذي بدعه انتبه ....

      ولاردعلي حط مصحف جنب سريري وخرج

      وتركني ولحقته امي وانا ابتسمت وانا اتذكر المناقشات الحاده

      اللي كانت تدور بينا في امور الدين

      كان دايم ينصحني ويوعظني وانا بالرغم من اني احترمه الا اني كنت اناقشه في اي
      فكره يقولها

      واقول اللي في خاطري وهو كان متقبل للمناقشه ويرد برحابه صدر

      رجعت لسريري وتمددت عليه فعلا هالمكان احسن من الاول هنا اقدر اشوف الحديقه
      اللي برا

      واشوف العصافير تغرد في الصبح تذكرت شباك غرفه بنتي ساره اكيد العصافير متجمعها
      عنده الحين

      ياما ازعجتني اصوات تغريدها وفتحت الشباك علشان افرقها لاتقوم حبيبتي ساره
      وترتاع ...

      يوه وينك ياساره بكره بتنامين في حضني انشاء الله

      وابعوضك عن الايام اللي قضيتها بعيده عنك في المستشفى ...

      بكره ابشم ريحتك ياعمري

      دخلت امي قلت يمه ساره تراها الايام الاخيره يجيها كوابيس عساك

      وصيتي نوره عليها لاتفارقها لو دقيقه في الليل لين اجي..

      قالت امي ماعليك انتي ساره مرتاحه فكري بنفسك بس ....

      تمددت على سريري وانا اطالع الساعه على الحائط الدكتور بيجي الساعه 10 وابقوله
      اني ابطلع خلاص ماله داعي اربك اهلي وزوجي اكثر من كذا خاصه اخوي ماجد قرب عرسه

      وسحبت مجله ازياء وفتحت على صفحه الموديل اللي اخترته لزواج اخوي ماجد ....

      واتخيلت شكلي وانا لابسته يوووه ابقهر كثير من البنات اللي ينافسوني في العايله
      ...ابكسر عينهم

      وقعدت افكر كيف اقنع الخياطه علشان توافق تخيطه بسرعه

      وغفيت .....وقمت على صوت اخوي محمد يقرا قران عند راسي وفتحت اعيوني وابتسمت له

      قلت: محمد مابعد رحت البيت ؟؟؟ يوه وعملك ؟؟؟؟؟

      مارد علي وكمل قرايه لين ختم السوره ...

      وهذا ابو ساره زوجي الحبيب اللي مسك يدي وقال وهو يبتسم بحنان هاه العنود

      عساك ماحسيتي بشي ....استغربت من سؤاله قلت لااانا ياخالد طيبه مافيني الا
      العافيه وودي اطلع الصراحه ....

      قال الله يشفيك وابعد عني بسرعه لااشوف دموعه ....

      وفي هاللحظه سمعنا دقات على الباب ودخلت الممرضه لتعلن وصول الطبيب

      وفي هاللحظه زوجي نقز من مكانه كانه مقروص وخرج بسرعه واحد يبي يهرب

      اما انا فرحت قلت للممرضه بحماس خليه يدخل انا جاهزه ودخل الطبيب

      طبيبي يشبه اخوي محمد كثير مسلم ملتزم ملتحي ومحترم

      مااذكر مره انه رفع عينه في عيني الا للضروره ....

      وانا استحي منه مره

      بس اثق فيه واعتبره زي اخوي ....

      قال هاه كيف حالك يالعنود ...

      قلت الحمد لله يادكتور انا اليوم افضل يوم لي من بدايه مرضي وابي اطلع خلاص
      اشتقت لبيتي

      اخوي في هاللحظه طلع بسرعه وامي لحقته وتركوني الحالي مع الطبيب والممرضه
      الظاهر كانوا يتوقعون انفجار لغم ...

      قال الطبيب بوجه جامد مافيه من الاحساس ذره وكأنه مو هو اللي يتكلم الا كانه
      يحكي بلغه هو نفسه مايعرفها

      قال العنود انا ابكتبلك خروج ..

      ونور وجهي بابتسامه وانا ادس يديني تحت الغطوه لايشوفها الطبيب

      وكمل الطبيب كلامه بوجه جامد العنود انتي وحده مؤمنه واكيد عارفه ان الموت حق
      ....

      وسكت.................تسارعت انفاسي وانا اقول ايه كمل يادكتور

      قال : حالتك ميؤس منها ....

      وابطلعك علشان تقضين اخر ايامك في المكان اللي تحبينه ...

      ورجع لصمته

      وسكت .....الطبيب..

      وسكت كل شي في الغرفه

      بس انا ماعاد اسمع الا صوت انفاسي وصوت اكوااام الامل اللي انهدت في قلبي
      ......

      ومن الصدمه رميت غطوتي بعيد وقمت بحماس.

      وكأني ابدافع عن حياتي وكأن الطبيب هو اللي يبي يسلبها مني

      وانحنيت ولاول مره احط عيني في عين طبيبي اللي مارفعها عن الارض

      وقلت بحماس دكتور...

      لاتقول كذا انا طيبه دكتور.....

      وش هالاكلام ...دكتووور كيف الطب يعجز عن حالتي انا ...انا ..

      اصلا ابوساره قال انه بيلف بي العالم كيف المرض ينتصر على شبابي وحيوتي انا
      اقوى منه اكيد

      قال يالعنود الموت والحياه بيد الله والطب وسيله وماادري يمكن يبقالك ساعات او
      ايام او اسابيع بس حالتك يالعنود ماعاد نقدر نسيطر عليها .....

      وسكت ....

      وقبل لايطلع قال وكانه يبي يخفف عني وابعطيك اقوي المهدئات ولا رح تحسين بلالم
      في باقي ايامك انشاء الله ...

      حسيت ساعتها اني مجوفه فاضيه من الداخل حسيت الدنيا سودا حوليني

      وبدت تتضح لي صور من بعيد في مخيلتي اول صوره شفتها كانت صوره ساره بنتي وهي
      تضحك وعمرها شهور ...

      وبعدين شفت صوره زواجي وانا لابسه ابيض ووزوجي ماسك يدي بفخر ....

      وهذي امي وهذي زميلتي في المدرسه شفتها مع اني من بدايه الصيف ماقابلتها
      ولاكلمتها ...

      وهذولا عصافير غرفه ساره ....

      واخر صوره شفتها قبل لاافوق كانت فستان زواج ماجد اللي اخترته من مجله الازياء
      ....

      حسيت باختناق وضيق...

      هذا حضن امي اللي دخلت علي وضمتني وابعدها عني بقوه وقاومت علشان اتخلص من
      حضنها

      وسمعت صوت زوجي يكلم الطبيب عند الباب طالعت امي بعصبيه

      وقلت يمه ماابي اشوف خالد ...

      كانت رغباتي اوامر في ذيك الساعه ركضت امي وردته من عند الباب ..

      ماكنت ابي اشوفه كنت متاكده اني مارح اتحمل شوفته هو بالذات حسيت انه بيذكرني
      بايام الرخا وانا الحين في شده وينكم يااهلي بس ماابي غيركم

      مابكيت ولانزلت مني ولا دمعه وكأن الخبر كان فوق مستوى البكا بالعكس تحمست وقلت
      يالله ابطلع ...

      اكملت اجراءات خروجي وقبل لااطلع جت المريضه اللي بتاخذ غرفتي طالعت عيونها
      فيها بريق امل تختلف تماما عن نظرتي انا كانت نظرتي ميته عميقه مالها لمعه ...

      سبحان الله للامل بريق في العيون ....

      وطلعت قلت لاخوي محمد ماابي بيتي ابي اروح لغرفتي قبل لا اعرف خالد ....

      وفعلا اخوي بدون اوامري كان رايح لبيت اهلي ...

      ونزلت ودخلت البيت بس مالقيت في استقبالي الا خواتي الكبار والبيت كانهم اخلوه
      لي

      هذا بيت اهلي العامر اللي الكل داخل طالع الحين هادي كانه مقبره؟؟؟؟

      رحت لغرفتي ورميت عبايتي كنت ناويه اتحمم واغير ملابسي واستعد علشان اضم ساره
      لصدري بس الحين...

      غيرت رايي ماابي اشوف ساره

      ماابي اشعر انها معتمده علي في شي ابي اوكل امرها لله .....

      ونعم بالله ابخليها في وداعه الرحمن ومن يحفظ الودائع مثل الله ....

      دخلت امي وهمست بصوت واطي قالت العنود وش تبين تاكلين ؟؟؟؟

      قلت ولاشي ...قلتها بحزم وقوه يمه ماابي شي 0000000

      امي اول كانت دايم تتابع اكلي وتجبرني اني اكل حتى بعد ماتزوجت كانت تحرجني عند
      زوجي اللي كان يضحك من حرصها على اكلي وكأني طفله...

      بس اليوم ولاول مره احترمت رغبتي وسكتت وكانها تقول ماله داعي الاكل مادام
      اخرته للدود

      قالت يابنيتي زوجك يبي يشوفك قلت ..

      .بصوت عالي وكاني اكلمهم من العالم الاخر لا ماابي اشوفه ...

      وطلعت ورجعت مره ثانيه قالت ترى خالد يقول اذا وافقتي تشوفينه هو ينتظر في
      المجلس مع اخوك ....

      بس انا قررت اني مااعذب احد واني اقضي اخر اوقاتي الحالي قلت يمه روحي ان بغيتك
      ناديتك ...

      قالت ابقعد عندك اوسع صدرك ...قلت يمه ماني فاضيه ووقتي قصير

      طلعت وانا اتذكر الوقت اللي كنت اضيعه في امور تافهه مثلا مجله الازياء اللي
      اخترت موديل زواج ماجد منها ...

      جلست في المكتبه ساعتين علشان اختارها واشتريها

      والحين تركتها في المستشفى ونسيت رقم الصفحه ومارح البس الفستان ابدا...

      يالله ياوقتي اثرك كنت غالي الحين عندي اشياء كثيره ابي اسويها بس ماعرفت زي
      الطالب اذا اعلن المدرس انه باقيله عشر دقايق من وقت الامتحان وهو مابعد كتب في
      الورقه شي

      بيسلم ورقته قبل العشر الدقايق ماتنتهي لانه رح يتوه بين الاسئله وانا هذا
      شعوري ...

      ابدا بايش ولا ايش ....

      جلست افكر شوي وطلعت ورقه وقلم قلت ابكتب وصيه.......

      وصيه....؟؟؟؟

      زي الافلام اللي كنت اتابعها ياما سهرت اطالع ناس (اظنهم) اردى خلق الله وهم
      يفتعلون حكايات تافهه مالها بالواقع صله ...

      ياخساره ذاك الوقت كان ربي نازل في السماء يقول هل من مستغفر فاغفر له ...هل من
      داعي فاجيبه.....

      ياخساره ليتني قمت وصليت ودعيت ان الله يخليني لساره وابوها ....

      ياليتني على الاقل رحت لساره وضميتها لصدري ......

      وفجاه رميت الورقه والقلم وقمت ...وفتحت الدولاب وطلعت فستان حرير كان خالد يحب
      يشوفه علي....

      ...ولبسته ولبست جزمه مناسبه ...

      وفكيت شعري وطلعت دهن العود وحطيته على شعري ووقفت قدام المرايه وتاملت
      صورتي....

      يالله كم باقي من الوقت ويندس هالجمال في التراب كم باقي من الوقت وتمشي
      الحشرات على هالخد النظر ...

      كنت اعتني بجسمي حمامات زيت وكريمات واكافح التجاعيد بس ليتني وصلت لسن
      التجاعيد ...

      خساره الوقت الممل اللي قضيته وانا اوزع شرائح الخيار على وجهي ياخساره ليتني
      رحت قريت سوره من القران ولا لعبت مع ساره حبيبتي قبل لاتفقدني

      وقفت وطالعت جسمي هالجسم الممشوق بيتمدد في القبر بعد ساعات...

      ياترى ضلوعي هذي بتلتقي بضمه القبر ...

      ياترى رقبتي اللي ياما رفعت راسي لفوق بتنحني على صدري ولا بتغل الى رجولي ....

      وتذكرت كيف اصريت اني انضم لنادي وكيف احتلت على ابوساره واستخدمت جميع الوسائل
      ليين سحبت منه الموافقه سحب بالرغم من انه ماكان موافق من قلبه ..

      وكان كاره ويقول هالوقت انا اولى به يالعنود .

      بس لا زواج ماجد قرب وكنت ناويه اكون فتنه الحفل فيه ....والحين الله ينجيني من
      فتنه الممات ..

      طلعت علبه مجوهراتي ومسكت خاتم كبير اشتريته ايام زواجي كانت في الخاتم نقوش
      تفحصت النقش وطرا على بالي طاري يااترى انا كنت ازكي عن هالذهب ولا ..لا.. اظن
      ابوساره كان يزكي عن ذهبي اظن بس ماني متاكده

      ماقد سالته ابد .....

      وتفحصت النقش مره ثانيه وفركت جبهتي وانا اتسال ياتري هالرسوم بتطبع في جبهتي
      واكوى بها ولا بينجيني الله .؟؟؟

      تاملات غريبه طرت على بالي ....ومشى الوقت بسرعه وانا بين ادويتي المهدئه وبين
      صلواتي وقراني .......

      في الليل طلعت من الغرفه ولقيت سجاده امي عند الباب...

      امي مانامت تصلي وتدعي وجلست عندها والتفتت علي....

      نظراتها تجمع فيها حنان امهات الدنيا كلها ناضرتني نفس نظراتها لي يوم كنت طفله
      ..

      قالت تبين شي يابنيتي؟

      قلت يمه ابي رضاك ..وانفجرت تبكي بكت ...بكت....

      وانا تحجرت الدموع في عيوني ولا دمعه هليتها

      وانتظرت لين هدت وقالت انا راضيه عنك يابنتي ..

      والله انك من بين اخوانك كلهم اقل وحده تعبتني في الحمل والولاده والتربيه..

      انا راضيه عنك يابنتي والله يرضى عنك انشاء الله...

      تنهدت براحه وقمت من عندها ومشيت لمحت اختي طالعه من الغرفه اختي من اسبوع
      ماشفتها بس غطت وجهها بيدها وكأنها شايفه شبح ودخلت لغرفتها بسرعه ..

      ومشيت كنت ادور في البيت مثل مومياء اعدوها لتابوتها امشي ببطء كل اهل البيت
      سهرانين .....

      وش هالليله الغريبه كل واحد ماخذ له زاويه وجالس الحاله

      هالليله تشبه ليله السفر صح هي فعلا ليله سفر وتذكرت كيف كنت اقلق في كل ليله
      سفر ولا انام صحيح ان سفري كان سياحه الا اني اتقلب في فراشي وكل شوي اروح
      اتاكد ان اغراضي جاهزه ...

      يووه اليوم سفرتي غير..... سفرتي مافيها رجعه ومفاجأه وماني مستعده لها ابد
      .....

      مشيت على صوت ترتيل اخوي محمد للقران كنت اتبع الصوت لين دخلت عليه محمد ااعز
      اخواني على قلبي...

      ماانسى اول ايام التزامه كيف كانوا اهلي يعلقون عليه بحجه انه متشدد ..

      وكنت اشجعه اعرف ان هذا صالحه دنيا واخره وقلتله يصبر عليهم ويحتسب ووهو
      الربحان في الاخير ....

      وفعلا بدى يجني ثمار صبره والحين الكل يثق فيه وياخذ شوره...

      جلست جنبه وهو يقرا تغيرت نبره صوته يوم دخلت وبدت تتذبذب وباين كيف كان يكافح
      علشان يثبتها في مستوى واحد وارتفع صوته علشان يسيطر على ضعفه

      وانهى السوره والتفت علي ...

      قلت محمد .....وش انا مقبله عليه ....

      ابتسم بحماس ودموعه تهل وقعد يحكيلي عن رحمه الله وهو محافظ على ابتسامته
      الطيبه بالرغم من دموعه

      وحكالي كيف ان الله رحيم بعباده وانه احن عليهم من الام على ولدها ....

      قلت محمد كيف الموت؟؟؟؟

      قال انشاء الله بيكون سهل كــ.....

      وقاطعته وقلت محمد وش البرزخ؟؟؟؟؟

      كنت افكر بصوت عالي وابي احد يسمعني بس

      قال البرزخ هي الحياه بين الدنيا والاخره و....

      قلت محمد كيف بيكون حالي فيها...اذا مادعيتو لي ؟؟؟؟؟

      ورفع ايدينه للسماء واجتهد بالدعا وانا طلعت من عنده وبدون لااشعر ساقتني
      رجليني للمجلس كنت ابي اعرفر ابو ساره هناك ولا راح ينام على سريره

      اللي اعرف انه مايرتاح الا عليه

      وجا في بالي فكره ياترى بيتزوج بعدي؟؟؟؟

      اكيد انا اعرف ابو ساره مايحب الوحده ...ياخســـــــاره

      دخلت المجلس ورفع راسه لي تمنيت اني مالقيته .....

      وتراجعت وناداني قال العنود تعالي ياحبي الاول والاخير

      وبكى ساعتها بس بكيت...

      انا كنت عارفه اني مارح اتحمل شوفته هو بالذات ....

      قلت مالك عندي شي ياخالد خلاص الموت بيخطفني منك اليوم

      يمكن اشوفك في الجنه كاننا من اهلها انشاء الله

      قال انشاء الله انك من اهلها انا راضي عنك ياساره ومن ماتت وزوجها عنها راض
      دخلت الجنه .....

      قلت بس انا كنت مقصره معك كثير ..

      قال بالعكس حياتي معك كانت حلم جميل ماتمنيت اني افيق منه يالعنود ...

      كلشي معك كان له طعم حتى زعلك ودموعك وغضبك كنت في جنه يالعنود وكنت متاكد انها
      مارح تستمر السعاده اللي كنت فيها....

      وقام وقف ورفع يده بحماس وقال العنوووود والله ماانساااك....

      وحرك يده بقوه وصرخ:

      والله العظيم ماتغيبين عن بالي....

      وهو يحلف انا كنت اتخيله وهو ماسك يد عروسه الجديده

      ويطالعها بفرح وهي تبادله النظرات ...

      خساره كان زوج نموذجي وكنت احبه خساره الله يخلفه علي ....

      وقمت طلعت وكملت رحلتي الكئيبه...

      هالمره وقفت عند الباب اللي ساره تنام وراه وقفت وانا احاول ابلع عبرتي

      ترددت ادخل ولا لا ...

      ساره كانت متعلقه فيني كثير اول ايام مرضي كانت تبكي طول الليل تبيني

      بس في الاخير رضخت للظروف وتعلمت كيف تنام بعيد عن حضني ...

      حاولت اني ماادخل علشان خاطرها ليش اقلب مواجعها بس حسيت اني اذا ماشفتها
      بتتحول اخر ساعاتي الى ثواني

      ولاول مره اتصرف بانانيه وافتح الباب وادخل كانت اختي نوره تنام جنبها على
      الارض....

      وجلست وانحنيت على ساره وشميتها ....

      ياحبيبتي ياساره....

      وحست اختي نوره فيني وقامت مرتاعه وقالت: العنود؟؟؟

      نوره ماشفتها من كم اسبوع بس ماسلمت عليها...

      كنت اودع العالم وماني فاضيه اسلم قلت نوره انا ابنام جنب ساره اليوم

      وابعدت وهي متردده ...

      وتمددت جنب ساره وضميتها وبكيت

      والتفت على نوره قلت نوره تراني كان ودي اشوف ساره وهي تكبر كنت اتمنى اشوفها
      عروس

      قوليلها في يوم زواجها يانوره .... الله يخليك

      كنت ابيهم يذكروني ويترحمون علي بس في ذاك اليوم ولاّ ساره مااظن انها بتهل
      دمعتها علي لانها ماعرفتني زين...

      تذكرت حديث الرسول ان الابن الصالح ينفع والدينه...

      والتفت على ساره ودي اصب عليها التربيه كلها في ذيك الساعه كنت ابيها تطلع
      صالحه.....

      وتمددت جنببها وماادري كم من الوقت مر .....

      ولاول مره اسمع صوت اذان الفجر ولااقدر اتحرك ...

      احس رجولي مكبله كاني في كابوس

      عيني ثابته على سقف الغرفه .....

      حاولت اتحرك ماقدرت وصورة ساره في عيوني وهي نايمه كنت ابي اضمها ثانيه ماشبعت
      منها

      اغيب عن الوعي واصحى ثانيه شفت العالم يصرخون حوليني غرفه بنتي الهاديه امتلت
      بالناس

      اللي يبكون هذي امي وهذا اخوي محمد وهذا زوجي وهذا واحد مااعرفه اظنه طبيب جسمي
      الغض كان متشنج

      والتفت سيقاني ببعض

      كنت ابي ابكي استغيث بس مااقدر اتحرك قلبني الطبيب يمين ويسار كني خرقه بين
      يديه

      وكلم اهلي وسمعت صوت بكا شديد ...

      واخر شي تذكرته كان ...ابيات شعريه مااحفظها زين تقول

      ولدتك امك يابن ادم باكيا

      ....................والناس حولك يضحكون سرورا .

      فاعمل ان تكون اذا بكوا

      ....................في يوم موتك ضاحكا مسرورا.

      وهنا حسيت بقبله رطبه على خدي....

      وفتحت عيوني لقيت وجه قريب من وجهي وابتسامه هبلى ...

      ساره...هذي ساره بنتي ضميتها وبكيت....بكيت ....

      وش صار وين انا فيه ؟؟؟

      وسمعت صوت خالد من دورة المياه وهو يغسل ويقول :العنود وش فيك رجعت لك كوابيسك
      مره ثانيه؟؟

      تعوذي من الشيطان وقومي يالله انا الغيت كل مواعيدي علشان اوديك للخياطه ...

      وحمدت الله ان هذا كان حلم واني الى الان اقدر اضم ساره ...

      قلت لا ماابي اروح للخياطه ماابي اترككم ياخالد طلع من دوره المياه وهو مبتسم
      بتعجب وقال وزواج ماجد ؟؟؟؟

      قلت عندي فستان عادي ابلبسه.....وابتسم وكانه مو مصدق كلامي وفتحت الشباك وشفت
      العصافير ..واستنشقت هواء نقي

      وحمدت الله ان ذيك الليله الرهيبه كانت حلم......

      بس حلم ممكن يصير

      من يضمن حياته ؟؟؟

      وقررت اني استعد لها من اليوم......

      مثل ماقال الشاعر ....

      لولا الهرم و الفقر و الثالث الـموت

      ............................يالادمى بالكون ياعظم شانــك

      سخّرت ذرات الهوا تفهم الـصـوت

      .............................وخليتها اطوع من تحرك بنانك

      جماد تكلمها وهي وسط تابـــوت

      ............................تاخذ و تعطي ما صدر من بيانك

      وعزمت من فوق القمر تبني بيوت

      ..............................من يقهرك لوهو طويل زمانـك

      لولا الثلاث وشان من قدر الفـوت

      ...................نفذت كل اللي يقوله لسانـك






      ****نقلاً من احدى المنتديات ****

      --------------------------------------------------------------------------------
    • [TABLE='width:70%;'][CELL='filter:;']
      قصة رائعــة بالفعـل
      معاني راقية تحملها في طياتها والعبرة نستشفهـــــــا في النهاية
      اسلوبها جميل ،، حوارات قريبة كثيرا ما تنساق إلينا في سهولة ويسر على اعتبارها حوارات يومية
      لا أشك أن أحدا منا سلم من موقف من تلك المواقف ،،
      ويبقى ابن آدم في المحك
      يبحث دوما عن الجديد عن كل شئ غال يتفاخر به امام الجميع
      ونادرا ما يتذكر أن له يوم آخر يحاسب فيه على أمور دينه ودنياه ،،
      وكثيرا ما يعرف ذلك بعد فوات الأوان !!!
      لكــــن في قصتنـــــــا ،، جاءها التنبيه الرباني ّ قبل أن يقع الفأس في الرأس كما يقال !!!
      وهنـــا جاءت العبرة في النهاية
      أسلوب جميل في السرد

      تحيــــــــــاتي ،،، للنقل

      صغيــــــــــرة
      [/CELL][/TABLE]
    • [TABLE='width:70%;background-color:transparent;background-image:url(backgrounds/2.gif);border:3 double purple;'][CELL='filter: glow(color=white,strength=5);']
      قصة رائعة ...
      ايها النادر في الوجود ..
      ممتع سردك لقصتك .. ومشوق تلك الاحداث ..
      ولكن الاجمل ان القصة عبارة عن حلم في بعض اوقاته جميل وفي بعضه ..
      تحياتي لسردك وتسلسل الافكار ..

      في انتظار جديدكم دائما بشوق لقرائيه ..


      تحياتي إعصار ...
      [/CELL][/TABLE]
    • النادر

      ياله من حلم

      الحقيقة هناك فوائد جمة يمكننا أن نستقيها من هذه القصة

      ولكل منا أسلوبه واستخلاصاته

      أشكرك أخي على هذا الإنتقاء الجميل

      وأشكرك على الأمانة الأدبية

      ****

      ولكون القصة منقولة

      أعذرني لن أضع بها أي ملاحظات

      ولكنني أكتفي بالثناء على الإخيار الرائع

      أخيك : رسام الغرام
    • اعجبتني هذه القصة كثيرا وسالت الدموع مع احداثها المخيفة
      الموت شبح مخيف خيم على اهل العنود
      تاثرنا كثيرا وعشنها وتصورنا احداثها والقلب يرتجف
      لنتفجأ في الاخير بشي غير متوقع تماما
      ان تكون كامل القصة حلم :confused:

      تشكر اخي النادر على هذه القصة التي فيها من العبر الشي الكثير

      وفقك الله



    • النادر ..

      قصة رائعة .. نشكر إختياركم لنا هذه المقطوعه الفنية الرائعة ..



      هلا بيكم .
      لن تستقيم الحياة إن لمْ يستقم عليها الانسان .!
      لن يُحبّ الله أحداً إلا إذا أحبّ الانسان غيره بصدق ..!!
      الحُبّ الحقيقي تتدفّق عاطفته كما يتدفّق الماء من أعلى قِمّة.!
    • [B]
      يسلموووووووووووو على الموضوع

      [/B]
      استغفر الله العظيم وأتوب اليه :) .......................................................... شاركونا http://aflajoman.tawwat.com
    • [B]يسلموووووووووووو على الموضوع [/B]

      استغفر الله العظيم وأتوب اليه :) .......................................................... شاركونا http://aflajoman.tawwat.com