بعدك ببالي انت ما بتروح ...انت بتجي عالبال متل العطر بشوق ونار
هيك انت علمتني ... تعلمت من كلماتك التحدي
تعلمت كون قوية بكل شي بقولو وبعملو
بس مو قاسية ، أبداً مو قاسية
وإذا بقسى أكيد رح تكون القسوة علي أنا
وبس .... هون منقدر ننفصل بخيط رفيع
عندي كتير كلام قولوا
بعدك بقلبي لك انت قلبي
وبس يتسمى أي شي بالكون ما بيتغير
بيكبر وبيربى معو اسمو وانت هيك مو بس ربيت ووكبرت فيي انا
أنا ماحسيت إني تركتك
صحيح العذاب عم يكبر متل حبك
متل وعدك انك رح تطلعلي من كل شي
كل وجوه العالم صارت انت بس مع حزن
هلق صدقت إحساسي فيك أكتر بإنك لونت حياتي
صعبة والشخص يحب ويكون بعيد
بس أنا فشلت بإنو حبك متل ما أنا بدي ومتل مابدو الحب نفسو ومتل ما إنت بتستاهل مني كل الحب وأكتر من شي اسمو حب بهالدنيا طلعت من ورا أحلامي وفتت لأحلامك ولعالمك الغريب الراقي اللي مابيشبه أي شي حولي
أو يمكن يمر علي بحياتي
ولأنك كنت أكبر من أحلامي بعدنا وما اكتملت قصتنا اللي مارح بيوم تنتهي
صرت كل يوم ادعيلك أكتر بس ادعي بشكل مختلف شوي عن الأيام اللي كنا سوا
صرت قول ياربي تنساني لتعيش
يارب تكون افهمت موقفي
يارب تكون ما كرهتني ...
وبتقول أحلام مستغانمي (السعادة ذلك العصفور المعلق دوماً على شجرة الترقب، أو على شجرة الذكرى. هاهو على وشك أن يفلت مني الآن أيضاً .ولأنني أدركت ذلك، بدأت أعيش ذلك الحب ، بشراسة الفقدان.)

شكرا أصدقائي على كل كلامكم وأعتذر على النشر باللغة العامية (اللهجة الشامية ) بس حبيت انثر بعض الياسمين الدمشقي في ساحتكم العظيمة علها تترك عطراً يوصل كلماتي إلى القلوب