راعي العقل يسلم وراعي الجهل طاح
وراعي السلوم الراسخه لاهي مريح
ورجلٍ خذا العبره عن الغيـر لمـاح
ورجلٍ سقط قدره ولا شـاف تلميـح
هذا معه فطـنٍ غـدا بيـده سـلاح
وهذا ثقل حمله علـى زود تسليـح
وفعـلٍ معـه تدبيـر يبقـا ولا راح
وفعلٍ بلا تدبير ريـشٍ نطـح ريـح
لا هي بلحيـة غانـمٍ جـاره إرتـاح
ولا هي بلحية ظالـمٍ جـاره يصيـح
يا غير ذكرى داعبت فكـر سـواح
تلـزم عليـه وللخفيـات توضيـح
جينا وفينا من عنـا وقتنـا جـراح
وهمنا ولمنا وزادنـا اللـوم تجريـح
وسمنا عقب ما كان للحـق مصبـاح
وشمنا عقب ما زاف نور المصابيـح
يا مـا جنينـا حنظـلٍ بـان تفـاح
وياما سقن كفوفنـا منبـت الشيـح
اللي عطانا الصدق لو زاح مـا زاح
واللي عطانا الكذب عن دربنا زيـح
قدر لي الله من غثـا سلـب الارواح
يوم الحبايب مـا تعـرف التباريـح
كنت احسب إن غيث السعد بارقه لاح
وأطرد هجوسٍ شرح القلب تشريـح
وصديت سمعي عن غثا كل صـداح
وصكيـت بيبـان الشقـا بالمفاتيـح
وأبدلت ميزان العـدل قـول دمـاح
واصدرت لسباب الخطى الف تصريح
ولا دريت ان اكثـر العشـق ذبـاح
إليـن شفتـه يـا وجـوه المفاليـح
شروة علاج المغربي لبـن طلفـاح
من تخفي انيابـه دمـوع التماسيـح
