في يوم من أيام رمضان المبارك ، زارتنا عمتي ، قالت لي أمي :
عيني حد يدقدق على الباب قومي افتحيله .
قلت : حاضر اماه .
يوم فتحته شفت قدامي عمتي ، وهي ضايمة واجد واجد ، ويوم بغت تدخل ، دفرتني ، وأنا مطلعة عيوني ما عارفة مو فيها ذي العمة !!
ودخلت البيت وأسمع صوتها معلية حلوقها من خارج ، تواشي أمي علي ، عوين أنا ضربتلها بنتها ، كما مووه هضربلها بنتها وهي صغيرونة !! ، ما أعرف من واشاها علي ، أنا والله العظيم ما ضربتها صدقوني ، استجاور بكم .
الصراحة فزعت من أمي ما رمت أدخل البيت لين جات خالتي ، ودخلت معها . المهم أمي عزمت على عمتي تفطر معنا ، وقمت أساعد أمي في المتبخ ( المطبخ ) ، وأنا خايفة من الضرب ، خلطت العجين بايه أسوي لقيمات ، لكن غويت في قوطي مال السكر ، قدفت ملح بدل السكر وهلت عليه ، لين غدا سم مالح مالح ، وأنا أتعفرت ، عوينة خلاص ، هسوي لقيمات حلوات ، ويوم توكل منهن عمتمي هترضى عني !! .
المهم قليتهن ، وواعنت أمي في حطاط الفطور ، قربت السح ، والرقيق ، واللقيمات ، والقهوة ، وصفيتها في العزاف .
وأذن ........ ومن عجلتي وسنوقتي ، مديت يدي على اللقيمات ، وموه أقولكم !!!... يالله مالحات مالحات ، هيسحهن مارايمه ، وهفلحهن مارايمة ، وخايفة يوكلوا منهن ، المهم أمي ما تحب اللقيمات ، وبقت عمتي وخالتي ، مو أسوي ياربي ، موه ، موه ، موه ، .موووووه........................ جيق مال الماي قرب اللقيمات ، وسحبت اللقيمات على ورا شوية ويوم تتحرك عمتي هينكب الماي في اللقيمات ، المهم عمتي يوم جت تتحرك انكب الماي في اللقيمات ، وعمتي ما عارفة إني أنا اللي قربت الماي ، وأمي مسكينة ما تشوف زين ، وخلتي نوبة كذاك ماشافت شي ، تمت عمتي تتأسف على اللقيمات بايه توكل منها ، لأنها تحبها واجد . قلت لها عمتي : إنشاء الله ،عمووه هسوي لش غيرهن تو ، قالت : برايه مالازم ، بس لو ضربت لي بنتي مرة ثانية ، علقش من رجولش . المهم أنا سلمت من الضرب ، والحمد لله .:D