لصديقي أحمد البلوشي ..للقصيدة حزنها .. حيث الألم والكلام - جديد علكميات

    • لصديقي أحمد البلوشي ..للقصيدة حزنها .. حيث الألم والكلام - جديد علكميات

      أنتظرتك!
      لين ماتت ساعتي بحضن السكوت
      وما لقيتك
      والمهم إنك بخير
      يالقصيدة الساكنة بجرح النخيل
      أنتظرتك ..
      وملنّي صبري ..هدوء فكري .. يباسي
      وما لقيتك .. أنتظرتك
      والمهم إنك بخير!!
      أرتجف وجه المسافة
      عاثرة فيني المسافة
      جيت أدوّر للخطاوي نور!!
      لا خطاوي .. لا رجاوي
      تلسع أقدام الحقيقة
      وما انتبهت .. انسكب حبري
      قصيدة ضايعة
      مرني صبحي ظلام .. وانكسر فيني كلام
      وما لقيتك ..
      الحقيقة في حروفي .. تعلك آلام الغياب
      والشوارع جلدها شيّب وذاب
      وانا أمشي .. ملنـّي حتى سكوتي ..
      ملنـّي وجهي .. سكوني
      يا القصيدة .. البشر وش هوْ خبرهم؟!!
      لا أغانيهم فرح
      ولا حكايتهم صبْح!!
      كل ما جيت آتلبس من فضايلهم قصيد
      طاحوا في الغربة بلد
      كانوا للغربة بلد
      هميّ الغربة وتد
      آتسلق فيه لأحضنهم سحابٍ في سماي
      ليت أوصل للضياء ..
      بس ألقاهم بفمّك يالقصيدة
      والغريبه ..
      ظفر هالشمس اللي جرّح وجهي وجيتك
      ما عرف وش هي حكايتهم .. حقيقة؟!!
      والغريبه
      جرني صوت البحر يلوي ذراعي
      من حنينه .. بالوله له جيت .. جيت
      وبس أعرف .. وبس أعلم
      وكم دريت
      انْ حبال المغفرة عقدٍ رصين
      ما لبسته .. إلا لمّا شفت انا فيني فراغي
      بس عرفته ..
      يالقصيدة .. ليه فراغي
      شخص من دون البشر إنسان واعي
      وكنت ناسي وكنت غافل
      السبب .. أرض ٍ تباهت بالعيال الخضر
      في رزمة قوافل .. شاطروا همي بقصيدي
      والعمر حرف بوريدي
      والسماء تمطر حزن
      سالت بفمي قصيدة
      وابتدت قصة جديدة
      لين ماتت ساعتي بحضن الغياب
      وما لقيتك
      والمهم إنك بخير !!.





      المصدر : مدونة علكميات


      ¨°o.O ( على كف القدر نمشي ولا ندري عن المكتوب ) O.o°¨
      ---
      أتمنى لكم إقامة طيبة في الساحة العمانية
      وأدعوكم للإستفادة بمقالات متقدمة في مجال التقنية والأمن الإلكتروني
       رابط مباشر للمقالات هنا. ومن لديه الرغبة بتعلم البرمجة بلغات مختلفة أعرض لكم بعض
       المشاريع التي برمجتها مفتوحة المصدر ومجانا للجميع من هنا. تجدون أيضا بعض البرامج المجانية التي قمت بتطويرها بذات الموقع ..
       والكثير من أسرار التقنية في عالمي الثاني       Eagle Eye Digital Solutions