نويت مرباع الغضي سيد الاحباب
قصدي يزول الجرح زاد التهابـه
جيت وبقايا نارهم حول الاطناب
بيت الشعر مطوي وباقي زهابه
اقفت ركايبهم ومني الهدب ذاب
من دمعي يسري والذهل بالاجابه
على غزير الدمع ضميت الاهداب
صديت لين الدمع يكفي سحابه
بعض الوجع يمكن تداويه الاعشاب
وبعض الوجع ياويل منه سطا به
عشق بدوي لحب ماهو بكــــذاب
يوفي ولو جرحه تجدد صوابــــه
واليوم وصلت بيننا مثل الاجنـــاب
ذاك الغلا ياضيعته يا سفا بـــــه
باكر اذا جينا لهم مثل الاغــــراب
من عقب ماكنا الاهل والقرابــــه
الامر لله كل شي لها اسبـــــاب
ولا الهوى وش لي على دق بابـــه
وشلون قلبي مايجي اليوم منصــاب
على الرجم منقوش بعض الكتابــه
حتى اثر مشيه مع سهول وهضـاب
مرٍ يبين ومرٍ مايندرى بــــــه
قلبي من الفرقى صويب ومرتــاب
كنه غدا نصفين من هول مابــــه
حزني عليه انه تسبب ولا طـــاب
نظرة طبيبه عجلت في ذهابــــه
ريح الخزامى والنفل زين الاطياب
يشدني ريح السمر في ثيابـــه
لاقبل نسيم الليل له خيل وركــاب
وله في طلوع الشمس عز ومهابـه
: 
: 
: