سلامو عليكم
ازيك يا مستر خالد ايه الاخبار
بداية انا اسمي عبدالرحمن و انا بدرس هندسة كمبيوتر و مهتم كتير بالسياسة و الاعلام
حقيقي كنت عاوز احييك على الفيلمين الروعة اللي اظن ان كلنا كنا محتاجينهم من احمد حلمي عشان ينقل من القضية اللي بتدور حوالين الكوميديا، للكوميديا اللي بتدور حوالين القضية .. خصوصا لما تكون القضية اجتماعية زي الف مبروك و عسل اسود
انا شفت عسل اسود في الايام الاولى ، و اظن انه فيلم متميز جدا، لكن ممكن يكون عليه ملاحظات كتير.
انا مش ناقد و مش متخصص، و الكلام اللي ممكن اقوله يكون سهل يترد عليه، و ممكن يكون فعلا نقط مهمة بالنسبة لك و ساعتها يهمني جدا اعرف رأيك فيها .
انا نقطتي النقدية الوحيدة ، هي نقطة واحدة لكن انا شايفها فارقة حقيقي .
انا اظن انه الفيلم كان "مش ممسوك" .. انت فعلا قدرت توجع قلب الناس على مصر، لكن القصة مش ممسوكة ابدا، انا اقصد انك ممكن تشيل اجزاء كتير من الفيلم و مش هيتأثر، كأن الفيلم عبارة عن مشاهد متركبة على التوالي ، لو شلت حاجة منها هيكمل الباقي بعضه.
عموما الفيلم خطوة مش عادية في السينما اللي ممكن تخللي مصر احسن
اللي انت بتعمله يا باشمهندس هيأثر في تاريخ جيل جديد، و انت فعلا بتقدر تأثر كما يجب ان يكون .
ربنا يوفقك .. و ان شاء الله كل اللي جاي احسن و احسن
شكرا
عبدالرحمن


المصدر مدونة غريب