انتخابات مجلس الشعب جديد انسان نادر

Warith AL Maawali · 10 ديسمبر 2011، 1:13

كنت واخد قرار قبل النزول للتصويت في الاتخابات وهو اني مش هدي صوتي لأي شخص أو أي حزب ، وكان ليا أسبابي في كده:
أولاً: اقتناعي الكامل بإن انتخابات تتم في ظل نظام باطل فهي انتخابات باطلة ، وده كان السبب الأول والأخير ..

ثانياً: إني معرفش أي مرشح من المرشحين اللي إعلاناتهم ماليه الدنيا يمين وشمال ، وحتى المرشحين اللي قريت البرنامج الانتخابي بتاعهم من خلال أوراق الاعلانات بتاعتهم كان أغلبهم كلامه سطحي أو مليان "همبكه" و "أونطه" ويمكن أكتر واحد لفت نظري في الانتخابات دي سامح يسري مطرب الكازينوهات اللي مرشح نفسه في الانتخابات ! ، منكرش إن في مرشح أو اتنين من اللي صادفني إعلاناتهم لما قريت البرنامج الانتخابي بتاعهم إقتنعت بيهم بنسبه كبيرة وكنت بفكر إني أراسلهم بالإيميل أو على صفحتهم ع الفيسبوك علشان اناقشهم في الكيفية اللي هيحققوا بيها برنامجهم ورؤيتهم العامة هتكون إيه للمرحلة الجاية ، وهيتصرفوا إزاي في حالة ما إذا عجزوا عن تحقيق برنامجهم ده ، وازاي هيتواصلوا مع أبناء دايرتهم ويجتمعوا بيهم ويسمعوا مشاكلهم ورغباتهم وطموحاتهم ويستقبلوها ... وغيره... وغيره.
ثالثاً: الإشاعة أو الحقيقة اللي بتقول إن اللي مش هيشارك في الانتخابات هيدفع غرامة 500 جنيه (وأعتقد 40% من اللي شاركوا كان هدفهم تجنب الغرامة).
رابعاً: إتبعت مبدأ "إختيار أخف الضررين" أولاً : لأني مش عايز أدي صوتي لشخص لا يستحقه ، ثانياً: لأني خايف لحسن تكون إشاعة الـ 500 جنيه دي حقيقة وأغرم المبلغ ده كده بدون وجه حق.

كلاكيت أول مرة:
بدأ اليوم اني فضلت واقف قدام اللجنه اللي كانت في شركة بسكو مصر من حوالي الساعة 8:20 وفضلت واقف لحد الساعة 9:20 يعني ساعة تقريباً واقف على رجليا لحد ما بدأت اللجنة تشتغل
وانا واقف في الطابور لقيت د/ موريس ، جارنا في العمارة واقف جنبي في الطابور ، فقعدنا بقى نحكي على أحوال البلد والثورة والمجلس العسكري وتشكيل الوزارة والجنزوري والانتخابات وهنتخب مين ويا ترى الانتخابات دي لعبة وللا حقيقة ويا ترى هيبقى في انتخابات إعادة .... وهكذا كنوع من معرفة وجهات النظر ونوع من قتل الملل اللي ساد الموقف.
وخلال ما احنا واقفين لقينا واحد بيوزع علينا ورق بتاع مرشح من المرشحين.
وطبعاً زي العادة برضو لما بدأنا ندخل اللجنه لقيت واحد راح داخل في الطابور قدام مني كده قال يعني مش واخد باله ولمحت في إيده ورقه كاتب فيها بياناته وإسمه وكل حاجة .. ما علينا
بعد انتظار كانوا بيدخلوا 4 افراد في المره ،

فدخلت اللجنه ولقيت حوالي
4 أو 5 أشخاص قاعدين على طرابيزه و قدام منهم راجل لابس بدله استنتجت بعد كده انه القاضي المكلف بالإشراف ع اللجنة فبمجرد ما دخلت سألني واحد واقف ع الباب عن لجنتي رقمها كام ، فدخلت على المجموعة اللي كانت قاعده وكان فيهم واحد شيخ "اكتشفت فيما بعد ان كل لجان القاهرة لازم يكون فيها واحد مربي دقنه مش عارف ليه!"
خلال ما هم بيدوروا على اسمي سألني القاضي اللي كان قاعد:
أستاذ هشام في مشاكل قابلتك في الدخول للجنة أو أي مشاكل عموماً ؟
قولت له: لا هو بس العدد بس اللي كبير شوية.
سألني: يعني مفيش حد منعك من الدخول أو حاجة زي كده
قولت له: لا أبداً كله تمام

مضيت في دفترين قدام اسمي وبعدين إداني ورقتين واحده كبيرة وواحدة صغيره ، وقالي أختار واحد من الصغيره واتنين من الورقة الكبيرة.
دخلت ورا البرافان اللي كان معمول ده ، ومن منظر الورقه والموقف ككل حسيت اني في موضع مسئولية ولازم اكون قدها !
بعدين لقيت ناس بتستعجلنا وبتقول شدوا حيلكوا شوية يا رجالة ، فبدأت أعلم صح على أي اسم من الأسماء بطريقة عشوائية ورحت مطبق الورقتين كويس وحاطط الكبيرة في صندوق والصغيره في صندوق تاني وطلب مني واحد من اللي بيسجلوا الأسماء أحط الحبر.
خرجت من اللجنه وانا حاسس اني اتخذت القرار الصح من البداية

قابلت د/ موريس ع الباب فسألته : ايه عملت ايه ؟
قالي: اخترت زي ما قالولي إتنين من قايمه وواحد من القايمه تانية.
قولت له: ربنا يسهل واللي يفوز يكون حد يستاهل.
قالي: ادينا بنحاول وبنعمل اللي علينا ويا تصيب يا تخيب
قولت له: مش عارف انا حاسس ان الأصوات أغلبها هيطلع باطل وهيكون في انتخابات إعادة.
قالي: خلاص ، نتقابل بقى في انتخابات الإعادة !
قولت له بضحكة ساخرة : ان شاء الله.
الغربية انه على ما وصلنا لباب اللجنه وخارجين لقيت واد بيوزع علينا ورق بتاع مرشح ، قولتله بتريقه : ما خلاص يا ابني ماحنا انتخبنا !
خلال ما انا ماشي لقيت دوشه وعربية عليها ميكروفون وواحد من المرشحين اللي كنت بشوف صورهم وشكله كده تاجر أو حاجة راكب عربية 4×4 وبيسلم على الناس كأنه رئيس جمهورية وللا حاجة.
قولت في بالي ، ده نفس اللي كان بيحصل زمان

كلاكيت تاني مرة :
كنت دخلت من يومين على الموقع بتاع انتخابات 2011 ولقيت ان الإخوان هم اللي مسيطرين على الأصوات ، وسمعت إن في انتخابات إعادة من الميكروفونات اللي في الشوراع ومن كذا واحد ، فقولت انا هروح وهعمل زي المره اللي فاتت بالظبط.
يمكن من ضمن أسباب تعبي في الحياة اني عندي مبادئ وماشي عليها زي القطر اللي ماشي على السكة الحديد ، وكنت مقتنع بمبدأ إن كل المرشحين زي بعضهم ، على الأقل بالنسبة ليا ، لأن اللي ميعرفش يقول عدس ، فكان لازم اختار من بين 3 نظريات بيفرضها الواقع عليا :
- نظرية الفلول ومؤيديهم ومرشحين الحزب الوطني اني لو منتخبتهمش يبقى هيخربوا البلد لأنهم شايفين من حقهم الترشح وعدم شرعية العزل السياسي لمن افسد الحياة السياسية والكلام ده !

- نظرية مؤيدين المرشحين في الأحزاب المعروفين بالإسلاميين من الإخوان أو السلفيين اني لو منتخبتهمش يبقى أنا راجل ضد الإسلام وإقامة شرع الله وفي ضلال مبين !
- نظرية الليبراليين اللي نازلين على الكتلة المصرية واحزاب تانيه زيها اني لو منتخبتهمش يبقى انا راجل رجعي ومتخلف ولا أؤمن بالديمقراطية والحرية !
انا أساساً مش مقتنع بأي نظرية فيهم ، وبما اني مؤمن تماماً ان صوتي أمانة وملزم إني أديه للي يستحقه أو مديهوش لحد ، فقررت اني هشارك وبرضو وهبطل صوتي زي المرة اللي فاتت بالظبط !
أي حد يسمع إني أبطلت صوتي بيقول في عقل باله طب انت تروح ليه من أصله متكبر دماغك ، لكن الفكرة فكرة اقتناع مبدأ وعقيدة معينة عندي انها انتخابات باطله ، يمكن يكون ده تنفيس عن حالة إحباط أو تحصيل حاصل أو محاولة فاشلة للسخرية من حالة الخداع اللي احنا عايشين فيها ، أو على الأقل قدام نفسي وقدام ربنا أبقى عملت اللي عليا من منطلق أني رحت وشاركت وسجلت نفسي في الانتخابات بصوت باطل !... الله أعلم
نفس المشهد اللي فات .. دخلت اللجنة وبرضو سجلت إسمي في الكشوف ، وأخدت الورقة ودخلت ورا البرافان وحددت كل الأسماء اللي فيها ، وحطيتها في الصندوق الوحيد في اللجنة وكان الصندوق تقريباً فيه حوالي 100 ورقه بس ! وطبعاً الحبر الازرق المميز المؤكد لإبطال التصويت !!!

بعد التجربتين دول سواء في انتخابات المرحلة الأولى أو انتخابات الإعادة حاسس بإن مصر داخلة في خدعة كبيرة والصورة بقت مشوشة أكتر والإحباط والحزن ماليني وحالتي النفسية زي الزفت لأني حاسس إن مصر بتضيع من إدينا والشعب بيتم خداعه والإلتفاف عليه في كل خطوة بتمر بيها بلادنا وكل لحظة بتمر علينا واحنا عايشين في اشتغالات هندفع قصادها سنين علشان الحال يتصلح.
اللي في إيدي إني أدعي ربنا انه يولي من يصلح سواء بقى مجلس شعب أو رئاسه أو غيره ، ولو اني مش مقتنع أبداً بالانتخابات دي ولا بالحكومة الجديدة ، وفي ناس كتير زي حالاتي مش فاهمين ومش مقتنعين بس بيصبروا نفسهم وبيقولوا خليك ورا الكداب.
لكن بعد الانتخابات اللي تمت دي ، أتوقع في الغالب إن الأمور هتقلب بغم ومحتمل الشعب يقلب الطرابيزة ويقوم على المجالس الثلاثة مجلس العساكر ومجلس الوزراء ومجلس الشعب ، مش تشاؤم لكن أنا حدسي بيأكد لي ان في حاجة غلط بس مش قادر أحدد هي إيه !

المصدر :انسان نادر

مشاركة