**.. قصيدة محاوره بين الشباب والشياب ..**

    • **.. قصيدة محاوره بين الشباب والشياب ..**




      **..       قصيدة محاوره بين الشباب والشياب ..**



      إقرى يا فايق يا رايق ..

      قصيده معناها صادق ..

      تحكي عن واقع وحقائق ..

      والعاقل عقله ميزاني ..

      قصه فيها كل عجايب شابن تقابل مع شايب ..

      والكل منهم بيعاتب ما فيهم واحد غلطاني ..

      قال الشايب :

      آآآآه يا حسره منكم يا شباب الدشره ..

      والله لا أوصفكم عشره و أفضحكم بين العربان ..

      الأول في البيت مفرك عند الدش وما يتحرك ..

      اضحك للدنيا تضحك لك خلص فلم وحط الثاني ..

      والثاني شاري سياره و يفحط في وسط الحاره ..

      ماسك في يده سجاره ويدخن من ذا الدخاني ..

      يمشي والله ما هو داري كسر غطيان المجاري ..

      يفحط ويدقدق بوراي وأزعج جميع السكاني ..

      والثالث قصته قصه يبغى حلاقن بمقصه ..

      منشان يقصقص له قصه ويخليه ولد فناني ..

      لكن التركي قد حاسه حوسه بمقصه وأمواسه ..

      طلع لحيه مثل الكاسه وسوى له عرف الشيطاني ..

      يلبس جنز ويرقص رقصن في ظني يسمونه دسكون ..

      ويقلد مايكل بن جاكسون ذاك الخكري الأمريكاني ..

      والرابع رجالن فني شاري له عودن ويغني ..

      لا أنا منه ولا هو مني ، لا بدناه ولا يدناني ..

      عانه في الاستريو عانه يبغى شريط الفنانه ..

      يبغى نجوى مدري ديانه يموت في الصوت اللبناني ..

      والخامس والله من حقي أقضبه وأطقه طقي ..

      في السوق يحدر ويلقي من دكانن في دكاني ..

      يرمي رقم و ياخذ رقما يا جعله بالبندق يرمى ..

      و إلا جعل عيونه تعمى خربانن والله خرباني ..

      والسادس سافر للخارج ويش الحاصل ويش الناتج ..

      جاب أمراضن ما تتعالج ما كانت في ذي البلداني ..

      والباقين عشاق الكوره كل نادي بجمهوره ..

      النفس منهم مقهوره والقلب منهم مرضاني ..

      نصراوي وأهلي وهلالي والإتي مقامه عالي ..

      صفوة منتخبنا الغالي وأسماهم فوق الجدراني ..

      قال الشاب :

      اسمع يا شايب طلعت فينا المصايب ..

      سمعت الحاضر والغائب وانتم خمسه يا الشيباني ..

      الاول شايب متقاعد حيا يرزق ميت قاعد ..

      لكن صوته مثل الراعد يحكي وكان يا ماكاني ..

      متقاعد ومؤذي أهله يطلب شربه يطلب أكله ..

      مراتن يشخط في الكهله ومره يضرب في البزراني ..

      يزعل من صوت الأولادي ما يبغى إلا الجو الهادي ..

      متمسك دايم بالرادي يسمع فيه أم حديجاني ..

      والثاني روحه معنيها يا متعبها يا مشقيها ..

      يصبغ دقنه ويحنيها ومركب له طقم أسناني ..

      يأخذ باكوره وعباته وإن شاف عجوزن بلقاته ..

      خبى الباكور بمخباته وتظاهر كنه نشطاني ..

      والثالث لا حالك حاله همه كيف تزيد أمواله ..

      يبكي من مصروف عياله ويقول المصروف أعماني ..

      يجلس يترقب لوليمه يفرح ليا جت عزيمه ..

      إلحق يا مال الغنيمه وليمه عند الجيراني ..

      ولا الرابع عودن في الميه لكن داخل به جنيه ..

      يبغى يتزوج صبيه ويخلف منها صبياني ..

      والخامس شاري له ناقه ومسجلها في البطاقه ..

      ماله مع أحدن علاقه عايش معها في البراني ..



      وسلامتكم... JJ