الحياة ألم وأمل كتب:

هلا اختي / الأفضل كليه تطبيقه عن تقنيه حتى النسبه يريدوا اكثر ف التطبيقيه هذا المعروووةف والشايع فديتج
انا ادرس ف كلية تطبيقيه بس الحمد لله الدراسه حللوووه وووايد واريح عن دراسة التقنيه حسب ما اسمع من عند ربايعي
التطبيقيات وحده ف عبري/ صحار/ رستاق / نزوى/ صوور / صلاله
التخصصات إلي فيهم : تقنية معلومات/ تصميم/ إدارة اعمال دوليه/ اتصالات
تقنية معلووومات حال العلمي بس وباجي التخصصات للعلمي والادبي
ويشترط في التصميم تكووني مختاره مادة فنووون تشكيليه
التقنيه فيها تخصصات حللوووه للعلمي فيها تجاره ومختبرات وهندسه وتقنية معلومات هذا إلي اعرفه
وفي الأخييير اختي احب اقووولج التطبيقيه افضل وهذا المعروووف وعاد فديتج انتي طموووحج وميووولج
وفقك الله اختي

ولد البـــدو كتب:

انا طالب فالطبيقية وسأخبرك عن التطبيقية
تطبيقية صحار اون امكانياتهم ما تسمح تشتري كتب للطلاب بالتالي ندرس بلا كتب كل يوم يوعدونا بدون فاديه
طاقم التدريس مشي حالك شي زين وشي الشين .....

طبعا فيها تخصصين اي تي ويتفرع لتخصصات دقيقة وفيها هندسة ويتفرع لثلاث تخصصات ميكانيك وكهربه وكيمياء
مواقف نطالبهم من ثلاث سنوات ولا سوولنا لسياراتنا ما عندهم حليلهم .......
مختبرات معهم مال اول مال المدارس احسن منهن لا فيهن ادوات ولاشي ....في مبنى جديد يبنوه قبل لا ندخل نحن وللحسن ما جاهز 4 سنوات كمل ولا خلص يجولوا بيسووا مختبرات بس خرطي ماشي منه
ولو سووا مختبرات بيحتاجن اجهزه عاد انتظر 5 سنوات غيرهن لين يشتروا أجهزه .....

التقنية ما اعرفها صراحة ما اقدر اتكلم عنها بس يجولوا متشددين وكذا ~!@q

ملك بأخلاقي كتب:

وعليكم السلام أختي أنا ما أقول أحسن لا التطبيقية لا التقنية أنا أدرس بالتطبيقية اللي أعرفه وجربته انه التطبيقية منهجها حلو ودراستها قوية خاصة بالفاونديشن ومتساهلين عكس التقنية وكل شيء موفر معنا ..هذا بتطبيقية صلالة أما باقي التطبيقيات الآخرى ما أعرف شيء عنهن ولكن بالتطبيقية لما تتخرجي لازم تجيبي معدل فوق أما التقنية اللي سمعته من ربعي انهم يطردو وعندي أصدقاء كبري طردوهم لازم تشدي حيلك بالتقنية خاصة بالفاونديشنومعروف من التقنية أنها تطرد ولو بخطا لكن بنفس الوقت التقنية لها مستقبل حلو خاصة بالهندسة لأنه الهندسة معهم تنافس الجامعة وبالنهاية طموحك هوه اللي يحدد

مشوت القواطي كتب:

ياااااااااا هلاااااااااااااا وسهلاااااااااااا ..............

كلياات العلوم التطبيقيه :

1 - هذه الكليات تابعه لوزارة التعليم العالي ......

2- توجد 6 كليات متوزعه ف كل من : نزوى ، عبري ، الرستاق ، صحار ، صور ، صلاله .

3- تتوفر سكنات داخليه ف كل من الرستاق وعبري وأتوقع صلاله ويحق للطالبه ان تسكن ف السكنات الداخله

اذا كانت المسافه تبعد 100كم عن منطقتها .

4 - يوجد خمسة تخصصات تدرس ف هذه الكليات وتوزيعها ع النحو الاتي :

* تطبيقية نزوى : دراسات الاتصالات وادارة الاعمال والتصميم ،

* تطبيقية عبري : ادارة الاعمال و تقنية المعلومات .

* تطبيقية الرستاق : ادارة الاعمال وتقنية المعلومات والانجليزي .

* تطبيقية صحار : الهندسه وتقنية الاعمال .

* تطبيقية صور : ادارة الاعمال ودراسات الاتصالات ويمكن تصميم . ( ما اعرف اذا ف تقنية معلومات او لأ )

* تطبيقية صلاله : ادارة الاعمال ودراسات الاتصالات ويمكن تصميم .

5- أدسم التخصصات واكثرها مشاريع وحفظ تخصص دراسات الاتصالات . ( أنصحك لا تاخذيه تراك بتنتحري )

6- من ناحية الخدمات يالله مشي حالك ..... وطبعا الكتب الدراسيه وحدك تشتريهن او تطبعيهن .

7- الهيئه التدريسيه شي كذاوشي كذا .

8- أسوأ قسم ف الاداره هو القبوووووووول والتسجيل ..... هناك تنذلي أكبر مذله ف حيااتك

____________________________________________________________________

التقنيه ..........

دراستهم حلوه وتحسي الدراسه هناك أكثر جديه من التطبيقيه يعني شادين عليهم ....

المدرسين أتوقع أفضل عندهم .........

والكليات التقنيه تابعه لوزارة القوى العامله ........

ف كل مكان ف التقنيه تحصلي كاميراات مراقبه .......

ما ف مجال عندهم للغش الي يغش يفصل من الاكليه لمدة فصل كامل .......

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

هذا الي اعرفه وانتي بعد سويي بحث بنفسك

وشوفي المكان الي يناسبك ...........

بسمة قمر كتب:

انا سمعت انو الدراسة في التقنية اكثر عملي اما التطبيقية فهي نظرية وبس بسبب عدم توفر المختبرات المناسبة ..
والاهل يقولوا التقنية افضل ..~!@q
والله اعلم ..

ملك بأخلاقي كتب:

لااااه عاد ماتقنية ذي يمكن بعد أحسن من جامعة السلطان عاد ماكلية

زحمه212 كتب:

مساء الخير

بالفعل التقنيه صارت اتنافس الجامعه

وان شاء الله هناك مخطط وفكره قيد الانشاء والدراسه انه التقنيه تصبح تابعه للتعليم العالي او انها اتكون مستقله سواء مثل استقلاليه الجامعه او اتكون على شكل هيئه مستقله

وتخصصات التهنيه اتنافس الجامعه وهذا الكلام شهد به طلبه من الجامعه
بس الفرق الجامعه معها سيوله وتوفير اشياء احسن

من ناحيه العملي وكذا التقنيه من وجهت نظري احسن

الجامعه وللاسف اصبحت اسم ما مثل قبل
قبل لما اتقول الجامعه يعني شي كبير وله هيبه ومكانه

اما الحين فعادي مستوى طلبه الجامعه وللاسف ما يتميز عن مستوى طلبه الكليات الاخرى
ونفس الشي وبعض طلبه الكليات الاخرى افضل

ولد البـــدو كتب:

لا أختي شدي حيلك ولو حصلتي فرصة للجامعة روحي افضلك
وان شاء الله بتتعدل الأمور لأنا احنى اول دفعة في الهندسة فأكيد راح نكون فئران تجارب وراح تظهر لهم فجوات
وبالفعل ظهرت والدفعات الي بعدنا حصلوا افضل منا .....
واتوقع عشان الكتب تنحل ويشتروا للكل ....

موفقه