يوم ضربت براسي في الجدار


فيني صولان من يوم ناهض من الغبشة. صولان صولان. قاصر عن ينبزج راسي. بو فبطني كله جبته وبعده ذا الصولان ما خاز. هين أغيب هين أزول؟ مارايم حتى أشل عمري. يوم بغيت شي كله إلا أسحك. تو موه الواحد يسوي بعمره وهوه مسيكين وحيّد لا ولد ولا تلد. ما شي إلا أعصب راسي بشنطوط عسب يخف شويه. وأجرب أغفي. لكن من يروم يغفي من ذيلا الجن ولاد الجيران.


زين بعده تفاجأ سالم ود نهشة خاطف قدام البيت وسمعني أونّ. قالي: مالك موفيك تون؟ قلتله: صولان ود الحلال صولان ما رايم أشل راسي من الوجع. خلا خلا أشلك الدختر مايستوي تجلس كذاك. خلاف سرنا وتجمل بعده وقّف سيارته قدام باب المشتشفي. وشلني فوق كرسي وأنا ما شي نايخ. دخلنا عند الدختر قاللي الوالد موه يعجبك؟ استغربت أنا أحسبه يسألني موه يعورك ورديت عليه: يعورني راسي. قاللي الدختر: أنا تو ما أسألك موه يوجعك سألتك موه يعجبك؟ قلتله: تو نته تشوفني ما رايم حتى أفتح عيوني من الوجع وتسألني موه يعجبك؟ ما فيي ضين حالك تو ولا أدليك أنا مو يعجبني. الوالد سمحلي تراه مخلص علينا البنادول وقلت أهجل عليك علين تصح. أسميني سودنت عليه ومن الغميضة بو فيي كرخته فالشداغ وقلت ح سالم: تروم تشلني من هنا الله لا حاجنا عليهم ذيلا رعاة البندول.


عوين موه عاجبنك؟ وابوي وابوي الغم. أنا ما عاجبني شي. ما عاجبني شي. وسرت وضربت براسي فالجدار. والحمد لله خاز ذاك الصولان كله. وبعدني أسير وأجي عليه ذاك المشتشفي وحرام وخازوها بقعة الدم بو طشت من راسي وغشّتلهم جدارهم.