يوم انطفت النار



رجّال وحرمته. خلصوا ذابحين ذاك النهار وقالوا يخرجوا يسويوا اللحم مشاكيك في الليل. ضبيوا وكلوا وكل شي. جيوا يطفوا النار ما طاعت تنطف. مالها موجاها النار ما طاعت تنطف؟ عوين كنه حد كابلّها حل تراب وزادت بعدها. همه يطفوا من هناهاه وهيه تشتعل من هناك. وجلسوا كذاك ليليّة. خلاف قالوا عوين موه نبغالها حنوه؟ ذي النار حال السيح. خلا سايرين حنوه عنها أتنطف وحدها. وساروا البيت شالين شلولهم. لقيوا بيتهم عوين منتهي صخّام. سبحان الله ما جات عليهم ذيك السيْرة. وساروا تحت سمرة ولفوا برانيصهم عليها كما فرقان الشوان. وسلموا للقضا. موه يسويوا بعمارهم؟ ما حد يروم يحارب القدرة. وجلس عوين الرجال يتفكر: تو حنوه ما لنا ما طفيناها ذيك النار؟ لكن الله ما يضرب بعصا. أكيد حد اصطاب منها ذيك النار. والله تعالى سلط علينا النار تحرقلنا بيتنا.


تموا كذاك علين جاهم ضيف يقالّه بن مقرّب. تو همّه يسمعوا بهذا الاسم لكنهم مخجلين عوين يقولوله شي. يحيدوه واحد كريم وبّه المثل: عيش بن مقرب ما يقصر على البادي. الحاصل قربوّله المتيسّر من ذيلاك المشاكيك. قالوله: قْرَبْ بن مقرّب. قالّهم: أحسنتوا أنا ما جاي أتعشى أنا جاي أستستمح منكم أبغاكم تسامحوني على ذي الفعلة بو فعلتها فيكم. قالوله: خير إن شاء الله موه مسوي بن مقرب؟


قالّهم: أنا بو حرقتلكم بيتكم. كنت ساير في أمان الله وبيولي ولادي. جاي أرود حياننا بو ف طيوي. وهجمت علينا في الطريق وحده شيطانة كافرة يقالّها نينوه. قالتلي: نته بن مقربّ؟ قلتلها: نعم موه عندش تهجمي علينا؟ موه سوينابش؟ قالت: نته جاي تحكمنا عارفينك. لكني ما أخليك تخطي شبر من هذي البلاد. أنا الحاكمة هنا. وقوم سير بلادك أحسلك. عن يجيك شيٍ ما يسرّك. قلتلها: نزين. كذاك باغيه نتيه! هيوالله ما يهمش. وأنا نوبه عاد ما قابلت حد قدامي. عندي ف الرياضة وارثنها من حبابوتي. وأنفخها وتطش فوق كما بو فاش نفّاخة وتطيح عليات الفلج. قلتلها: شربي ماي الفلج كان ما عاجبنش. أنا ساير حيت حياني. ما باغي أضر حد ولا حد يضرني. قالتلي: إياني وياك تخطي شبر. وسارت على كلامي وشربته ماي الفلج كله، وتفلحبه كله فوقنا. رشتنا بّه ونسيح فالماي كنه شالنّا وادي الشاب. الله تعالى ما جعلنا نموت فيها ذيك اليوم. قبضنا ف جوس علين طلعنا من الوادي. وهيه ترابي من بعيد أشوف الشرار يطلع من عيونها. وتمت ترابينا بعيونها علين طلع منهن شرار وتمينا ما شي مستحرين كنا أعوذ بالله داخل جهنم. وتفلت على ولادي عسبّ ما يصيبهم الشرار ولا يحرقهم. هيه تنفخ وأنا أنفخ علين دخلتها بيت قريب ما كان حد فيه. وجلسنا هناك هي تشرر وأنا أنفخ علين غلبتها الملعونة واحترق البيت. بيتكم. والله سلم بسلامته عن تكونوا في البيت ذيك السيعة. وهذي قصتي.


عاد الرجال ما عرف موه يقول؟ كان يحسب إنه حد اصطاب منها ذيك النار مال المضبي وهوه أصريه بن مقرب بو حارقلهم بيتهم. قالّه: بن مقرّب. قالّه: نعم. قاله: تقول إنه عندك رياضة رجعلنا بيتنا عجب كان تقول إنه عندك رياضة. حنوه ما يستوي جالسين كذاك يحسبونا الأوادم شوان. ما شي اتدهدر بن مقرّب. ما جالّه بنى حتى درس حال هوشه. والرياضة بو هوّه يعرفلها كلها مال مضرّة. الحاصل الناس راحت وجيّت وبن مقرّب ناسنها الدرب بو ترجعه الأحسا من يوم جلس أربعين سنة فعمان يبني بيت حال ذاك الرجال وحرمته.