يمه أنا ودي أقول للناس

    تمر دردشة الساحة الخاصة بالمتصفح والموبايل بفترة صيانة دورية هذا ونعتذر للجميع على الإنقطاع المؤقت بإمكانكم المشاركة في المنتدى لحين عودتها :)

    • يمه أنا ودي أقول للناس

      يمه أنا ودي أقول للناس عن الشيمة عن الحسرة عن الإحساس عن العمر إللي ملآة اليأس أنا ودي أضحكهم ابكيهم احكيهم عن الدمعة وليل الخوف عن القصة حروف ، حروف عن جروح تسافر بي وترقى ثم تحول بي مثل غيري من الأجناس ... وأنا عمري يقول يمه وأنا فرحي يقول يمه وأنا جرحي يقول يمه اذكرهم افكرهم اسولف عن جروح وليل احبك ياغلآتي حيل اذكرهم وأنا توي صغير مرقدي صدرك لهاثي يجمعه صدرك ضحاكي مبعثه صدرك وزادي منبعه صدرك وأداري الجرح في صدرك ... تربينا على آلاف.تجمعنا على كلمة تحابينا على كلمه وزاد ناكله بصحاف .وحنا مثلنا آلاف ... تلمي القرش فوق القرش نبي نشري ثياب وفرش نبي نجبر خواطرنا ورب الكون يسترنا تقول للولد منا أبيكم للزمن رجال أبيكم فارس وخيال أبى لآصاح فيكم جار يبيكم والزمن جوار تفزوا له صغار وكبار... أبى اشرح بعض قصتنا وكل الناس قصتنا ليا أذن مطوعنا يجي صوته بمسمعنا تصيحي تقولي يا ولد صلوا توضينا تصابحنا وصلينا رفعنا للسماء كلمة تصعدها بواكينا وبعد نص الملا ما فاق الآ يا كاتب الأرزاق ألا بالله تهدينا ... انااعرف إن الجروح إكبار واعرف إن الزمن دوار وأنا اذكر وش تغدينا ومابة شيء بأيدينا أنا اذكر يوم صار العود على كيفة وتباكينا أنا بإذني سواليفه وممشانا على كيفه... أنا اذكر طفية الفانوس وأنا اذكر لدغة الناموس وطعم الرز والمعدوس ولآبه شرح أو قاموس أنا اذكر ثوبي البالي أشوف الحال بعيالي وأنا اذكر صيحة الفران وأنا اذكر ونة الجوعان أنا اذكر كل ذا كله ندور للخبز بله أنا اذكر لآشكى شاكي صفعتيني وأنا باكي وأنا اذكر دعسة خطا كي... تقولي يا ولد جنيت تطارد يا خبل ا لونيت وأنا اذكر كل ذا واسأل زمان راح وتبدل وذا القرص من أيدك تعجنينه تلمينه تخبزينه وأنا فرحان وأنا اذكر فرحة الفران تبدل كل شيء فينا معاد شيء يكفينا أنا اذكر أول بجامه وثوب مشترى للعيد وأنا اذكر أول عمامة وفرحة خالتي بالعيد أنا اذكر يوم مابه شيء بعدنا ما عرفنا شيء ودمعات الفرح منك تعبر بالفرح عنك عيالي ياهنا قلبي تعالوا خلكم قربي أنا اذكر شايبي المرحوم اشوفة مرتكي لليوم يصيح بنا يعذبنا عيالي ولموا الدلة أناظر وافتزع يمة أعطيني البيز يايمة تسمي ثم تقول لي ترفق لا تطيح يمة ولا من قعد رآسة تمدد صابة نعاسة زعق فيني علامك ما تغطيني أقول ابشر أحس البرد وازيدة من بطاطيني أنا اذكر خالتي حمدة ومقيولة ومستورة اسامي تمتلي صورة أنا اذكر حمسة المحماس وأنا اذكر دقة المهراس وأنا اذكر مامة الدافور وربعي وخاطري المكسور أنا اذكر حارتي تبكي بعضهم يشتكي جوعان وأنا اذكر دخلة الضيفان وخالي وعزوتي جمعان ... أنا اذكر صيحة العسة ووجوع الليل مندسة تبي تدفا على الكانون ولابة حضر أو قانون ولا به رأفت الهجان وان اذكر موضة القيطان وصوت العنز واللبان رواية في زمان كان أنا اذكر يوم قالوا عيد وأنا عيدي بزنوبه وأنا احفظ صورة الإخلاص وأرتل سورة التوبة أنا اعرف حظي المسكين كبار القوم هجوا بي وأنا احلف لو بيارقنا على التاريخ منصوبة يباريني نزيف الجرح ويسأل وين ودوا بة أقول لة وش تبي يا جرح تبي تاخذ علي نوبة تبي تحرس معاناتي وكل الأرض مقلوبة تبي تسكن على قبري وأنا المدفون في ثوبة وعمي مات في بيتة وخالي قد تغدوا به وانا جرحي يسافر بي وليت الناس حسوا بة .. انا اذكر كل ذا يمة انا اعرف حاجتك يمه انا اذكر جرحنا يمة انا اذكر يوم سقيانا من الزفة انا وعيالك ملتفة نبي ندفا من الكانون نبي نشرح وجاع عيون نبي نملا جياع بطون نبي نصرخ ونملا الكون انا اذكر كل ذا مدفون تبين الصدق يايمة انا بذاك الزمن مجنون ... عرفت اشلون لاصحتي احب رأسك عرفت زين لاصمتي ولا فطرتي ولا باعك بعض ناسك انا اذكر يوم نتبارى ولا حدن موذي جارة ولنا قانون بالحارة يفسر قصة الدنيا غريبة قصة الدنيا... انا اذكر دمعتي بعيني وثيقة بينك وبيني تعذبني تكذبني تعاتبني تبي تقبض على رمشك وتسحبني ليا صحتي انا ويني أشوف الدرب بعيونك أشوف البرق بسنونك انا منهو وانا بدونك انا حظك وانا منك وارد المايلة عنك تذكرني سواليفك وانا أراقب مذاريفك بذاك الجرح في الكتمان وانا إلى بكى انسان .... انا اذكر قصة الشراب تحول بيدنا كورة وانا اذكر قصة الطلاب وأستاذي وباكورة انا اذكر لعبة الشرعة وبعض أغنامنا ترعى ونشرب كلنا بمغراف عدل وأنصاف وعمي صالح القطان ينجد للجميع لحاف ... كبرنا في العمر يمة تغربنا تباعدنا تعذبنا نبي نلحق بباقي الناس نبي نشيلك بباقي الراس نبي نطرد من الوسواس جروح القلب والإحساس ... بعضنا غادر الديرة بعضنا غاص في الحيرة ولكنا حفظنا الروح ومعنى الحب والغيرة بعضنا ما قرأ كلمة وبعضنا فر من حلمة وبعضنا طاح بة علمة ندور وين وش صرنا ولآبة نو يمطرنا وصرنا مثل كل الناس نصارع في كلآم الناس نعاين في وجوه الناس تغير كل هاك الناس انا ودي اصارحكي وعيني وعيني ماتبارحكي ابيكي تسمحي يمة .. جعل ربي يسامحكي ...... أبا احكي للملأ يمة احكيهم عن أوجاعي وكم داحوس بصباعي وكم حزن على اشراعي زماني ما عرف دكتور زمان القاز والدا فور زمان العجن والتنور زمان لو تعيشونة بكل العمر تشرونة زمان الفكس والحنا زمان الجرح والونة وكم نملة وكم صرصور يعيشوا كلهم منا زمان لآبكى واحد تشوف الكون في واحد تحس الآة من واحد وان الدار بة واحد .... زمان التضحية شيمة وقول الصدق لة قيمة عيون الناس تسليمة ونفرح لابدت غيمه انا اذكر فرشة الشملة وانا اذكر دبة النملة وحولي الناس كانوا ناس ولابة شيك ولا عملة ... انا اذكر لاتجمعنا نغمس من طرف ماعون انا اذكر عمق ضحكتنا وتشهد للجروح عيون وش الي يجبر الدنيا تبادلني الضحاك طعون تصبرني على جرحي وانا اطلب من جراحي العون ... والى قالوا نصبح عيد نطر طش بيتنا برخام وننفض كل زوالينا وحنا بلنا حفاة أقدام وذا يحك وذا يصيح ولابة حارس ولا خدام وذا يبكي على حظة وذا يسبح مع الأوهام انا اذكر يوم نلم كبوش وصيحة بايع المنقوش وانا اذكر لعبة الطرة وكل الدار غريفة وحوش .. وفطور العيد بيازة ولآبة ناس منحازة ولابه ناس تغتالك وتبكي لاجت جنازة .. انا يمة عرفت إن الكبار كبار وهرج الغيب اشوفة عار وعرفت إن الزمن دوار انا اذكر طاسة الحنا وخواتي ضاحكات اصغار انا اذكر يوم ماكنا عيون طافحات غبار تبدلنا ولاكنا نناظر مامضى ونحتار زمان راح ولااحد مرتاح يبدل جرحنا بجراح .. الايالغالية وينك تلميني من احزاني تدليني لعنواني تشوفي وين جرحي صار وانا ويني ووش جاني ... انا يمة غريب ببيت تدور حرقتي عن بيت اداري الآة بكلمة ليت واجفف دمعتي بياليت وال منى نصيت القوم يجيني ردهم ياليت ... انا يمة اسير هموم ولولآدعوتك ما قوم جروح الناس خلتهم وانا جرحي معي لليوم جروح الناس عافيتهم وانا كن جريح اليوم هموم القوم في صدري وانا همي نساة القوم ... انا يمة وكم مثلي غريب غربتة بيتة زماني راح من عيني وأحسب اني تعديته تشوفي من انا بغيرك ومنهوا حبني غيرك ومنهوا اعشقه غيرك ومنهوا افقدة غيرك .... تشوفيني أدور لك أدور بعيد أفتش في ثياب العيد اردد آهاتك أعيد بغيرك وش يكون العيد انا منهولياراحتي وكم من جرح كم شفتي انا يمة تمنيتك خذيني عمري وعشتي ... انا يمة بعد صدرك أدور في زمن قاهر أدور عن لبن طاهر أدور عن فرح ظاهر أسامر حزنك الساهر على جفني وليل صار يعرفني يعذبني ويسعفني يهاودني يكتفني يوديني ويجرفني ... انا يمة أعيش بجرح ليا لديت يزهمني وإذا ما غفيت يدهمني ولابه حد يرحمني سكوتك بس يفهمني ....
    • [TABLE='width:70%;'][CELL='filter: glow(color=sandybrown,strength=8);']
      سيدي العزيز ..nasser2030
      جميل تلك الكلمات والتي سردتها للام .. فالام تستحق كل شئي .. فلا ننسى فضلها علينا في صغرنا .. فهي قامت بالرتبيه الحسنه .. سيدي شكرا لسردك الرائع ولكلماتك الاروع في حق الام .. اهدى لك حبي وامتناني على هذا الابداع الراقي .. واتمنى لك التوفيق
      [/CELL][/TABLE]
    • ناصر ////

      قد تنتقص الكلمات أحياناً من حدود تبليغ معانيها وأنا هنا أعترف بفشلي الذريع في توصيل إعجابي بهذا الإبداع المتجلى في الروعة الكمالية والأسلوب السلس والجميل والطريقة التي أسردت بها هذا الإبداع الرائع .

      إصفق لك بحرارة رغم إدراكي من خلال مشاركتك هذه بأنك أستاذ في الإبداع وفي صناعة الكلمة .

      أتمنى لك التوفيق دائماً وأن تكون متواصلاً لتنثر على هذه الصفحة أريجاً من هذا الإبداع الراقي .

      وبين الأم والذكريات تبقى الخيوط ممتدة على إمتداد الدنيا . فلا تحرمنا من كلماتك .
    • nasser2030


      الام ..
      من يستطيع ان يعيش او يستحمل البقاء بدونها ... انها كل الحياة

      أخى العزيز مشاركه رائعه فاانت حقا تستحق لقب مبدع ....

      ملاحظه: لو جزءت مشاركتك على مرحلتين قد تستحق أكثر ردودااا لروعتها

      أذ القارءى قد يصبه الملل لطول المشاركه ويمكن لا يكملها الى الأخر وأعذرنى لهذاااا


      اتمنى تواصلك الدائم ...وبالنتظارجديدك ....دائماااااا


      تحياتي
      كيف لقلمي أن يهمس لسواكِ و القلب قد خلا إلا منكِ .. ]
      كيف أكتب عن سواكِ و العين لا ترى غيركِ ... ]
      كيف لا أفكر فيكِ و الذهن لا يشغله غيركِ .. ]
      كيف لا أشتاق إليكِ و انا كلي حنين إليكِ .. ]