تقوول مشغول وأدري بك تصرفني

    • تقوول مشغول وأدري بك تصرفني

      تقوول مشغول وأدري بك تصرفني



      ماني بساذج .. وتكــفى غيـّر اعذارك
      ولاّ انـت يعني بعينك ويش شايفني؟


      أدقّ دايـم عليك .. اسأل عن اخبــارك
      تقـول: مشغول وادري بك تصرّفني


      مشغول وشّو وانا اللي أعرف اسرارك
      واعْرفـْك جدا ..ً وأكثر ممّا أعرفني


      تراني افهــم عليك .. وكـــنّ أطـوارك
      تقول شكلك زهقْـت وشبْــه عايفني


      إذا وجــودي معــك ما يلفت انظــارك
      فالأحسن امشي.. ولا أقعد وتنزفني


      يجوز لامــن مشيـت .. الحال يتـبارك
      أرتاح وانسى ويرجع للكرى جفني


      صحيح.. ودي في هـذا العمر نتشارك
      لكنّ وضعـي معـاك الحين يؤسفني


      أنا طبــاعي كــذا مــن قبـل لا اختارك
      ماقـطّ وجهي على اللي ما يوالفني


      إمــا تجيــني .. وداري عِـــدّهـا دارك
      والاّ على الوهم .. يكــفي لا تكلفني


      تعبـــت والله .. ولا يمدينـــي اتـدراك
      قطـار عمــر ٍ من اول معك طايفني


      قلّي شسوّي إذا استبطــيت مشـوارك؟
      الصبر يفني وبعـض الضيم مايفني


      أخاف باكر يجي واغـْـدي "سِنمّارك"
      ومن فوق قصـرٍ بنيته لك بتحذفني


      واخاف تخلـف حـلاوة جنّتك .. نارك
      واموت وحدي ولالْقى مين يسعفني


      شف عاد لا من بــقالي غير تذكــارك
      أحَــنّ مــن هالحيـاه .. بترْبتي دفْني


      فارجوك تصْدق معاي وتكشف ْستارك
      مـن دون احـلّفـْـك أو حتى تحلّـفني


      سؤال واحـد .. وابيــك تجمّـع افكـارك
      حتى تجاوب بكلّ وضوح وانصفني


      إصـرارك اول علي هو نفسه اصرارك؟
      ولاّ تغيّـرت ؟.. ياخي قول واتحـفني


      ومن قبـل تحكـــي تأكـّــد إن مقـدارك
      ما زال نفســه .. وما زالك تشرفني


      واهـمّ حـاجه .. قبـــل تبـدي تِــعذّارك
      عشان تسحـب.. وللذكرى تخلّـفْني


      أبيك تعرف .. وتـدرك .. إنّ مسيارك
      هذا أخيـــر .. وبعَـدْها منت شايفني



      إمشْ بطريقك!! " وانا بتجيني اخبارك "
      لاعاد اعَـرْْفك.. ولاعاد انت تعرفني
      شفت المقفي وربي لو خطوتين ما اتبعه
      واصبعي وهو اصبعي لا جرحني اقطعه
      ابسألك سؤال والجواب كلمتين
      لا صار قدرك والهوى..خصمين
      من تآقف معه؟؟
      ياخي العزة كرامه وإنت دايم مستهين
      ياخي ضرسك لا وجعك بذمتك ما تقلعه.؟؟

    • يسلمووو على الموضوع
      لا اله الا انت سبحانك اني كنت من الظالمين لا اله الا انت سبحانك اني كنت من الظالمين لا اله الا انت سبحانك اني كنت من الظالمين يا مُسخّر لحظات الجبر لعبادك، اكرمنا..

    • بارك الله فيك

      تسلم على الخاطرة
      لا تشتكي للناس لا ضاق صدرك
      الناس ما تملكه مسرة ولا يــاس
      الناس مثلــك حالهــم مــن حالــك
      والكل من مر الليالي شرب كأس
      ولا تحسبنــك بالتعــاسة لوحــدك
      اعرف ترى عايش معك بالشقا ناس
      يالله تجمــــعنا على خير ميــــعاد
      في جنة الفردوس نلقى بعضنـــا